وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ قىزمەتكەرلەرى وڭىردەگى 5 مىڭ شاقىرىمنان استام كولىك جولىن تەكسەرۋ كەزىندە 5 مىڭعا جۋىق اقاۋ تاپقان. وسى ورايدا وڭىردە 70 لاۋازىمدى تۇلعا ساپاسىز جولدار مەن قوزعالىس قاۋىپسىزدىگىن ءتيىستى دەڭگەيدە قامتاماسىز ەتپەگەنى ءۇشىن جاۋاپكەرشىلىككە تارتىلىپ وتىر. ونىڭ ىشىندە جولداردا, تەمىر جول وتكەلدەرىندە جول قۇرىلىستارىن جۇرگىزۋ بويىنشا تالاپتاردى ورىنداماعانى ءۇشىن 60 لاۋازىمدى تۇلعا جانە جولداردىڭ, تەمىر جول وتكەلدەرىنىڭ جانە باسقا دا قۇرىلىستاردىڭ نەمەسە جول قوزعالىسىن رەتتەۋدىڭ تەحنيكالىق قۇرالدارىنىڭ جارامسىزدىعى ءۇشىن 10 جەكە تۇلعا بار.
«جول قوزعالىسى قاۋىپسىزدىگىن قامتاماسىز ەتۋ ماقساتىندا وبلىستىڭ اۆتوموبيل جولدارىندا 5365 شاقىرىم جول قامتىلىپ, ولارعا قاتىستى 787 تەكسەرۋ جۇمىستارى جۇرگىزىلدى. تەكسەرۋ بارىسىندا 4867 اقاۋ انىقتالدى. ونىڭ ىشىندە رەسپۋبليكالىق ماڭىزى بار جولداردا 975 اقاۋ, وبلىستىق ماڭىزى بار جولداردا 536 اقاۋ, اۋداندىق ماڭىزى بار جولداردا 539 جانە ەلدى مەكەندەردىڭ كوشە-جول توراپتارىندا 2802 كەمشىلىك انىقتالدى», دەيدى جامبىل وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى باقىت راتاەۆ. تەكسەرۋ ناتيجەلەرى بويىنشا جول مەكەمەلەرىنىڭ ءتيىستى باسشىلارىنا 787 ۇيعارىم بەرىلىپ, 705 جاۋاپ الىنعان. ونىڭ 400-دەن استامىندا قارجىلاندىرۋدىڭ بولماۋىنان ورىنداۋ مەرزىمى سوزىلىپ جاتقانى ايتىلعان. اۆتوموبيل جولدارىن جوندەۋ جانە كۇتىپ ۇستاۋدا انىقتالعان كەمشىلىكتەر بويىنشا جەرگىلىكتى اتقارۋشى ورگاندارعا 87 اقپارات, وبلىستىق جانە اۋداندىق پروكۋراتۋرا ورگاندارىنا 26 اقپارات جولدانعان.
جامبىل وبلىسى
