بۇرىنعىمەن سالىستىرعاندا ەلىمىزدە قازىر بۇل باعىتتا ءبىراز باستاما بار. ماسەلەگە مەملەكەت باسشىسى ايرىقشا ءمان بەرىپ, براكونەرلىكپەن جانە ورماندى زاڭسىز وتاۋمەن كۇرەس جۇرگىزۋدى باقىلاۋ كۇشەيە ءتۇستى.
وبلىس اكىمدىگىنىڭ باستاماسىمەن ارال تەڭىزى اكۆاتورياسىنداعى جالاڭاش كولىن سۋعا تولتىرۋ ماسەلەسىنىڭ قاراستىرىلۋىن ءبىزدىڭ وڭىردەگى ۇلكەن ءىستىڭ بىرىنە جاتقىزار ەدىم. ونى ءتىپتى ءوز قارجىسىنا جاساۋعا نيەتتى جەرگىلىكتى كاسىپكەرلەر دە بار. بۇل جوبا ىسكە اسسا, بىرىنشىدەن تولىپ كەتۋىنە بايلانىستى قاۋىپ ءتونىپ تۇرعان كوكارال بوگەتىنە قىسىم ازايادى, ەكىنشىدەن ۇلى تەڭىز ۇلتانىنا كەتىپ جاتقان تەڭىز سۋى ۇلكەن ويپاتقا تولادى.
كوگالداندىرۋ, قورشاعان ورتانى قورعاۋ, تابيعاتتى لاستاماۋ مەملەكەتتىڭ عانا مىندەتى ەمەس ەكەنىن ەستەن شىعارماعان ءجون. بۇل ارقايسىمىزدىڭ اۋلامىزدان, كوشەمىزدەن باستالۋى كەرەك. وسى باعىتتاعى ناقتى ءىس پەن ناسيحاتتان كەيىن كوگالداندىرۋعا ءمان بەرە باستاعاندار قاتارى كوبەيگەنى قۋانتادى. اۋلاسىن, اۋىلىن كوركەيتىپ جاتقان تۇرعىنداردان ۇلگى الىپ جاتقاندار دا از ەمەس.
بيىلعى تاعى ءبىر جاڭالىق – وبلىس ورتالىعىندا ارىق جۇيەسىن جاڭارتىپ, پاركتەر مەن اللەيالارعا, كوشەلەرگە اياق سۋ جەتكىزۋ قولعا الىندى. تابيعات جاناشىرلارىنىڭ ءۇمىتىن وياتقان وسى باستامانىڭ اياقسىز قالمايتىنىنا سەنەمىز. باسقا اۋداندار دا وسى ۇلگىنى ۇردىسكە اينالدىرسا دەگەن تىلەگىمىز دە جوق ەمەس.
قازىر قىزىلوردا بۇرىنعىدان كوپ وزگەردى. كوشە تازالىعىنا ءمان بەرىلىپ, ۇدايى نازاردا بولىپ كەلەدى. ەندى سول تازالىقتىڭ ساقتالۋى تۇرعىنداردىڭ جاۋاپكەرشىلىگىنە تىكەلەي بايلانىستى.
جۇرتتى تابيعاتقا جاناشىرلىق تانىتۋعا باۋلۋ ءۇشىن كوپ قارجى قاجەت ەمەس, تەك نيەت بولسا بولدى. مىسالى, ازاماتتاردىڭ قولداۋىمەن ەكى كوشەنىڭ تۇرعىندارىن وسى ىسكە جۇمىلدىردىق. وسى كۇنى العاشقى كوشەدەگى ارىق تازالانىپ, اياق سۋ بەرىلدى. كاسىپكەرلەر دە ۇلكەن ىسكە ۇلەس قوسىپ, ن.نازارباەۆ داڭعىلى بويىنداعى مەشىت اۋلاسىنا سۋ قۇبىرىن جۇرگىزۋگە كومەك بەردى. قازىر ول اۋماق سايالى اللەياعا اينالدى. وسىنىڭ ءبارى – كوپتىڭ جۇمىلۋىمەن بىتكەن جۇمىس. تابيعاتقا جاناشىر جانداردىڭ قوزعالىسى باستالدى, ونىڭ ناتيجەسى دە كوپ كۇتتىرمەيتىنى انىق.
بولات نۇرحوجاەۆ,
وڭىرلىك ەكو-امباسسادور
قىزىلوردا وبلىسى
