پيرەنەي تۇبەگىندە وتەتىن ايتۋلى جارىستا جەرلەستەرىمىزگە قارسىلاس اتانعان قوس كوماندا اراسىنداعى قاۋىپتىسى – كانادا. قازىرگى كەزدە ۇيەڭكى جاپىراقتار ەلىنىڭ ءتورت بىردەي ورەنى «توپ-100» تەننيسشىنىڭ قاتارىندا. سولاردىڭ اراسىندا ەڭ ۇزدىگى – دەنيس شاپوۆالوۆ. يزرايلدە تۋىپ-وسكەن ول بالاۋسا شاعىندا اكە-شەشەسىمەن بىرگە كاناداعا قونىس اۋداردى. بۇل كۇندەرى الەمنىڭ 16 راكەتكاسى اتانىپ وتىرعان شاپوۆالوۆتىڭ ەڭ ۇزدىك كورسەتكىشى – 2017 جىلى اقش-تىڭ اشىق بىرىنشىلىگىنىڭ ءتورتىنشى جانە 2019 جىلى اۋستراليانىڭ اشىق بىرىنشىلىگىنىڭ ءۇشىنشى كەزەڭىنە دەيىن جەتۋى.
19 جاستاعى فەليكس الياسسيم وگە ءوزىنىڭ وتانداسى دەنيس شاپوۆالوۆتان نەبارى ءتورت ساتى تومەن تۇر. 19 جاستاعى مونرەال قالاسىنىڭ تۋماسى بىلتىر ۋيمبلدون ءتۋرنيرىنىڭ ءۇشىنشى اينالىمىندا ونەر كورسەتتى. باسقا دا حالىقارالىق دودالاردا ءوزىن جاقسى قىرىنان كورسەتۋدە.
بۇگىنگى تاڭدا اتر رەيتينگىندە 30 ورىندا تۇرعان 29 جاستاعى ميلوش راونيچ جايىندا ۇزاق اڭگىمەلەۋگە بولادى. كەزىندە ول ۋيمبلدوننىڭ اقتىق سىنىندا, اۋستراليانىڭ اشىق بىرىنشىلىگىنىڭ جارتىلاي فينالىندا جانە رولان گارروستىڭ شيرەك فينالىندا كۇش سىناستى. اقش-تىڭ اشىق بىرىنشىلىگىندە ءتورت مارتە ءتورتىنشى كەزەڭگە دەيىن جەتتى. اتر دودالارىندا سەگىز رەت جەڭىمپاز اتاندى. وسى تابىسىنىڭ ارقاسىندا راونيچ 2016 جىلدىڭ كۇزىندە الەمنىڭ ءۇشىنشى راكەتكاسى اتاندى.
ۆەشەك پوسپيشيل ميلوش راونيچپەن تۇيدەي قۇرداس. ايگىلى جەرلەسىنىڭ جەتكەن دەڭگەيىنە قول جەتكىزە الماعانىمەن, ونىڭ دا ەسىمى جانكۇيەرلەرگە جاقسى تانىس. ۆەرنون قالاسىنىڭ تۋماسى كەزىندە الەمدىك رەيتينگتە 25 ورىنعا دەيىن كوتەرىلگەن. ۋيمبلدوننىڭ شيرەك فينالىنا جولداما الدى. ءدال سول جارىستى جۇپتىق سايىستا ۇتتى. قازىرگى كەزدە پوسپيشيل ۇزدىكتەر تىزىمىندە 93 ورىندى قاناعات تۇتۋدا.
دەۆيس كۋبوگىندا كانادا قۇراماسى سوناۋ 1913 جىلدان بەرى ونەر كورسەتىپ كەلەدى. الەمدىك توپتا توعىز رەت باق سىناپ, بىلتىرعى جارىستىڭ فينالىندا كۇش سىناسۋ قۇرمەتىنە يە بولدى. ايتۋلى دودانىڭ شيرەك فينالىندا اۋستراليا جانە جارتىلاي فينالدا رەسەي تەننيسشىلەرىن ۇتقان ولار شەشۋشى تۇستا ازۋى التى قارىس يسپانياعا جول بەردى.
1925 جىلدان بەرى دەۆيس كۋبوگىندا كۇش سىناسىپ جۇرگەن شۆەتسيا قۇراماسىنىڭ كەزىندە ورەلى ونەرىمەن تورتكۇل دۇنيەنىڭ تامساندىرعانى ەسىمىزدە. قۇرامىندا ايگىلى بورن بورگتەي مارقاسقاسى بار سكانديناۆيا تۇبەگىنىڭ تۇلەكتەرى 1975 جىلى العاش رەت باس جۇلدەنى ولجالادى. ال شۆەدتەردىڭ سەكسەنىنشى جىلدارداعى قارقىنى, تىپتەن كەرەمەت بولدى. اتاپ ايتساق, 1983-1989 جىلدار ارالىعىندا قاتارىنان جەتى مارتە فينالدا ونەر كورسەتۋ قۇقىعىنا يە بولدى. ناتيجەسىندە, ءۇش تۋرنيردە (1984, 1985, 1987) توپ جارسا, ءتورت رەت (1983, 1986, 1988, 1989) اقتىق سايىستا ۇتىلدى. سول كوماندانىڭ ساپىندا ماتس ۆيلاندەر, ستەفان ەدبەرگ, يواكيم نيۋسترەم, حانس سيمونسون, يان گۋنارسسون جانە اندەرس پەر يارريد سىندى ساڭلاقتاردىڭ جاسىنداي جارقىلداعانى دا جانكۇيەرلەردىڭ جادىندا.
توقسانىنشى جىلدار دا شۆەد تەننيسشىلەرى ءۇشىن تولاعاي تابىسقا تولى بولدى. ولار 1994, 1997, 1999 جىلدارى دەۆيس كۋبوگىن توبەگە كوتەرسە, 1996 جىلى فينالدا ەسە جىبەردى. بارلىعى – جەتى باس جۇلدە جانە بەس فينال. اتالعان جارىستا تابىسى جاعىنان شۆەتسيا قۇراماسى ءتورتىنشى ورىندا تۇر. ولاردىڭ الدىنا اقش, اۋستراليا, فرانتسيا جانە ۇلىبريتانيا عانا تۇسە العان ەكەن.
جاڭا عاسىر تابالدىرىقتان اتتاعاننان كەيىن سكانديناۆيالىقتاردىڭ قارقىنى باسەڭدەپ قالدى. سوڭعى رەت ولار الەمدىك توپتا 2012 جىلى ونەر كورسەتتى. سول جارىستىڭ 1/8 فينالىندا سەربياعا جول بەردى. سودان كەيىن ءبىراز ۋاقىت بويى مىقتىلار ساناتىنا قوسىلا الماي ءجۇردى. تەك بيىلعى جارىستا قايتا باعى جانىپ, كوزدەگەن ماقساتىنا قول جەتكىزدى.
بۇگىنگى تاڭدا شۆەتسيانىڭ تەك ءبىر عانا وكىلى «توپ-100» تەننيسشىنىڭ قاتارىندا. ول – ميكاەل يمەر. 21 جاستاعى ويىنشىنىڭ اتا-اناسى ەفيوپيالىق ەميگرانتتار. ميكاەلدىڭ ءوزى ستوكگولمدە دۇنيەگە كەلدى. كەزىندە ول جاسوسپىرىمدەر اراسىنداعى ۋيمبلدون ءتۋرنيرىنىڭ فينالىندا ويناعان. ەرەسەكتەر دۋىنداعى ەڭ جاقسى ناتيجەسى – 2019 جىلعى رولان گارروس جانە 2020 جىلعى اۋستراليانىڭ اشىق بىرىنشىلىگىنىڭ ەكىنشى كەزەڭىنە جولداما الۋ. اتر رەيتينگىندە يمەر 68 ورىندى يەلەنۋدە.
ميكاەلدىڭ تۋعان اعاسى – 23 جاستاعى ەلياس يمەر ۇزدىكتەر تىزىمىندە 209 ورىندى ەنشىلەۋدە. ال وزگە ويىنشىلاردىڭ رەيتينگتەرى تىپتەن تومەن. ماسەلەن, بۇل كۇندەرى ءتۇرلى جارىستاردا شۆەتسيانىڭ نامىسىن قورعاپ جۇرگەن ماركۋس ەريكسسون اتر تىزىمىندە 316 ساتىعا جايعاسسا, كريستيان ليندەلل 324 ورىندى قاناعات تۇتۋدا.
مىنە, ۇستىمىزدەگى جىلدىڭ كۇزىندە يسپانيانىڭ استاناسى – مادريدتە وتەتىن دەۆيس كۋبوگى جولىنداعى جارىستا قازاقستاننىڭ تەننيسشىلەرىنە قارسىلاس اتانعان كانادا مەن شۆەتسيا قۇرامالارى جايىندا قىسقاشا مالىمەت وسىنداي.
جۋىردا عانا نيدەرلاند قۇراماسىن ۇتىپ, مىقتىلارمەن كۇش سىناسۋ قۇرمەتىنە يە بولعان قازاقستاننىڭ تەننيسشىلەرى ۆ توبىنا ءتۇستى. جەرلەستەرىمىز شۆەتسيا جانە كانادانىڭ ويىنشىلارىمەن شەبەرلىك بايقاسادى. ال وزگە توپتاردا مىنا كوماندالار ونەر كورسەتەدى:
ا توبى: يسپانيا, رەسەي, ەكۆادور;
س توبى: فرانتسيا, ۇلىبريتانيا, چەحيا;
D توبى: حورۆاتيا, اۋستراليا, ماجارستان;
ە توبى: اقش, يتاليا, كولۋمبيا;
F توبى: سەربيا, گەرمانيا, اۋستريا.
دەۆيس كۋبوگىنىڭ فينالدىق كەزەڭى ۇستىمىزدەگى جىلدىڭ 23-29 قاراشاسى ارالىعىندا يسپانيانىڭ باس شاھارى – مادريدتە وتەدى.
