ايماقتار • 14 ماۋسىم، 2020

قاراعاندى اكىمى: ءبارى باستىق بولسا، قارا جۇمىستى كىم ىستەيدى؟

557 رەت كورسەتىلدى

ءبىر عانا قاراعاندىنىڭ وزىندە ەكى مىڭنان استام بوس جۇمىس ورىنى بار ەكەن. اسىرەسە، قۇرىلىس سالاسىنا قاجەتتى ەلەكترشىلەر، مونتاجشىلار، قاپتاۋىش ماتەريالدارمەن جۇمىس ىستەيتىن شەبەرلەر جانە قارا جۇمىسشىلار سۇرانىسقا يە كورىنەدى، دەپ حابارلايدى Egemen.kz قالا اكىمى نۇرلان اۋباكىروۆءتىڭ ونلاين رەجءىمىندە وتكەن بريفينگتەگى مالىمدەمەسىنە سىلتەمە جاساي وتىرىپ.

بۇدان بولەك كەنشىلەر استاناسىندا مەديتسينا مەن كەڭسە قىزمەتكەرلەرى ءۇشىن دە بوس جۇمىس ورىندارى بار ەكەن. ال، جۇمىسپەن قامتۋ ورتالىعىنىڭ بازاسىندا ءالى كۇنگە دەيىن 1 281  ادام جۇمىسسىز رەتىندە تىركەلىپ تۇر.

"بىزدە بوس جۇمىس ورىندارى جەتەرلىك، ەڭبەكاقى مولشەرى 85 مىڭ تەڭگەدەن باستالادى. جۇرتتىڭ كوبى بىردەن بىردەن ديرەكتور نەمەسە باس دارىگەر بولعىسى كەلە مە، ايتەۋىر قاراپايىم جۇمىسقا ادام كۇشى جەتىسپەي جاتىر. ءبارى بىردەي باستىق بولسا، قارا جۇمىستى كىم ىستەيدى؟"، دەپ قىنجىلىس ءبىلدىردى قالا اكىمى.

دەگەنمەن، بۇل ماسەلەنى شەشۋ ءۇشىن حالىقتى جۇمىسپەن قامتۋ ورتالىعى نەگىزىندە كادرلاردى ىرىكتەۋ ورتالىعى جۇمىس ىستەيدى. ول جەردە ماماندار ونلاين رەجءىمىندە جۇمىسپەن قامتۋ ماسەلەلەرى بويىنشا ءتۇسىندىرۋ جۇمىستارىن جۇرگىزەدى. "جۇمىسپەن قامتۋدىڭ جول كارتاسى" باعدارلاماسى بويىنشا قوسىمشا بوس جۇمىس ورىندارى اشىلدى. قازىر 2700 جۇمىس ورنى بار. مەردىگەر ۇيىمدارعا جولداردى، ءۇيلەرءدىڭ قاسبەتتەرىن، اباتتاندىرۋ الاڭدارى مەن ويىن الاڭدارىن جوندەۋمەن اينالىساتىن جۇمىسشىلار قاجەت.

بيىل "جۇمىسپەن قامتۋدىڭ جول كارتاسى" باعدارلاماسى اياسىندا قاراعاندىدا اباتتاندىرۋ جۇمىستارىنا 9،6 ملرد تەڭگە ءبولىندى. بۇل قاراجاتقا 421 اۋلا، 46 اۋلاءىشىلىك جولدار جوندەلەدى، 119 تروتۋارعا تاس توسەلىپ، 269 ويىن جانە سپورت الاڭدارى ورناتىلادى. سونداي-اق، بيۋدجەتتىڭ ارقاسىندا 212 كوپقاباتتى ءۇيدىڭ قاسبەتتەرى مەن شاتىرلارى رەتكە كەلتىرىلەدى. ءبىر سوزبەن ايتقاندا، قازىرگى ۋاقىتتا كەنشىلەر استاناسىندا جوندەۋ جانە قۇرىلىس جۇمىستارى ەرەكشە قارقىنمەن جۇرگىزىلىپ جاتىر.

بريفينگ بارىسىندا قالا اكىمى تۇرعىنداردى اياقتالعان جانە الدا بولاتىن جوندەۋ جۇمىستارىنا قۇرمەتپەن جانە جاناشىرلىقپەن قاراۋعا شاقىردى.

"مەن وسى قالادا تۋدىم، وسىندا ءوستىم، سول سەبەپتى قالامىزدىڭ ادەمى بولعانىن، گۇلدەنگەنىن قالايمىن. مەنىڭ ويىمشا، ءبىز قالامىزدا جاسالىپ جاتقان ىستەرگە قاتىسىمىز بارىن ماقتان تۇتۋىمىز كەرەك"، - دەگەن نۇرلان اۋباكىروۆ، ەگەر جوندەلگەن جەرلەردى بۇزىپ جاتقان بىرەۋلەر بولسا، ولار تۋرالى جاسىرماي ايتۋ كەرەكتىگىن ءوتىندى.

"بۇزاقىلاردىڭ كىم ەكەنىن ءبىلۋىمىز كەرەك. قالا ءۇشىن جاسالىپ جاتقان ىستەرگە مۇقيات قاراپ، جاناشىرلىق تانىتۋىمىز كەرەك. مۇنىڭ ءبارى بيۋدجەتتىڭ اقشاسىنا، ءسىزدەر مەن ءبىزدەردىڭ سالىعىمىزعا ىستەلىنىپ جاتقان شاراۋلار"، - دەپ قورىتتى ءسوزىن قالا اكىمى.

سوڭعى جاڭالىقتار

ۇقساس جاڭالىقتار