– پىشان جالمەندە ۇلىنىڭ ەسىمى قازاقتىڭ اقان سەرى, ەستاي, ۇكىلى ىبىراي, ءبىرجان سال سياقتى ەركىن ويلى ونەر دۇلدىلدەرىنىڭ قاتارىندا اتالادى. ءوزى ورىسشا ءبىلىم العان ساۋاتتى, جۇيرىك ۇستاپ, قۇس سالعان ساياتشى, ءدىلمار شەشەن ءارى قارا قىلدى قاقا جارعان ءادىل بولعان ادام. اكەسى جالمەندە بولىستىڭ جولىمەن ەل باسقارىپ, اۋىل اراسىنداعى تەكتەكتى تيىپ, تەكتىنى قولداپ وتىرعان ەكەن. پىشان سياقتى پاراساتتى قازاقتار قىزىل كوممۋنيستەردىڭ قۇرىعىنا بىردەن ىلىنگەن عوي. 1921 جىلى سەرىنى دۇشپاندارىنىڭ سىرتتاي كورسەتۋىمەن قاماۋعا الادى دا, سوتتىڭ اقتاۋ ۇكىمى شىققانىنا قاراماستان اتىپ تاستاعان. مارقۇمنىڭ سۇيەگى تالدىقورعاننىڭ ىرگەسىندەگى "شايقورعان" بەيىتىندە جاتىر, - دەيدى پىشان جالمەندە ۇلىنىڭ تىكەلەي ۇرپاعى, اقىن, وبلىستىق "جەتىسۋ" گازەتىنىڭ باس رەداكتورى امىرە ءارىن.
پىشان سەرىنىڭ سوڭىندا سارا ءسوز, اۋەندى ءان قالدى. اقىننىڭ اتاقتى "جالمەندەنى بالاسى پىشان ەدىم..." اتتى ءانى دە قازىر حالىق مۋزىكاسىنا قوسىلعان سۇبەلى ۇلەس قاتارىندا ۇرپاق قۇلاعىندا جاڭعىرىپ كەلەدى. سۇيىنەرلىگى, پىشاننىڭ زامان كەيپىن سۋرەتتەگەن 24 شۋماق ولەڭى جەتىسۋ ولكەسىنەن جارىق كورگەن "كەدەي ەركى" گازەتىنە باسىلعان ەكەن. بۇل 1922 جىلى بولعان, سەرى اتىلىپ كەتكەننەن كەيىنگى جاعداي. پىشان مۇراسىن العاشقى بولىپ جيناقتاپ, ولەڭدەرىن باسپاعا ۇسىنعان ونىڭ زامانداسى, ءوزى دە بولىس بولعان كەنجەباي ساعىناي ۇلى ەكەن.
ايتپاقشى, پىشان جالمەندە ۇلىنىڭ الاقان تابى تيگەن تاسبيح تابىلدى. تاسبيحتى پىشاننىڭ زامانداسى, اقىن اتىلعاننان كەيىن ونىڭ جوقتاۋشىسىنا اينالعان كەنجەباي بولىستىڭ بايبىشەسى ساقتاپ كەلىپتى. كۇلاندا اجەي سەرىدەن قالعان جادىگەردى ۇزاق جىل جۇرت كوزىنە تۇسىرمەي ساقتاپ, دۇنيەدەن وتەر شاعىندا ءوز ۇرپاعى ساعىمباي ىسقاق ۇلى اقساقالعا تابىستاپتى. قازىر پىشان سەرىنىڭ تاسبيىعى تالدىقورعاندا تۇراتىن وسى كىسىنىڭ اۋلەتىندە قۇندى مۇرا قاتارىندا تۇر.
