ناۋقاسقا تىرشىلىك ءنارىن سىيلاپ, كوڭىلىنەن كۇدىكتى ارىلتىپ, كوزىنە ءۇمىت وتىن جاعاتىن, قايعىسىن ازايتىپ, قۋانىشىن ارتتىراتىن دا وسى ابزال جاندار. دارىگەرلەردىڭ دامىلسىز جۇمىسىن, ناۋقاستىڭ ءومىرىن ساقتاپ قالۋ جولىنداعى ولشەۋسىز ەڭبەگىن ءبىر كىسىدەي بىلەمىن دەسەم, ارتىق ايتقاندىق بولماس. وعان سەبەپ, ومىرلىك سەرىگىم, مارقۇم تولەۋحان تۇرىسبەك ۇلى دا وسى سالادا جوعارى ساناتتى حيرۋرگ-دارىگەر بولىپ, قىرىق جىلعا جۋىق ابىرويلى قىزمەت ەتتى. جولداسىم ءار سىرقاتتىڭ سىرىن ۇعىنىپ, جانىنا تەرەڭ ءۇڭىلىپ, جىلى ءسوزىن اياماي, مەيلىنشە مەيىرىمىن توگە ءبىلدى. ماماندىعىنا دەگەن ماحابباتىنىڭ, ادامدارعا دەگەن اق ادالدىعىنىڭ ارقاسىندا ءوز ورتاسىندا سىيلى, بەدەلدى بولدى.
الەم جۇرتشىلىعىن الەككە سالىپ, شارتاراپتى شارپىعان كوروناۆيرۋس ىندەتى ءبىزدىڭ ەلىمىزدى دە سىرت اينالىپ وتكەن جوق. اسپاناستى ەلىنەن باستاۋ العان اۋرۋ ازۋىن ايعا بىلەگەن اقش, يتاليا, يسپانيا, يران, رەسەي سەكىلدى مەديتسيناسى مىقتى دەگەن ەلدەردىڭ ءوزىن ەسەڭگىرەتىپ, سارساڭعا سالدى. ءبىر مەزەتتە جۇزدەگەن, مىڭداعان ادام مايىتكە اينالدى. ەل باسىنا كۇن تۋعان ەلەڭ-الاڭ شاقتا ەتىگىمەن سۋ كەشكەندەر, ياعني مەديتسينا ماماندارى مەن ءتارتىپ ساقشىلارى جاعدايدى قالىپتا ۇستاۋ ءۇشىن قىزمەتتەرىن قالتقىسىز اتقارىپ جاتقاندىقتارىن ايرىقشا اتاپ وتكەنىمىز ءجون. ءتۇن بالاسى كىرپىك قاقپاي, ىندەتپەن الىسىپ, جانىن سالا جۇمىس جاساعاندىقتىڭ ناتيجەسى بولار, ادام شىعىنى ازايىپ, اۋرۋدان ايىققاندار سانى ارتۋدا. ەلىمىزدە اتى جامان اۋرۋدىڭ الدىن الىپ, قاۋىپسىزدىك شارالارىن قاتاڭ ساقتاۋ ماقساتىندا كارانتين ەنگىزىلىپ, كوپتەگەن مەكەمە جۇمىسىن توقتاتتى. بايىپپەن باعامداپ, باتىل قادامدار جاسايتىن باسشىمىز قاسىم-جومارت كەمەل ۇلى توقاەۆ تابىسىنان ايىرىلعان جاندارعا تومەنگى جالاقى مولشەرىندە الەۋمەتتىك كومەك تاعايىندادى جانە جۇمىس جۇيەلى ءجۇرىپ جاتىر. مۇنى پرەزيدەنتىمىزدىڭ قيىن-قىستاۋ شاقتا قاناتىمەن سۋ سەپكەن قارلىعاشتاي حالىققا كورسەتكەن زور قولداۋى ءارى قامقورلىعى دەپ بىلەمىن. سونداي-اق مىندەتتەرىن مۇلتىكسىز ورىنداپ جاتقان مەديتسينا قىزمەتكەرلەرىنە مەملەكەت تاراپىنان سىياقى رەتىندە قوماقتى سوما ءبولىندى. بۇل دا بولسا, باسىن قاتەرگە تىككەن بۇگىنگى كۇن باتىرلارىنىڭ باعالانعانى, ماڭداي تەر مەن ەرەن ەڭبەكتىڭ ەلەنگەنى ەمەس پە؟! شىبىن جانىن شۇبەرەككە تۇيگەن ءاربىر ادامنىڭ اماندىعى ءۇشىن اجالمەن الىسىپ, وتباسىنان جىراقتاپ, ەمحانانى ەكىنشى ءۇيى ەتكەن اق حالاتتىلارىمىزدى قالاي ارداقتاساق تا از بولار...
«ب ۇلىڭعىر كۇننىڭ ارتىنان بۇلتتى تۇرە كۇن شىعار» دەگەندەي, كەلەر كۇندەردەن كۇتەر ءۇمىتىمىز مول. ءبىر جاعادان باس, ءبىر جەڭنەن قول شىعارىپ, بىرلىگىمىزدى بەكەم ەتسەك, ەلىمىز ەڭسەنى ەزگەن ىندەتتى ەڭسەرىپ, كوپتەن كوكسەگەن كوڭىلدى كەزدەرىمىزبەن قايتا قاۋىشارىمىز حاق.
18 ماۋسىم – ەلىمىزدەگى دەنساۋلىق ساقتاۋ سالاسى ماماندارىنىڭ ءتول مەرەكەسى. وسىنداي سىندارلى ساتتەردە سىر بىلدىرمەي, ۇنجىرعالارىن تۇسىرمەي, ۇلتىمىزدىڭ تاعدىرىنا ۇقىپتىلىقپەن قاراپ, ۇستامدىلىق تانىتا ۇلى مۇراتتاردى ورىنداپ جۇرگەن ەل دارىگەرلەرىن مەرەيلى مەرەكەلەرىمەن شىن جۇرەكتەن قۇتتىقتايمىن. ماڭدايالدى ماقتانىشتارىمىزعا مىقتى دەنساۋلىق, تەمىردەي ءتوزىم, جۇمىستارىنا تەلەگەي تابىس تىلەي وتىرىپ, قالىڭ ەلى قازاعىنىڭ ىستىق ىقىلاسى مەن شەكسىز ريزاشىلىعىنا بولەنسىن دەگەن نيەتپەن ءوزىمنىڭ انالىق العىسىمدى بىلدىرەمىن.
عاليا بەرتىسقانوۆا,
ەڭبەك ارداگەرى
