تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە جويۋ باسقارماسىنىڭ مالىمەتىنشە, جەر سىلكىنىسى تۋرالى اقپارات جەرگىلىكتى ۋاقىت بويىنشا ساعات 17:24-تە تىركەلگەن. جەر ءدۇمپۋىنىڭ ەپيتسەنترى كارلى ۋەزىنىڭ اۋماعىندا بولعان. ءزىلزالا ەرزۋرۋم, ترابزون, ەرزيندجان, كارس, باتمان, ديارباقىر, سيرت, ماردين, ەليازىگ جانە مالاتيا پروۆينتسيالارىندا دا سەزىلگەن. جەرگىلىكتى بيلىك وكىلدەرىنىڭ ايتۋىنشا, وقيعا سالدارىنان 18 ادام جاراقات الىپ, 1 ادام كوز جۇمعان.
بينگيول پروۆينتسياسىنىڭ گۋبەرناتورى ەكيندجيدىڭ سوزىنە سۇيەنسەك, كاينارپىنار اۋىلىندا جەر سىلكىنىسى كەزىندە پوليتسيا باسقارماسىنىڭ ەكى باقىلاۋ مۇناراسىنا زاقىم كەلگەن, سالدارىنان قاۋىپسىزدىك قىزمەتىنىڭ ءۇش قىزمەتكەرى جاراقات العان. سونداي-اق قۇرىلىس قالدىقتارىنىڭ ۇيىندىلەرى اراسىنان جەتى ادام شىعارىلعان. ولاردىڭ بىرەۋى ءبىرشاما ۋاقىت وتكەن سوڭ قايتىس بولعان.
سونىمەن قاتار, ەلمالي جانە دينارمەي ەلدى مەكەندەرىندە 10-عا جۋىق ءۇي زاقىمدالىپتى. تۇركيا ىشكى ىستەر مينيسترلىگى وڭىرگە 26 كولىك قۇرالى, 109 ادامنان تۇراتىن دارىگەرلەر مەن قۇتقارۋشىلار توبى جىبەرىلگەنىن حابارلادى. ۆەدومستۆودا قوسىمشا كومەك قاجەت بولعان جاعدايدا, ەكى اسكەري ۇشاق دايىن ەكەنى ايتىلدى.
