BBC باسىلىمىنىڭ حابارلاۋىنشا, جانكۇيەرلەر ستاديونعا كىرە المايتىن بولعان سوڭ اعىلشىن فۋتبول كورەرمەندەرىنە 4TheFans كومپانياسى Drive-In Football ۇيىمداستىرىپ, ماتچتاردى لوندون, مانچەستەر, ليۆەرپۋل جانە باسقا دا قالالاردا اۆتوموبيل كينوتەاترىندا كورسەتۋدى جوسپارلاۋدا. قازىرشە ەۋروپادا جانكۇيەرلەرگە ءبىر جەردە توپتاسىپ جينالۋعا بولمايدى. دەسە دە اركىم ويىندى ءوز كولىگىندە وتىرىپ, تاماشالاي الادى.
پاندەمياعا بايلانىستى كارانتين ۋاقىتىندا ەۋروپادا كوڭىل كوتەرەتىن ورىندار ۋاقىتشا جابىلعان سوڭ, اۆتوكينوتەاترلار جاڭبىردان كەيىنگى ساڭىراۋقۇلاقتاي قاپتاپ كەتتى. كولىكتەن تۇسپەي فيلم تاماشالاۋ مۇمكىندىگىن بەرەتىن مۇنداي اۆتوكينوتەاتر وتكەن عاسىردىڭ 50-60-جىلدارى اقش-تا وتە تانىمال بولعان ەدى.
اۆتوكينوتەاتردا ەپيدەميالىق قاۋىپسىزدىك ەرەجەلەرىن ساقتاۋعا تولىق مۇمكىندىك بار. مىسالى, كولىكتەر ءبىر-بىرىنەن 2 مەتر قاشىقتىقتا ورنالاسادى, سەانس ۋاقىتىندا سىرتقا شىعۋعا بولمايدى, كەي جەرلەردە كولىكتە ادام سانى ەكى-ۇشەۋدەن اسپاۋى كەرەك, سۋسىن مەن پوپكورنعا تاپسىرىس بەرۋگە بولادى جانە ونى ماسكا تاعىپ, قولعاپ كيگەن كۋرەر جەتكىزىپ بەرەدى. زاماناۋي اۆتوكينوتەاتردا كولىكتەگى راديوقابىلداعىش ارقىلى اۋديوترانسلياتسيا جاسالادى.
Deutsche Welle مالىمەتىنشە, پاندەمياعا دەيىن گەرمانيادا 20 اۆتوكينوتەاتر بولسا, ناۋرىز-ءساۋىر ايلارىندا تاعى 30-ى اشىلعان. فرانتسيانىڭ بوردو قالاسىندا Drive-In Festival اتتى اۆتوكينوتەاتر اشىلىپ, 24 مامىردان بەرى ەلدىڭ بىرنەشە قالاسىندا تۋرنە ۇيىمداستىردى. كينوفەستيۆال وتكىزۋمەن تانىمال بولعان كانن قالاسىنداعى Palm Beach مەيرامحاناسىنىڭ اۆتوتۇراعىندا ۋاقىتشا اۆتوكينوتەاتر ورنالاستىرىلعان. ماۋسىم ايىنىڭ باسىنان باستاپ مۇنداي كينوتەاتر فرانتسيانىڭ باسقا قالالارىندا دا اشىلدى.
ايتا كەتەيىك, 17 ماۋسىمدا 28-تۋردىڭ كەيىنگە شەگەرىلگەن كەزدەسۋلەرى وتەدى. بۇل باسەكەلەردە «مانچەستەر سيتي» مەن «ارسەنال» جانە «استون ۆيللا» مەن «شەففيلد يۋنايتەد» كلۋبتارى وينايدى. ال 19 ماۋسىمدا 30-تۋر ماتچتارى ۇيىمداستىرىلادى. انگليا چەمپيوناتى ۋاقىتشا توقتاتىلعانعا دەيىنگى جاعداي بويىنشا, قورجىنىندا 82 ۇپايى بار «ليۆەرپۋل» جەكە-دارا كوش باستاپ تۇر. ەكىنشى ورىنداعى «مانچەستەر سيتي» «ليۆەرپۋلدەن» 25 ۇپاي قالىپ كەلەدى. قالالىقتار باستى قارسىلاسىنان ءبىر ويىن كەم وتكىزگەن. ءۇشىنشى ورىندا – «لەستەر» كلۋبى ورنالاسقان. قورجىنىندا 53 ۇپاي بار. سونداي-اق «چەلسي» (48 ۇپاي) مەن «مانچەستەر يۋنايتەد» (45 ۇپاي) ۇزدىك بەستىكتىڭ ساناتىندا. ال كوش سوڭىنداعى ء«نورۆيچتىڭ» نەبارى 21 ۇپايى بار.
تۋرنير كەستەسىنە قاراساڭىز, بيىل «ليۆەرپۋلدىڭ» بايگەنى شاپپاي الىپ, چەمپيون اتاناتىنىنا ەش كۇمان كەلتىرمەيسىز.
