ساۋالداماعا بانك سەكتورىنداعى, ساقتاندىرۋ سالاسىنداعى بروكەرلىك قىزمەتتەگى كومپانيالاردىڭ وكىلدەرى قاتىستى. زەرتتەۋ ناتيجەسىندە مىنا ينديكاتورلارعا قاتىستى بولجام ناتيجەلەرى ۇسىنىلدى:
1. Brent ماركالى مۇناي باعاسى;
2. اقش دوللارىنا قاتىستى تەڭگە باعامى;
3. اقش دوللارىنا شاققانداعى رەسەي ءرۋبلىنىڭ باعامى;
4. رەسەي رۋبلىنە شاققانداعى تەڭگە باعامى;
5. ينفلياتسيا;
6. ءىجو;
7. ۇلتتىق بانكتىڭ بازالىق ستاۆكاسى.
سونىمەن, ءبىر ايدا كولەمىندە تەڭگەنىڭ دوللارعا شاققانداعى باعامى 406,4 تەڭگە شاماسىندا بولادى دەپ كۇتىلۋدە. ساۋالداما جۇرگىزىلگەن ۋاقىتتا, ياعني ماۋسىم ايىنىڭ باسىندا KESE-دە 1 دوللارعا شاققانداعى ۇلتتىق ۆاليۋتامىزدىڭ باعامى 398,8-411,6 تەڭگە ارالىعىندا تەربەلىپ تۇردى. ياعني تەڭگەنىڭ الداعى تەربەلىسىنە ساراپشىلار وپتيميستىك بولجام جاساپ وتىرعان جوق دەۋگە بولادى. بۇل, بىرىنشىدەن, ءبىر اي ىشىندە مۇنايدىڭ باررەلى 40 دوللار توڭىرەگىندە ساقتالاتىنىمەن بايلانىستى بولىپ وتىر.
ءبىر ايتا كەتەرلىگى, مامىردا وتكەن ساۋالداما كەزىندە رەسپوندەنتتەردىڭ 14 پايىزى عانا ۇلتتىق ۆاليۋتامىزدىڭ باعامى 3,1 پايىزعا جاقساراتىنىن, ءسويتىپ, دوللارعا شاققاندا 411,55 تەڭگەنى قۇرايتىنىن دۇرىس بولجاعان ەكەن.
نارىق قاتىسۋشىلارى الداعى 12 ايدا بىرقاتار كورسەتكىشتەر جوعارىلايدى دەگەن بولجام جاساپ وتىر. ايتالىق, 1 جىل ىشىندە Brent باررەلى 45,8 دوللارعا كوتەرىلەدى. كارانتين رەجىمدەرىنىڭ بىرتىندەپ جەڭىلدەتىلۋى, وپەك+ كەلىسىمى بويىنشا مۇناي ءوندىرۋ كولەمىنىڭ تومەندەيتىنى شيكىزات نارىعىنداعى جاعدايدىڭ جاقسارۋىنا ىقپال ەتەتىن نەگىزگى فاكتورلار رەتىندە نازارعا الىنىپ وتىر.
ال حالىقارالىق شيكىزات نارىعىنداعى جاعدايدىڭ وڭالعانى قازاقستاننىڭ تەڭگەسى مەن رەسەي ءرۋبلىنىڭ اقش دوللارىنا قاتىستى باعامىنىڭ نىعايۋىنا وڭ ىقپالىن تيگىزەدى. كەلەسى جىلدىڭ ماۋسىم ايىنا دەيىن كورشى ەلدىڭ ۆاليۋتاسىنا قاتىستى ۇلتتىق ۆاليۋتامىزدىڭ باعامى 5,82 تەڭگە شاماسىندا بولۋعا ءتيىس.
ساراپشىلار ءىجو-ءنىڭ وسىمىنە بايلانىستى بولجامى وتكەن ايداعى ساۋالداما ناتيجەسىمەن سالىستىرعاندا جاقسارعانىن ايتا كەتكەن ءجون. مامىر ايىندا رەسپوندەنتتەر 1 جىل ىشىندە ءىجو بار بولعانى 0,6 پايىزعا وسەتىنىن ايتقان بولاتىن. بۇل جولى ءوسىم كورسەتكىشى 0,8 پايىزعا دەيىن كوتەرىلەدى دەپ وتىر.
ءبىر جىل كولەمىندە ينفلياتسيا 7,5 پايىزدى قۇرايدى. بۇل بولجام مامىر ايىندا بولجانعان مەجەدەن ءسال تومەندەۋ بولعانىمەن, ءبارىبىر ۇلتتىق بانك ايقىنداعان ماقساتتى ينفلياتسيا دالىزىنەن اسىپ كەتەدى. ۇلتتىق بانك 4-6 پايىزدىق ءدالىزدى جوسپارلاعان بولاتىن.
رەسپوندەنتتەردىڭ كوپشىلىگى, ياعني 56 پايىزى جىل سوڭىنا دەيىن ۇلتتىق بانك بازالىق مولشەرلەمەنى 9 پايىزعا دەيىن تومەندەتەدى دەپ كۇتىپ وتىر. اپتا باسىندا ۇلتتىق بانك جىلدىق مولشەرلەمە 9,5 پايىز دەڭگەيىندە ساقتالاتىنىن حابارلاعان بولاتىن.
قارجىگەرلەر قاۋىمداستىعىنىڭ اي سايىنعى ساۋالداماسىنا قازاقستاننىڭ حالىق بانكى, سبەربانك, Fortebank, بانك تسەنتر كرەديت, اتفبانك, ەۋرازيالىق بانك, قازاقستاننىڭ تۇرعىن ءۇي قۇرىلىس جيناق بانكى, نۇربانك سىندى ەكىنشى دەڭگەيلى قارجى ينستيتۋتتارىنىڭ ساراپشىلارى, قازاقستاننىڭ دەنساۋلىق ساقتاۋ جانە مەديتسينالىق ساقتاندىرۋ كورپوراتسياسى, ەۋروپالىق ساقتاندىرۋ كومپانياسى سىندى كومپانيالاردىڭ وكىلدەرى قاتىسقانىن ايتا كەتەيىك.
