قر ەڭبەك جانە حالىقتى الەۋمەتتىك قورعاۋ مينيسترلىگى (بۇدان ءارى - ەڭبەكمينى) 12 ماۋسىمدا اتاپ وتىلەتىن دۇنيەجۇزىلىك بالالار ەڭبەگىنە قارسى كۇرەس كۇنى اياسىندا جۇمىس بەرۋشىلەردى بالالاردى جۇمىسقا زاڭسىز تارتۋعا جول بەرمەۋگە شاقىرادى.
بالالار ەڭبەگى – بۇل بالانىڭ دەنساۋلىعىنا قاۋىپ توندىرەتىن نەمەسە ونىڭ ءبىلىم الۋىنا كەدەرگى كەلتىرەتىن نەمەسە دەنساۋلىعىنا, فيزيكالىق, اقىل-وي, رۋحاني, ادامگەرشىلىك جانە الەۋمەتتىك دامۋىنا زيان كەلتىرەتىن جۇمىس.
حالىقارالىق ەڭبەك ۇيىمىنىڭ مالىمەتى بويىنشا الەمدە 218 ميلليون بالا جۇمىس ىستەۋگە ءماجبۇر, ولاردىڭ 73 ميلليونى قاۋىپتى ەڭبەكپەن اينالىسادى.
قازاقستاندا 2020-2022 جىلدارعا ارنالعان بالالار ەڭبەگىنىڭ ەڭ ناشار تۇرلەرىن جويۋ جونىندەگى ءىس-شارالار جوسپارى اياسىندا بالالار ەڭبەگىنىڭ ەڭ ناشار تۇرلەرىن جويۋ ساياساتىن جەتىلدىرۋ, كامەلەتكە تولماعانداردىڭ قۇقىقتارى مەن بوستاندىقتارىن قورعاۋدى قامتاماسىز ەتۋ, بالالار ەڭبەگىنىڭ ەڭ ناشار تۇرلەرىن جويۋ تۋرالى زاڭنامانىڭ ساقتالۋىن تەكسەرۋ جانە ت.ب. بويىنشا جۇمىستار جۇرگىزىلۋدە.
سوڭعى 5 جىل ىشىندە رەسپۋبليكادا تەمەكى جانە ماقتا سالالارىنداعى بالالار ەڭبەگىن جويۋ بويىنشا ءتيىمدى شارالار قابىلداندى, بالالاردىڭ قۇقىعىن قورعاۋ سالاسىندا ءتيىمدى قۇقىقتىق بازا قۇرىلدى.
قازىرگى ۋاقىتتا كامەلەتكە تولماعان بالالاردىڭ ەڭبەگىن پايدالانۋ كوبىنەسە جازعى دەمالىس كەزەڭىندە ورىن الادى. بۇل كەزدە 12 جاستان 18 جاسقا دەيىنگى بالالار شاعىن بيزنەسكە تارتىلادى: بازارلاردا, كولىك جۋ جانە اۆتوكولىك جوندەۋ ستانتسيالارىندا, قوعامدىق تاماقتانۋ ورىندارىندا (مەيرامحانالار, ءدامحانادار) جانە ت.ب. جەرلەردە جۇمىس ىستەيدى. اتالمىش جاعدايلاردا ءجيى كەزدەسەتىن بۇزۋشىلىق - ەڭبەك شارتىنىڭ بولماۋى.
ەلىمىزدە رەسپۋبليكالىق جانە وڭىرلىك دەڭگەيلەردە كەز-كەلگەن بالا نەمەسە ەرەسەك ادام قوڭىراۋ شالىپ, ءوز پروبلەمالارى تۋرالى ايتا الاتىن سەنىم تەلەفوندارى جۇمىس ىستەيدى (بالالار قۇقىعىن قورعاۋ كوميتەتىنىڭ سەنىم تەلەفونى - 74-25-28, ۇلتتىق تەلەفون جەلىسى - 150).
ەڭبەكمينى جۇمىس بەرۋشىلەردى ەڭبەك زاڭناماسىن ساقتاۋعا جانە تىيىم سالىنعان بالالار ەڭبەگىن پايدالانۋعا جول بەرمەۋگە شاقىرادى.
