بۇل جۇمىس "قىزىلوردا وبلىسىندا ارال تەڭىزىنىڭ قۇرعاپ قالعان تابانىنىڭ فيتو-ورمان مەليوراتسياسى" جوباسى اياسىندا ىسكە اسىپ, كورەيا ورمان قىزمەتى تاراپىنان 1,7 من دوللار كولەمىندە قارجىلاندىرىلدى.
ارال تەڭىزىنىڭ قۇرعاۋىنان 6 ملن گەكتاردان استام جەر بۇرىنعى سۋ القابىنان بوساپ قالدى. جىل سايىن تەڭىزدىڭ قۇرعاپ قالعان تابانىنان اۋاعا 100 ملن توننادان اسا تۇز, شاڭ مەن قۇم كوتەرىلۋدە. كليماتتىق جاعدايدىڭ وزگەرۋى سالدارىنان, جەل ارقىلى تاراپ جاتقان قۇم مەن تۇز قورشاعان ورتاعا زيانىن كەلتىرۋدە.
وسىعان وراي, 1980 جىلدان باستاپ قازاقستاندىق ورمانشىلار ارال تەڭىزىنىڭ قۇرعاپ قالعان تابانىنا سەكسەۋىل اعاشتارىن وتىرعىزۋ جۇمىستارى ارقىلى قۇم مەن تۇزدى داۋىلداردى توقتاتۋدا.
ارال تەڭىزىنىڭ قۇرعاپ قالعان تابانىنا ورمان ەگۋ جۇمىستارى كەشەندى تۇردە جۇرگىزىلۋدە. جىل سايىن قىزىلوردا وبلىسىنىڭ ورمان شارۋاشىلىقتارى 10 مىڭ گا اۋداندا سەكسەۋىل وتىرعىزۋدا, ونىڭ ىشىندە 6 500 گا ارال تەڭىزىنىڭ قۇرعاپ قالعان تابانىنا.
كورەيا ۋنيۆەرسيتەتىنىڭ ماماندارى جوبانى عىلىمي قولداۋ بارىسىندا ارال تەڭىزىنىڭ قۇرعاپ قالعان تابانىنا ەگىلگەن جاساندى ەكپەلەردىڭ توپىراقتىڭ قۇرامىنا ەرەكشە اسەر ەتكەنى جايلى بىرەگەي زەرتتەۋلەردى جۇرگىزدى.
قازاقستاندا سەكسەۋىل القاپتارى ورمان قۇرايتىن اعاش تۇرلەرىنىڭ بارلىق اۋدانىنىڭ 65 پايىزىن قۇراپ, 6 ملن 132,4 مىڭ گا اۋداندا رەسپۋبليكانىڭ ورمان قورىنىڭ جارتىسىن الىپ جاتىر (49%). ءبىر سەكسەۋىل اعاشىنىڭ تامىرى 4 تونناعا جۋىق قۇمدى ۇستاپ تۇرۋعا قابىلەتتى.
قازالى ورمان تۇقىمباعىندا سەكسەۋىل ەكپەلەرىن سەبۋدەن ەگۋگە كوشۋ بويىنشا ارال تەڭىزىنىڭ قۇرعاپ قالعان تابانىنداعى ورمان مەليوراتسيا جۇمىستارى ءۇشىن سەكسەۋىل كوشەتتەرى ءوسىرىلىپ, دايىندالادى. پيتومنيكتىڭ اۋدانى 32 گا, جىلىنا 4 ملن-نان اسا سەكسەۋىل كوشەتتەرىن ءوسىرىپ شىعارا الادى.
قر ەگترم ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىمەن سەكسەۋىل ورماندارىن ساقتاۋ ءۇشىن 2023 جىلدىڭ 31 جەلتوقسانىنا دەيىن سەكسەۋىل ورماندارىندا اعاش كەسۋدىڭ بارلىق تۇرىنە جانە رەسپۋبليكانىڭ بارلىق ساۋدا ورىندارىندا سەكسەۋىلدى ساتۋعا تىيىم سالىندى.
ورتالىق ازيادا سەكسەۋىل ورماندارىى ەڭ كوپ قازاقستاننىڭ شولدەرىندە ورنالاسقان. وسى ەرەكشە اعاش ءتۇرىنىڭ پايدا بولۋى ەلىمىزدەن باستاۋ الادى.
قازاق ورمان قىزمەتىنىڭ ءادىسى شولەيتتەنۋگە قارسى كۇرەستە الەمدەگى ەڭ ءتيىمدىسى بولىپ تابىلادى.
1980 جىلدان باستاپ 2020 جىلعا دەيىن ارال تەڭىزىنىڭ قۇرعاپ قالعان تابانىنا 190 مىڭ گا اسا سەكسەۋىل ورمانى وتىرعىزىلدى.
