ايماقتار • 10 ماۋسىم، 2020

جامبىل وبلىسىندا بىرنەشە اۋىلعا اۋىز سۋ مەن گاز جەتەدى

236 رەت كورسەتىلدى

بۇگىندە جامبىل وبلىسىنىڭ تۇرعىندارىن اۋىزسۋ جانە گازبەن قامتۋ وزەكتى ماسەلەلەردىڭ ءبىرى. اتالعان ماسەلەگە وراي، وبلىستىق اكىمدىكتە جيىن ءوتىپ، اۋىز سۋ جانە گاز تارتۋ ماسەلەلەرى تالقىلاندى، دەپ حابارلايدى Egemen.kz

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆتىڭ ايتۋىنشا، بۇگىنگى تاڭدا وبلىس ەلدىمەكەندەرىنىڭ 57،8 پايىزى ورتالىقتاندىرىلعان سۋمەن قامتىلعان. سونىمەن قاتار، 2023 جىلى ءوڭىر تۇرعىندارىن تولىقتاي اۋىزسۋمەن قامتاماسىز ەتۋ جوسپارلانعان. اعىمداعى جىلى وڭىردە 17،4 ميلليارد تەڭگەگە 50 سۋمەن جابدىقتاۋ نىسانىنىڭ قۇرىلىسى جۇرگىزىلۋدە. جىل سوڭىنا دەيىن 34 نىسان پايدالانۋعا بەرىلەدى دەپ كۇتىلۋدە. ءتيىستى قارجى "وڭىرلەردى دامىتۋ" جانە "جۇمىسپەن قامتۋدىڭ جول كارتاسى" مەملەكەتتىك باعدارلامالارى اياسىندا قاراستىرىلعان. سونىمەن قاتار، سۋمەن جابدىقتاۋ نىساندارىنىڭ باسىم بولىگى جۋالى، بايزاق، ت.رىسقۇلوۆ جانە جامبىل اۋداندارىندا سالىناتىن بولادى. سونداي-اق، 2021-2023 جىلدارى 84 ەلدىمەكەنگە جۇزدەگەن شاقىرىم سۋ قۇبىرى تارتىلىپ، ناتيجەسىندە وبلىستىڭ بارلىق تۇرعىندارى تولىقتاي تازا اۋىز سۋعا قول جەتكىزەدى. بۇل ورايدا جامبىل وبلىسىنىڭ اكىمى بەردىبەك ساپارباەۆ جوسپار-كەستەدە بەلگىلەنگەن مەرزىمنەن قالىس قالماۋ ءۇشىن تاراز قالاسى مەن مەركى، شۋ جانە قورداي اۋداندارىنىڭ اكىمدەرىنە مەردىگەرلەرمەن ماسەلەلەردى شەشىپ، جوبالىق-سمەتالىق قۇجاتتاردى ۋاقىتىلى دايىنداۋدى تاپسىردى.

بۇگىنگى تاڭدا اۋىلداردى گازداندىرۋعا وبلىستىق جانە رەسپۋبليكالىق بيۋدجەتتەن، سونىڭ ىشىندە "جۇمىسپەن قامتۋدىڭ جول كارتاسى" اياسىندا ءتيىستى قاراجات قاراستىرىلۋدا. ناتيجەسىندە بارلىعى 84 اۋىل گازداندىرىلاتىن بولادى. سونىمەن قاتار، بيىل 30 اۋىل كوگىلدىر وتىنمەن قامتىلادى. بۇگىنگى تاڭدا وبلىستاعى 377 ەلدى مەكەننىڭ 192-سىنە تابيعي گاز قۇبىرى تارتىلعان. بۇل 51 پايىزدى قۇرايدى.

"ەلىمىزدىڭ بارلىق تۇرعىندارىنىڭ تازا اۋىز سۋعا قولجەتىمدىلىگىن قامتاماسىز ەتۋ جانە گازداندىرۋدى جۇرگىزۋ ماڭىزدى باسىمدىقتار بولىپ تابىلادى. بۇل باعىتتاعى كورسەتكىشتەر جامان ەمەس. ەندىگى مىندەت – جۇمىس قارقىنىن تومەندەتۋگە اكەلەتىن ولقىلىقتارعا جول بەرمەۋ كەرەك. جاۋاپتى ورىندار بارلىق ۇيلەردىڭ گاز قۇبىرى مەن سۋ جۇيەسىنە قوسىلۋىن قامتاماسىز ەتۋى ءتيىس"، دەدى بەردىبەك ساپارباەۆ.

سونىمەن قاتار، ول ينجەنەرلىك ينفراقۇرىلىم جۇيەلى تۇردە دامۋى قاجەتتىگىن، تۇرعىندار جولدار رەتكە كەلتىرىلگەننەن كەيىن جەراستى ينجەنەرلىك جەلىلەرىن جوندەۋ ءۇشىن كوپ ۋاقىت وتپەي قايتا قازىلىپ، بۇزىلاتىنىنا ءجيى شاعىمدانىپ وتىرعانىن، سوندىقتان دا بارلىق جۇمىستار قاتار اتقارىلۋى كەرەك ەكەنىن اتاپ ءوتتى.

 

جامبىل وبلىسى

سوڭعى جاڭالىقتار

ۇقساس جاڭالىقتار