1992 جىلى تۋعان پاتسيەنت كارديولوگتىڭ ەسەبىندە تۇرماعان, اۋىراتىندىعى تۋرالى دا بىلمەگەن. ءوز دەرتىن العاش رەت 2020 جىلعى مامىردا جۇكتىلىك كەزىندە ەحوكارديوگرافيا جاسالىپ, سول جاق جۇرەكشەدەن سول جاق قارىنشاعا اۋىسقان "الىپ" ميكسوما انىقتالعاندا عانا بىلگەن.
كارديولوگيا جانە ىشكى اۋرۋلار عزي جاساندى قاناينالىم زەرتحاناسى جانە وپەراتسيا بلوگى بار كارديوحيرۋرگيا بولىمشەسىنىڭ مەڭگەرۋشىسى رۇستەم تولەۋتاەۆ كونسۋلتاتسيا بەرگەندە ومىرلىك كورسەتكىشتەرى بويىنشا كەسار تىلىگىن جاساۋ ارقىلى مەرزىمىنەن بۇرىن جەدەل بوساندىرىپ, ءارى قاراي وپەراتيۆتىك ەمدەۋ ۇسىنىلدى. بوسانعاننان كەيىن پاتسيەنت كارديولوگيا جانە ىشكى اۋرۋلار ينستيتۋتىنا جەدەل ەمدەۋگە جىبەرىلدى.
كىا عزي باسقارما ءتورايىمى روزا قۋانىشبەكوۆا مەن قۇرامىنا كلينيكانىڭ جەتەكشى ماماندارى كىرەتىن "HEART Team" كومانداسى ومىرلىك كورسەتكىشتەرى بويىنشا سول جاق جۇرەكشە ميكسوماسىن الىپ تاستاۋ ماقساتىندا وپەراتيۆتىك ەمدەۋدى جاساۋدى ۇسىندى.
ميترالدىق قاقپاقشا مەن وكپە تامىرلارىنىڭ الىپ ميكسومامەن, ەمبولوگەندىك اسقىنۋلارمەن بىتەلۋ قاۋپىنەن باسقا, ترومبوەمبوليا جانە كەسار تىلىگىنەن كەيىنگى قان كەتۋ قاۋپى بولعان. ۇلكەن كولەمدەگى (6,5ح6,0سم) ميكسومانىڭ ادەتتەن تىس ورنالاسۋى وتا بارىسىن كۇردەلەندىرىپ جىبەردى, الايدا كارديوحيرۋرگيالىق وپەراتسيا جاساۋ بريگاداسىنىڭ شەبەرلىگىمەن تاجىريبەسى ارقاسىندا وپەراتسيا ءساتتى اياقتالدى.
بۇگىنگى تاڭدا پاتسيەنتتىڭ جاي-كۇيى تۇراقتى, ونى ستاتسيوناردان شىعارۋ جوسپارلانىپ وتىر.
جۇرەكتىڭ بارلىق العاشقى (جۇرەك تىندەرىنەن تۋىندايتىن) ىسىكتەرىنىڭ جارتىسى ميكسومالارعا جاتادى. بارلىق ميكسومالاردىڭ تورتتەن ءۇش بولىگى وكپەدەن وتتەگىمەن قانىققان قاندى قابىلدايتىن جۇرەك كامەراسىندا, سول جاق جۇرەكشەدە ءورشيدى. ميكسومالار نەگىزىنەن 40 جاستان 60 جاسقا دەيىنگى ايەلدەردە داميدى. ميكسومانىڭ كەيبىر سيرەك كەزدەسەتىن تۇرلەرى وتباسىلىق سيپاتتا بولادى.
بۇل اۋرۋ پاتسيەنتتىڭ ومىرىنە قاۋىپ توندىرەدى, سەبەبى ميكسومانىڭ كىشكەنە كەسەگى نەمەسە ونىڭ بەتىندە جينالاتىن ۇيىندى قان ءبولىنىپ كەتىپ (ەمبوليا), قان اعىمىمەن باسقا اعزالارعا جىلجىپ, سول جەردە ورنالاسقان ارتەريالاردى بىتەۋى مۇمكىن.
