الايدا تۇپقاراعان اۋدانىندا بولعان توسىن جايت تۇرعىنداردى توسىلتىپ ءارى تاڭىرقاتىپ قويدى.
تەڭىزگە دەمالۋعا بارعان بەس ادامدى – ۇلكەنى 1999 جىلى تۋعان جىگىت پەن ەڭ كىشىسى 2013 جىلى تۋعان بالالاردى يتبالىقتار تىستەپ العان.
تۇپقاراعان اۋداندىق اۋرۋحاناسىنىڭ قابىلداۋ بولىمىنە ەكى بالانى جەدەل مەديتسينالىق جاردەم بريگاداسى جەتكىزسە, قالعان ۇشەۋى وزدەرى بارىپ دارىگەرلەرگە قارالادى. دارىگەرلەر بالالاردا سول بىلەك پەن وڭ جاق بىلەكتىڭ تىستەۋىن انىقتادى. كىشكەنتاي ناۋقاستارعا العاشقى حيرۋرگيالىق وڭدەۋلەر مەن قۇتىرماعا قارسى ۆاكتسينا ەگىلگەن, ودان كەيىن ولار ۇيلەرىنە قايتارىلعان. اۋرۋحاناعا جاتقىزۋ قاجەتتىلىگى بولماعان.
الداعى ۋاقىتتا مەديتسينالىق كومەكتىڭ قاجەتتىلىگى بولسا, مەكەنجايى بويىنشا جالپى تاجىريبەلىك دارىگەردى ۇيگە شاقىرتىپ, ءارى قاراي ەم-دوم شارالارىن الادى. ال مەديتسينا قىزمەتكەرلەرى وقيعاعا وراي سۋعا شومىلۋ ماۋسىمى كەزىندە ساقتىق شارالارىنا كوبىرەك كوڭىل بولۋگە شاقىرۋدا.
يتبالىق – مومىن سيپاتتى جانۋار. كونەكوزدەر دە, ەكولوگ ماماندار دا ولاردىڭ ادامعا شابۋىلداۋىن بۇرىن-سوڭدى ەستىمەگەندىكتەرىن ايتادى.
– يتبالىقتار ادامعا تيىسپەيدى, كەرىسىنشە الىستان كورگەن ساتتە قاشادى. دەگەنمەن بالا كەزىمدە ۇلكەندەر «تەڭىزگە ادام بار جەردەن تۇسىڭدەر, ايتپەسە يتبالىق تىستەپ الادى» دەيتىن. بيولوگ مامان رەتىندە ايتارىم – يتبالىقتار ادامعا ەكى جاعدايدا شابۋىل جاساۋى مۇمكىن. ءبىرىنشىسى – قورقۋ سەزىمى ءالى قالىپتاسپاعان جاس يتبالىقتار ويناۋ ماقساتىندا تىستەۋى مۇمكىن, ەكىنشىسى – قۇتىرما سياقتى اۋرۋعا شالدىققان جانۋارلار بولۋى مۇمكىن, ال ولاردا قورقۋ سەزىمى مۇلدە بولمايتىنى تۇسىنىكتى. سوندىقتان تەڭىزگە تۇسكەندە يتبالىق كورسەڭىز ۇيالى تەلەفونعا سۋرەتكە ءتۇسىرۋ سىندى قىزىعۋشىلىقپەن وعان جاقىنداۋعا بولمايدى, تەزىرەك جاعاعا شىعىپ, الىستان باقىلاپ, قىزىقتاعان ءجون. ەگەر تىستەپ العان جاعدايدا دەر كەزىندە دارىگەرلىك قىزمەتكە جۇگىنگەن ابزال. سونداي-اق يتبالىقتاردى اشتىقتان شابۋىلدادى دەۋگە كەلمەيدى, سەبەبى ولار سۋداعى بالىقتارمەن قورەكتەنەدى, – دەيدى ەكو-امباسسادور, «تابيعي ورتا» باتىس قازاقستان ۇكىمەتتىك ەمەس ۇيىمدارى وڭىرلىك اسسوتسياتسياسىنىڭ كەڭەس توراعاسى ادىلبەك قوزىباقوۆ ماسەلەگە وراي پىكىرلەسكەنىمىزدە.
قاقاعان قىستا – اقپان ايىندا سارىشايان شاققان ماڭعىستاۋلىقتار ەندى يتبالىقتاردىڭ ادامعا شابۋىلداۋىن تۇسىنە الماي وتىر...
ماڭعىستاۋ وبلىسى
