− جاڭادان تىركەلگەن ناۋقاستاردىڭ 56%-ى ۆيرۋستى قارىم-قاتىناس ارقىلى جۇقتىرعانى انىقتالدى. بۇل − تۇرعىنداردىڭ جەكە قاۋىپسىزدىگىن ساقتاماي, سانيتارلىق تالاپتارعا سالعىرت قاراۋىنىڭ ناتيجەسى, − دەپ مالىمدەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى مۇحامعالي ارىسپاەۆ.
مۇحامعالي قايىرجان ۇلىنىڭ ايتۋىنشا, ەلىمىزدە توتەنشە جاعداي توقتاتىلىپ, كارانتيندىك شەكتەۋلەر جەڭىلدەگەن ساتتەن باستاپ, تۇرعىنداردىڭ دەنى جايباراقات ومىرگە كوشكەن. كوپشىلىك جيىندار كوبەيىپ, توي ماۋسىمى باستالىپ كەتتى. "قازاقستاننىڭ باس مەملەكەتتىك سانيتار دارىگەرىنىڭ جاڭا قاۋلىسى بويىنشا تويلار مەن كوپ ادام جينالاتىن ۇلكەن جيىنداردى وتكىزۋگە تىيىم سالىنعان. مەملەكەتتىك ورگاندار مەن كۆازيمەملەكەتتىك سەكتوردىڭ جۇمىس ءتارتىبى 80%-عا دەيىن ونلاين رەجىمگە كوشىرىلدى. حالىققا قىزمەت كورسەتەتىن ورتالىقتار دا باسىم كوپشىلىك قىزمەتىن قاشىقتان اتقارادى, ونلاين وتۋگە مۇمكىن ەمەس قىزمەت بولسا, ونىڭ ءوزىن الدىن الا جازىلۋ ارقىلى كورسەتۋ كەرەك. ورال قالاسىندا دا بازارلار كۇندىزگى ساعات 10:00 مەن 16:00 اراسىندا اشىق. قوعامدىق كولىك – اۆتوبۋستار بارلىق سانيتارلىق تالاپتاردى ورىنداي وتىرىپ, تاڭعى ساعات 6:00-دەن 21:00-گە دەيىن جۇرەتىن بولادى", دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى. قازىر باتىس قازاقستان وبلىسىنىڭ سىرىم, قاراتوبە جانە جاڭاقالا اۋداندارىندا كەيبىر شەكتەۋلەر ەنگىزىلگەن.
ورال قالاسىنىڭ وزىندە №6 ەمحاناسى, "تسەنتركرەديتبانك" فيليالى, "التىندار" ساۋدا ءۇيىنىڭ ءوندىرىس تسەحى جانە "سۋروۆسكي" سۋپەرماركەتى ۋاقىتشا جابىلعان. سونداي-اق ورال قالاسىنداعى ورتالىق ساياباق, بارلىق تۇنگى كلۋب, ويىن الاڭدارى, بۋكمەكەرلىك كەڭسەلەر, كەزەكشى توپتان باسقا مەكتەپكە دەيىنگى ۇيىمدار دا جۇمىسىن توقتاتقان. بۇل اتالعان نىسانداردىڭ بارىندە قىزمەتكەرلەردىڭ ۆيرۋس جۇقتىرعانى انىقتالعان.
باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆتىڭ ايتۋىنشا, ءدال بۇگىن جۇقپالى اۋرۋلار اۋرۋحاناسىندا 240 ناۋقاس ەم-دوم الىپ جاتىر ەكەن. ونىڭ ىشىندە 6 بالا بار.
− تىركەلگەن ناۋقاستاردىڭ 64-ءى اۋرۋدىڭ سيمپتومسىز تۇرىمەن اۋىرعان. 58 ادامدا دەرت جەڭىل, 102 ادامدا ورتاشا وتۋدە. ال 16 ادام كوروناۆيرۋستىڭ اۋىر تۇرىمەن اۋىرىپ جاتىر. ونىڭ ىشىندە 4 ادام وكپەنىڭ جاساندى جەلدەتەتىن اپپاراتىنا قوسىلعان, − دەدى بولاتبەك امانگەلدى ۇلى.
باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ ايتۋىنشا, سوڭعى كەزدە كوروناۆيرۋستىڭ اۋىر تۇرىمەن اۋىراتىندار كوبەيگەن. "اسىرەسە پنەۆمونيا دياگنوزىمەن تۇسكەندەر كوپ, 53 ادامعا جەتتى. ولاردىڭ ءبارى دە وتتەگىگە مۇقتاج, ياعني وتتەگى بەتپەردەسىن قولدانۋدا. بۇل وتە جاۋاپتى جاعداي, ءبىز ولاردى ەرەكشە باقىلاۋعا الدىق. قازىر جان ساقتاۋ بولىمىندە – 7 ادام, جەدەل تەراپيا بولىمىندە – 7 ادام جاتىر. اۋرۋىن اسقىندىرىپ, اۋىر جاعدايدا تۇسەتىندەر كوبەيدى. ماسەلەن, 5 ماۋسىمدا قوسىمشا قانت ديابەتى, جۇرەكتىڭ يشەميالىق اۋرۋى سىندى سىرقاتتارى بار 1938 جىلى تۋعان ايەل ادام اۋىر جاعدايمەن ءتۇستى. ول بۇعان دەيىن ءوز ۇيىندە ەمدەلگەن. قولدانىلعان شارالارعا قاراماستان 10 ماۋسىم كۇنى قايتىس بولدى", دەيدى بولاتبەك قايۋپوۆ.
كۇنى بۇگىن باتىس قازاقستان وبلىسىندا كوروناۆيرۋس ينفەكتسياسىنىڭ 376 وشاقتا تىركەلىپ وتىر. 15 ماۋسىمداعى كورسەتكىش بويىنشا وبلىستا 100 مىڭ تۇرعىنعا شاققاندا اۋرۋشاڭدىق كورسەتكىشى 147,3 قۇرادى. 14 جاسقا دەيىنگى بالالار اراسىندا 48 جاعداي تىركەلدى.
13 ماۋسىمدا باتىس قازاقستان وبلىسىنىڭ باس مەملەكەتتىك سانيتاريالىق دارىگەرى "باتىس قازاقستان وبلىسىنىڭ اۋماعىندا كوروناۆيرۋستىق ينفەكتسيانىڭ تارالۋىنا جول بەرمەۋ بويىنشا شەكتەۋ شارالارىن ەنگىزۋ تۋرالى" قاۋلى شىعارعان بولاتىن. ول بويىنشا بانكەت, ۇيلەنۋ تويلارى, مەرەيتويلار, وتباسىلىق, ەستەلىك, ادەت-عۇرىپ جانە وزگە دە ادامدار كوپ جينالاتىن ءىس-شارالار وتكىزۋگە تىيىم سالىندى.
جينالىس, كەڭەس, سەمينار, كونفەرەنتسيا سىندى جيىندار سەلەكتورلىق رەجيمدە جانە بەينەبايلانىس ارقىلى وتەدى. جوعارىدا ايتىلعانداي, مەملەكەتتىك ورگاندار مەن كۆازيمەملەكەتتىك سەكتور ۇيىمدارى قىزمەتكەرلەرىنىڭ 80 پايىزى قاشىقتان جۇمىس تاسىلىنە اۋىستى.
مەديتسينالىق ورتالىقتار مەن ستوماتولوگيالىق كلينيكالار الدىن الا جازىلۋ بويىنشا ساعات 10:00-دەن 18:00-گە دەيىن قىزمەت كورسەتەدى.
سپورتتىق نىساندار تەك اشىق اۋادا, تەك سپورتشىلار ءۇشىن, وندا دا 30 ادامعا دەيىن عانا كورەرمەنسىز قىزمەت كورسەتە الادى. مادەنيەت نىساندارىندا دا قىزمەتكەرلەر 30 ادامنان اسپاي, كورەرمەنسىز جۇمىس ىستەيدى. ساۋنالار, جەكە جانە قوعامدىق مونشالار تەك 20 ادامعا دەيىن قابىلداپ, ساعات 10:00-دەن 22:00-گە دەيىن قىزمەت كورسەتۋى ءتيىس.
− 20 ماۋسىمنان باستاپ ساۋىقتىرۋ جانە ساناتوريالىق نىسانداردىڭ جارتى قۋاتىمەن جۇمىس ىستەۋىنە رۇقسات بەرىلەدى, بىراق كەلۋشىلەر دەنساۋلىق جاعدايى تۋرالى انىقتاما جانە COVID-2019 زەرتحانالىق زەرتتەۋلەردىڭ ناتيجەسىن الىپ كەلۋى شارت, − دەيدى مۇحامعالي ارىسپاەۆ. بىراق جوعارىدا ايتىلعانداي, وقۋشىلاردىڭ جازعى دەمالىس ورتالىقتارى مەن لاگەرلەرى ازىرگە جابىق.
باتىس قازاقستان
