قيىندىقتان شىعار جول – بالامالى ەنەرگيا كوزىن ءوندىرۋ. بۇل تالاس تۋدىرمايتىن اقيقات. بۇگىندە ەلىمىزدە العاشقى قادامدار جاسالىپ, وڭ شارۋالار قولعا الىنۋدا. ماسەلەن, ارشالى اۋدانىنىڭ قوستومار اۋىلىندا ورتالىق ازياداعى ەڭ ءىرى جەل ەلەكتر ستانساسىنىڭ قۇرىلىسى ءجۇرىپ جاتىر. سارىارقانىڭ سايىن دالاسىندا ۇزدىكسىز سوعىپ تۇراتىن سامال جەلدىڭ قۋاتىمەن وندىرىلگەن ەنەرگيا 10 مىڭنان استام شاڭىراقتى تولىق قامتۋعا جەتەدى ەكەن.
وسى باعىتتاعى وڭدى جوبالاردى جۇزەگە اسىرۋ ءۇشىن قازاقستاننىڭ دامۋ بانكى قارجىلىق وپەراتور رەتىندە قولداۋ كورسەتۋدە. بانكتىڭ نەسيەلەندىرۋىمەن «Gryeen Energy» كومپانياسى ۇزاق مەرزىمگە نەسيە الىپ, جەل ەلەكتر ستانساسىن سالۋعا قاجەتتى وسى زامانعى قۇرال-جابدىقتاردى جەتكىزىپ, قۇرىلىس جۇمىستارىن جۇرگىزۋدە. مۇنداي ستانسالاردىڭ جەل قۋاتىن ەلەكتر ەنەرگياسىنا اينالدىراتىنىن اركىم دە بىلەدى. ال قورشاعان ورتانى تازا ۇستاۋعا سەپتىگىن شە؟ ماسەلەن, جىلۋ ەلەكتر ستانسالارىمەن سالىستىرعاندا, تيىمدىلىگى الدەقايدا ارتىق. نىسان قولدانىسقا ەنگىزىلگەن سوڭ جىل سايىن اتموسفەراداعى زياندى گازداردىڭ كولەمىن 230 مىڭ تونناعا دەيىن تومەندەتەدى. ەڭ باستى ايىرماشىلىعى وسى.
– بۇگىنگى تاڭدا ەكىنشى كەشەندە قۇرىلىس-مونتاج جۇمىستارى جۇرگىزىلۋدە. ونىڭ ارقايسىسىنىڭ قۋاتى 3,3 مۆت بولادى, – دەيدى سەرىكتەستىكتىڭ باس ينجەنەرى ۆلاديسلاۆ گاربوۆسكي, – 15 جەل ەلەكتر ستانساسى سالىنادى. قازىر 10 كيلوۆاتتىق ستانسا سالۋلى تۇر. وعان قوسا, قويما, گاراج, ديسپەتچەرلىك باسقارۋ ءپۋلتى ءتارىزدى نىسانداردىڭ قۇرىلىسى تولىق اياقتالدى. وندىرىلگەن ەلەكتر ەنەرگياسى «KEGOC» اكتسيونەرلىك قوعامىنىڭ ەلەكتر جەلىلەرى ارقىلى ەلىمىزدىڭ بارلىق اۋماعىنا تاراتىلادى.
نەسىن ايتاسىز, ارزان, ونىڭ ۇستىنە ءتول تابيعاتىمىزعا ەشبىر زالال كەلتىرمەيتىن يگىلىك. توتەننەن كەلگەن پاندەميا عانا قول بايلاپ تۇر. اۋەل باستاعى جوسپار بويىنشا ەندىگى ءبىتىپ تە قالادى ەكەن. توتەنشە جاعداي جاريالانىپ, قۇرىلىس جۇمىسىندا كەدەرگى بولعان سوڭ ۋادەلى مەرزىمنەن التى اي كەشىگىپ بارىپ ىسكە قوسىلۋى ابدەن مۇمكىن. جاڭا نىساننىڭ قانشالىقتى ءتيىمدى ەكەنىن جوعارىدا ءبىر اۋىز سوزبەن ايتتىق. وعان قوسا ەلدەگى اتموسفەراعا ۋلى گازداردىڭ ءبولىنۋىن بارىنشا ازايتۋ جونىندەگى حالىقارالىق قاۋىمداستىق الدىنداعى مىندەتتەمەنى ورىنداۋعا دا سەبەپشى. ءارى تولىق قۋاتىنا كوشكەن كەزدە شامامەن جىلىنا 2 ملرد تەڭگە كولەمىندە سالىق تولەيدى.
قازىر 20 شاقىرىمعا جۋىق جول قۇرىلىسى جۇرگىزىلگەن. جەل تۋربينالارىنا ارنالعان 15 تاعان تارتىلىپتى. بۇل جۇمىستىڭ بارلىعى جەلدى ايماقتا جۇزەگە اسىرىلۋدا. قۇرىلىس جۇمىسىنا 300-دەن استام ادام قاتىسسا, كەيىن جيىرماعا جۋىق مامان قىزمەت اتقاراتىن بولادى. بار قۋاتى 50 مۆت-تى نىساننىڭ ءبىرىنشى كەزەڭى وتكەن جىلدىڭ تامىز ايىندا قولدانىسقا ەنگىزىلگەن.
اقمولا وبلىسى
