سارىسۋ اۋدانى, جاڭاتاس قالاسىنىڭ تۇرعىنى, كوپبالالى انا ايسۇلۋ تۇرسىنباەۆا دا بۇگىندە مەملەكەت قولداۋىنىڭ ناتيجەسىندە ءوز كاسىبىن باستاپ وتىر. قارجىلاي قولداۋدىڭ يگىلىگىن كورگەن كەلىنشەك اسىل تۇقىمدى زاينەن ەشكىلەرىن ساتىپ العان. سول ارقىلى بۇگىندە بالالارىنىڭ ناپاقاسىن تاۋىپ كەلەدى. كاسىپ باستاپ, تىرلىگىن تىكتەپ وتىرعان كەلىنشەكتىڭ بۇل باستاماسى قولداۋعا تۇرارلىق.
«مەملەكەتتىڭ قولداۋىنىڭ ناتيجەسىندە 500 مىڭ تەڭگە كولەمىندە گرانتتى يەلەنىپ, وعان جامبىل اۋدانىنىڭ اسا اۋىلىنان اسىل تۇقىمدى 4 باس ەشكى ساتىپ الدىم. كۇنىنە ەكى مەزگىل ساۋىپ, 10 ليتر ءسۇت الامىن. ءسۇتى ەم بولعان سوڭ تۇرعىندار دا ءجيى تاپسىرىس بەرەدى. العان 4 ەشكى دە قازىر تولدەدى. الداعى ۋاقىتتا مال باسىن كوبەيتىپ, كاسىبىمدى ءارى قاراي دامىتسام با دەگەن ويىم بار», دەيدى كوپبالالى انا. نەگىزىنەن ەشكى مالى جىلدام كوبەيىپ, ەرتە اياقتانىپ كەتەتىن ءارى كۇي تالعامايتىن جانۋاردىڭ ءبىرى. ەشكى مالى ەرتەدەن-اق قازاق تۇرمىسىندا ەرەكشە باعالانعان. سونىمەن قاتار ەشكى ءسۇتىنىڭ ەمدىك قاسيەتى جونىندە دە ءجيى ايتىلادى. مالىمەتتەرگە سۇيەنسەك, شۆەيتساريا مەملەكەتىندە تۋبەركۋلەز, قانازدىق, راحيت, بۋىن, تەرى اۋرۋلارىن اۋەل باستان ەشكى سۇتىمەن ەمدەگەن بولسا, اقش سەكىلدى ءىرى مەملەكەتتەردە ەشكى ءسۇتىن جاڭا تۋعان نارەستەلەرگە بەرۋ ءۇشىن ارنايى دايىندايدى ەكەن. سونىمەن قاتار ەشكى باعىپ, ودان جاقسى تابىس تاۋىپ وتىرعان ەلدەردىڭ دە قاتارى كوپ. «ەشكى شارۋاشىلىعىنىڭ ارقاسىندا بالالارىمدى اسىراپ وتىرمىن. ءارى ەشكى ءسۇتى بالالاردىڭ دەنساۋلىعىنا دا پايدالى. كاسىپ باستاعىسى كەلگەن اۋىل تۇرعىندارى ءۇشىن بارلىق مۇمكىندىكتى قاراستىرعان پرەزيدەنتىمىزگە العىس ايتامىن. سونداي-اق وبلىس, اۋدان باسشىلارىنا دا راحمەت», دەيدى ايسۇلۋ تۇرسىنباەۆا.
جامبىل وبلىسى
