الدىمەن اقپاراتتاردىڭ دامۋ تاريحىنا قىسقاشا توقتالايىق. العاشقى اقپاراتتار ىممەن, سوسىن اۋىزشا تاراعانى بەلگىلى. وسى تۇستا كوپتەگەن اقپاراتتاردىڭ تارالۋ اۋقىمى مەن عۇمىرى قىسقا بولدى دا, سولاردىڭ ەڭ ماڭىزدىلارى مەن اسەرى مولى عانا حالىق جادىندا ساقتالىپ, بۇگىنگى كۇنگە دەيىن جەتتى. سونداي حالىق جادىندا ساقتالعان وقيعالاردىڭ ءبىرى قازاقتىڭ اتاقتى بايى ساعىنايعا ەرەيمەن باۋىرىندا اس بەرىلۋى بولدى. ەگەر تالداپ كورەتىن بولساق, بۇل استىڭ حالىق جادىندا ساقتالۋىنا ەكى-ءۇش فاكتوردىڭ اسەر ەتكەندىگىن بايقايمىز. ءبىرىنشىسى, استىڭ اۋقىمدىلىعى, قازاقتىڭ ءۇش جۇزىنەن ادامداردىڭ شاقىرىلۋى. ەكىنشىسى, اتاقتى اقان سەرىنىڭ قۇلاگەرى قاستاندىقپەن ءولتىرىلۋى. ءۇشىنشىسى, قازاقتىڭ ءدۇلدۇل اقىنى ءىلياس جانسۇگىروۆتىڭ وسى وقيعاعا ورايلاس «قۇلاگەر» پوەماسىن جازعانى.
وسىنداي كەسەك فاكتورلاردىڭ ارقاسىندا عانا ساعىنايدىڭ اسى تۋرالى دەرەكتەر بۇگىنگى كۇنگە دەيىن جەتتى. سونىڭ وزىندە, وتكەنىنە ءالى تولىق ءبىر جارىم عاسىر بولماسا دا, اس تۋرالى اڭگىمەلەردىڭ اڭىزدىق سيپاتى مول. ادەتتە اۋىزشا تارايتىن اقپاراتتاردىڭ كوبى حاتقا تۇسپەي قالعاندىقتان راس-وتىرىگى بەلگىسىز اڭىزعا اينالىپ كەتەتىنى ءمالىم.
ال ەندى وسىعان كەرىسىنشە, ءبىزدىڭ تاريحىمىزداعى بۇدان 1300 جىل بۇرىن تاسقا قاشالىپ جازىلعان ورحون جازبا ەسكەرتكىشتەرى سول زامانداعى تۇركى ءداۋىرى تۋرالى بىزگە ءبىرشاما ايقىن اقپارات بەرەدى. مىنە, وسى كۇلتەگىن ءداۋىرى مەن ساعىنايدىڭ اسى ارالىعىنداعى مىڭ جىلدان استام ۋاقىتتا قۇندىلىعى كەرەمەت قانشاما ميلليونداعان اۋىزشا اقپارات تاسقا تۇسپەي قالعاندىقتان عانا بىزگە جەتە الماي ۇمىتىلدى دەسەڭىزشى. ۇمىتىلاتىن سەبەبى, اۋىزشا اقپاراتتاردىڭ ءارحيۆى بولعان جوق. تاريحىمىز باسقالاردىڭ قولىمەن, باسقاشا كوزقاراس نەگىزىندە جازىلۋىنا دا مىنە, وسىنداي ولقىلىقتىڭ تۇرتكى بولعانى انىق.
جازبا ونەرى دامىماعان حالىقتىڭ تاريحي جادى قاشاندا مىقتى بولادى. مۇنداي حالىقتار ۇلكەن تاريحي داستانداردى تۋدىرادى جانە ونى جادىندا ساقتايدى. بىراق ءبارىبىر جازۋ ونەرى دامىپ, كىتاپتار شىعارعان حالىقتار عانا تاريحقا تورەشىلىك ەتەتىندىگىن كورىپ وتىرمىز. ارينە بۇل باسقا اڭگىمە.
وتكەن عاسىردان باستاپ ومىرگە كينو, تەلەگراف, راديو مەن تەلەديدار ارالاستى. ولار اقپاراتتاردىڭ اۋقىمدىلىعى مەن تۇرلەنۋىن تۋدىردى. اقپاراتتىڭ اقيقاتتىعىن ارتتىردى. دەرەكتەر بازاسىن مولىقتىردى. ءبىلىم قورى جيناقتالدى. بىراق وسىنىڭ بارلىعىنىڭ ءتىلى ادام ءتىلى بولدى. ەندى ءبىز اقپاراتتاردىڭ جاڭا تەحنولوگيالار تىلىندە, ياعني تسيفرلى تىلدە دە سويلەي باستاعانىن كورىپ وتىرمىز.
ماسەلەن, ادام دەنساۋلىعىن تەكسەرەتىن مەديتسينالىق قۇرال-جابدىقتاردى الايىقشى. ولاردىڭ كوبى ادام تىلىندە سويلەمەيدى, بىراق ءسىزدىڭ دەنساۋلىعىڭىز تۋرالى ناقتى اقپارات بەرە الادى. سول سەكىلدى اۆتوكولىكتەردىڭ, تۇرمىستىق تەحنيكالاردىڭ, كوپتەگەن اۆتوماتتاندىرىلعان ونەركاسىپتىك جۇيەلەردىڭ ءتىلىن دە ماماندار بارىنشا جەدەل, ءتىپتى سويلەۋ مەن وقۋدان دا تەز ۇعادى. سوعان ساي جىلدام ارەكەت ەتەدى. بۇل تۇسىنگەن جان ءۇشىن عاجايىپ دۇنيە. ال قازىرگى اقپاراتتىق تەحنولوگيالار مەن تسيفرلى تەحنولوگيالاردىڭ دامۋى بۇل عاجايىپتاردىڭ ارعى جاعىندا دا نەشە ءتۇرلى ادام سەنبەس عاجايىپتاردىڭ تۋىندايتىندىعىن بايقاتىپ وتىر.
ماسەلەن, ءسىز قازىر ءوزىڭىزدى ءبارىن بىلەمىن دەپ ويلايسىز. الايدا باسقانى بىلاي قويىپ, ءسىز ءالى ءوزىڭىزدى ءوزىڭىز جاقسى بىلە بەرمەيسىز. ويتكەنى اعزاڭىزدىڭ قالاي جۇمىس ىستەپ تۇرعاندىعىن دا انىق بىلمەيسىز. قانداي اۋا جۇتىپ تۇرعانىڭىزدى ارى كەتكەندە جاي شامالاۋعا عانا مۇمكىندىگىڭىز بار. وزىڭىزگە كۇنىنە قانداي جىلدامدىقپەن قانشا شاقىرىم ءجۇرۋ كەرەك ەكەندىگىن دە ناقتى انىقتاي قويعان جوق شىعارسىز. جالپى, ءسىز ءوزىڭىزدىڭ دەنساۋلىعىڭىزدىڭ نەگە قابىلەتتى ەكەندىگىن, ءوز بويىڭىزدا قانداي قابىلەتتىڭ بۇعىپ جاتقاندىعىن ناقتى بىلمەيسىز.
ال اقپاراتتىق تەحنولوگيالار وسىنىڭ ءبارىن مۇمكىن ەتتى. ماسەلەن, قازىرگى سمارت ساعاتتار ارقىلى ءوز جۇرەگىڭىز بەن قان تامىرىڭىزدىڭ سوعىسىن كەز كەلگەن ۋاقىتتا بىلۋگە مۇمكىندىگىڭىز بار. اقپاراتتاردىڭ جاڭا فورمالارىنىڭ پايدا بولۋى – شىن مانىندە عاجايىپ دۇنيە.
