ەڭ ءبىرىنشى ايالداعان نىسان قالاداعى №2 مۋزىكا مەكتەبى بولدى. قابىرعاسى 1948 جىلى قالانعان ءبىلىم ورداسىندا كۇردەلى جوندەۋ دەگەن ءومىرى جۇرگىزىلمەگەن ەكەن. بۇل تۋراسىندا اتالعان مەكتەپتىڭ ديرەكتورى مارات ءماجيتوۆ ايتىپ بەردى.
– مەكتەپتە سوڭعى رەت اعىمداعى جوندەۋ 29 جىل بۇرىن جاسالعان. جىلدا بولىنەتىن قارجى مايدا-شۇيدە جۇمىستارعا عانا جەتۋشى ەدى. قازىر كۇردەلى جوندەۋ باستالدى. ءبارىن دە جاڭاسىنا اۋىستىرامىز. ەندى بىزدە جاڭا جىلۋ جانە ەلەكتر جۇيەسى, سانتەحنيكا بولادى. ءبىز ءۇشىن بۇل – ۇلكەن قۋانىش. جازعى دەمالىستان سوڭ بالالاردى جاڭارتىلعان مەكتەپ كۇتىپ الاتىن بولادى, – دەيدى مەكتەپ باسشىسى قۋانىشىن جاسىرا الماي.
وقۋشىلارىنىڭ سانى 650 بالا بولاتىن بۇل مەكتەپتىڭ جوندەۋىنە بيۋدجەتتەن 78 ملن تەڭگە بولىنگەن.
بۇدان كەيىن وبلىس باسشىسى مايقۇدىق ەلدى مەكەنىندەگى №13 مەكتەپكە ات باسىن تىرەدى. 34 جىل بۇرىن سالىنعان مەكتەپتە كۇردەلى جوندەۋ ءبىرىنشى رەت جۇرگىزىلىپ جاتىر. عيماراتتىڭ شاتىرى اۋىستىرىلىپ, قاسبەتى جاڭارتىلادى. جاڭا تەرەزەلەر, جىلۋ جۇيەسى ورناتىلىپ, ەلەكتر مونتاجداۋ جۇمىستارى جۇرگىزىلەدى. سونداي-اق, مەكتەپ اۋماعى كوركەيتىلىپ, جاڭا شارباقپەن قورشالماق.
– مەكتەپ – قالاداعى بەلگىلى نىسانداردىڭ ءبىرى. جوندەۋ جۇمىسىنا قوماقتى قارجى ءبولىندى. ءبارىن دە بالالار ءۇشىن جاساپ جاتىرسىزدار, سوندىقتان جۇمىستىڭ ساپاسىن مۇقيات قاداعالاڭىزدار. سىزدەرگە ۇلكەن جاۋاپكەرشىلىك ارتىلىپ وتىر. جۇمىس بىتكەن سوڭ, ءوزىم تەكسەرەتىن بولامىن, – دەدى ج.قاسىمبەك جوندەۋ جۇمىستارىمەن اينالىسىپ جاتقان قۇرىلىس كومپانياسىنىڭ باسشىسىنا قاراتا.
جالپى, قاراعاندى قالاسىندا بارلىعى 133 ءبىلىم بەرۋ نىسانى بار. بيىل بارىنە دە جوندەۋ جۇرگىزىلەدى. ونىڭ ىشىندە 29 مەكتەپتە كۇردەلى جوندەۋ, ال 41 ءبىلىم وشاعىندا اعىمداعى جوندەۋ جۇمىستارى قولعا الىنادى. سونىمەن قاتار 95 مەكتەپتىڭ اۋلالارى اباتتاندىرىلادى.
قاراعاندى قالالىق ءبىلىم ءبولىمىنىڭ باسشىسى گۇلسىم قوجاحمەتوۆا بۇرىن مەكتەپ اۋلالارىن اباتتاندىرۋعا اقشا بولىنبەگەنىن جانە ءبىلىم مەكەمەلەرىنىڭ اۋماقتارىن ديرەكتورلار كەشەگە دەيىن ءوز كۇشتەرىمەن رەتتەپ كەلگەندەرىن ايتتى. ال كۇردەلى جوندەۋدەن جىل سايىن ەكى مەكتەپتى وتكىزۋگە عانا مۇمكىندىك بولعان.
– بيىل جوندەۋ جۇمىستارىنا مول قاراجات بولىنگەنىنە قۋانىشتىمىز. ەندى بارلىق نىساندى تولىقتاي رەتكە كەلتىرۋگە مۇمكىندىك تۋدى, – دەيدى ول.
وبلىس باسشىسى مەكتەپتەر مەن بالاباقشالاردان باسقا مايقۇدىقتاعى مادەنيەت ۇيىندە, «نۇربي» اۋلا كلۋبىندا جانە «ليتەيششيك» ستاديونىندا بولىپ, ونداعى جوندەۋ جۇمىستارىنىڭ قالاي اتقارىلىپ جاتقانىن تەكسەردى. قازىر جۇرتتىڭ سالاماتتى ءومىر سالتىنا دەگەن كوزقاراسى وزگەرگەن. سول سەبەپتى دە اتالعان سپورت نىسانى جەرگىلىكتى تۇرعىنداردىڭ ءجىتى نازارىندا. جەرگىلىكتى حالىقتىڭ ءوتىنىشىن جەرگە تاستاماعان وبلىس اكىمىنىڭ تاپسىرماسىنان كەيىن, قارجىلاندىرۋ كوزى تابىلىپ, قازىر اتالعان ستاديوندا جوندەۋ جۇمىستارى ءجۇرىپ جاتىر. جوندەۋ جۇرگىزىپ جاتقان «دورسترويترەست» جشس ديرەكتورىنىڭ قۇرىلىس جونىندەگى ورىنباسارى ماكسيم ۆوروبەۆ جۇمىستىڭ تامىز ايىندا اياقتالاتىنىن مالىمدەدى. ستاديوندا جاساندى كوگال الاڭى, جۇگىرۋ جولدارى, قورشاۋ, جارىقتاندىرۋ تىرەكتەرى, كيىم شەشەتىن ورىندار, دارەتحانا, اكىمشىلىك جانە كۇزەت بلوكتارى بولادى.
ج.قاسىمبەك مايقۇدىقتاعى اۋلالاردى اباتتاندىرۋعا, ول جەرلەردە سپورتتىق نىسانداردىڭ بولعانىنا ايرىقشا نازار اۋدارىلاتىنىن اتاپ ءوتتى. ءوڭىر باسشىسى سول جەردە وكتيابر اۋدانىنىڭ اكىمى مەيرام كوجۋحوۆقا 150 مىڭعا جۋىق حالىق تۇراتىن مايقۇدىق ەلدى مەكەنىندە تاعى دا ون جاڭا فۋتبول الاڭىن سالۋدى تاپسىردى. سونداي-اق مەردىگەر كومپانيا وكىلىنە ستاديونداعى جوندەۋ جۇمىستارىن ۋاقىتىندا جانە ساپالى ەتىپ ءبىتىرۋ كەرەگىن ەسكەرتتى.
جۇمىس ساپارىنىڭ سوڭىندا وبلىس اكىمى «جۇمىسپەن قامتۋدىڭ جول كارتاسى» باعدارلاماسىن جۇزەگە اسىرۋدىڭ ماڭىزى مەن جاۋاپكەرشىلىگىن تاعى ءبىر مارتە ەسكە سالدى. «بارلىق جۇمىس كەستەدەگى مەرزىمنەن اۋىتقىماۋى كەرەك. جەرگىلىكتى اكىمدەر جۇمىس ساپاسىن ۇدايى باقىلاپ وتىرۋى ءتيىس», دەپ قورىتتى ج.قاسىمبەك.
قاراعاندى
