ءدال قازىر قىزىلوردا وبلىسى تۇرعىندارىنا 2423 دارىگەر, 9528 ورتا بۋىندى مامان مەديتسينالىق قىزمەت كورسەتەدى. سالا جەتەكشىلەرى بۇل ازدىق ەتەتىنىن ايتادى. مىسالى, 2018 جىلدىڭ 1 قاڭتارىنداعى مالىمەت بويىنشا 205, كەلەسى جىلى ءدال وسى مەرزىمدە 137 دارىگەر جەتىسپەگەن. ال 2020 جىلدىڭ 1 قاڭتارىندا مامان تاپشىلىعى 162-گە جەتىپ وتىر.
سالا باسشىلىعى بۇرىن ەلدى مەكەندەردە ءجيى كەزدەسەتىن مامان جەتىسپەۋشىلىگى پروبلەماسى سوڭعى جىلدارى وبلىس ورتالىعىنداعى كوپسالالى مامانداندىرىلعان مەديتسينا ۇيىمدارىندا بايقالىپ وتىرعانىن ايتادى. قازىر تاپشى دارىگەرلەردىڭ 42,5 پايىزى وسى ۇيىمدارعا تيەسىلى. ماماندىقتار بويىنشا جىكتەگەندە ايماققا 47 ايماقتىق دارىگەر, 26 انەستەزيولوگ-رەانيماتولوگ, 8 نەوناتولوگ, 8 پسيحياتر, 5 فتيزياتر, 5 بالالار حيرۋرگى جەتىسپەي تۇر.
– وبلىس اكىمىنىڭ قولداۋىمەن وڭىردە ماماندار تاپشىلىعىن ازايتۋ ماقساتىندا ءبىرشاما باستاما بار. الەۋمەتتىك قولداۋ شارالارىن جۇزەگە اسىرۋ بويىنشا دا ءبىزدىڭ ايماقتىڭ رەسپۋبليكادا الدىڭعى قاتاردا ەكەندىگىن اتاپ وتكەن ءجون. جەرگىلىكتى ءماسليحات شەشىمىمەن بەكىتىلگەن «الەۋمەتتىك كومەك كورسەتۋ, مولشەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىنىڭ تىزبەسىن ايقىنداۋ» قاعيدالارىنا وزگەرىستەر ەنگىزىلىپ, 2016 جىلدان باستاپ, مەديتسينا ماماندىقتارى بويىنشا 62 رەزيدەنت دايارلاۋ ءۇشىن وبلىس اكىمىنىڭ گرانتى ءبولىندى. قازىر ولار 8 جوعارى مەديتسينالىق ءبىلىم بەرۋ ورىندارىندا وقۋلارىن جالعاستىرۋدا. وسى جىلى ولاردىڭ 15-ءسى وقۋىن ءبىتىرىپ كەلەدى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆ.
بۇدان بولەك, اقتوبە مەملەكەتتىك مەديتسينا ۋنيۆەرسيتەتىندە 2018 جىلى – 30, بىلتىر 40 جالپى تاجىريبەلىك دارىگەردى دايارلاۋعا وبلىستىق بيۋدجەتتەن قارجى ءبولىندى. بۇل شارالار ايماقتاعى دەنساۋلىق ساقتاۋ سالاسىنىڭ سالالىق دارىگەرلەرمەن قامتاماسىز ەتىلۋىنە سەپتىگىن تيگىزىپ وتىر.
2018 جىلى وبلىستىڭ مەديتسينالىق ۇيىمدارىندا 130 جاس مامان جۇمىسقا قابىلدانىپ, ولاردىڭ 68-ءى اۋىلدىق ەلدى مەكەندەرگە جولداما الىپتى. ال بىلتىر قابىلدانعان 95 ماماننىڭ 43-ءى اۋىل دارىگەرى اتاندى. وسى جەردە وتكەن جىلى العاش رەت جاس مامانداردىڭ جۇمىسقا ورنالاسۋى enbek.kz ەلەكتروندى پورتالى ارقىلى جۇرگىزىلگەنىن ايتا كەتەيىك. ارينە, جۇمىسقا ورنالاسۋدا اشىقتىق قاعيداتىنىڭ بولعانى قۇپتارلىق قۇبىلىس. بىراق, پورتال ارقىلى جۇمىس ىزدەگەن جاستاردىڭ كوپشىلىگى ينفراقۇرىلىمى دامىعان ءىرى قالالارداعى ۇلتتىق ورتالىقتار مەن ەمحانالاردى تاڭداپ, وڭىرلەردە قىزمەت ەتۋگە نيەتتى مامانداردىڭ ۇلەس سالماعى كۇرت ازايىپ كەتتى.
دەگەنمەن, اۋىلدىق جەرلەردەگى مەديتسينا ۇيىمدارىندا جۇمىسقا قابىلدانعان مامانداردى مەملەكەت تاراپىنان قولداۋ بار. ولارعا قازاقستان رەسپۋبليكاسى ۇكىمەتىنىڭ 2009 جىلعى 18 اقپانداعى №183 «اۋىلدىق ەلدى مەكەندەرگە جۇمىس ىستەۋ جانە تۇرۋ ءۇشىن كەلگەن دەنساۋلىق ساقتاۋ, ءبىلىم بەرۋ, الەۋمەتتىك قامسىزداندىرۋ, مادەنيەت, سپورت جانە ۆەتەريناريا ماماندارىنا الەۋمەتتىك قولداۋ شارالارىن ۇسىنۋ مولشەرىن جانە ەرەجەسىن بەكىتۋ تۋرالى» قاۋلىسىنا سايكەس رەسپۋبليكالىق بيۋدجەت قاراجاتى ەسەبىنەن كوتەرمە جاردەماقى جانە تۇرعىن ءۇي ساتىپ الۋعا نەمەسە سالۋعا بيۋدجەتتىك كرەديت بەرىلىپ كەلەدى. «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە سايكەس جەرگىلىكتى اتقارۋشى ورگاندار جەرگىلىكتى بيۋدجەت قاراجاتى ەسەبىنەن ەلدى مەكەندەرگە جول تارتقان مەديتسينا جانە فارماتسەۆتيكالىق قىزمەتكەرلەرگە الەۋمەتتىك قولداۋ شارالارىن كورسەتە الادى.
وسىدان 2 جىل بۇرىن بايقوڭىر قالاسىنان اشىلعان كوپبەيىندى قالالىق اۋرۋحانادا دارىگەرلەر تاپشىلىعى بايقالعان ەدى. ول ماسەلە جەرگىلىكتى بيلىكتىڭ ارالاسۋىمەن شەشىمىن تاپتى. سول تۇستاعى وبلىس باسشىسىنىڭ تاپسىرماسىمەن الەۋمەتتىك سالا قىزمەتكەرلەرىنە ارنالىپ جاڭادان سالىنعان كوپقاباتتى 5 تۇرعىن ۇيدەن 12 پاتەر دارىگەرلەرگە ءبولىندى. وسىنىڭ ارقاسىندا قازىر جۇلدىزدى قالادا سىرتتان كەلگەن 9 مامان تۇراقتاپ قالدى. ال وبلىس ورتالىعىنداعى جاس ماماندار ءۇشىن مۇنداي جەڭىلدىكتەر جوق.
– دارىگەرلەر تاپشىلىعى جەرگىلىكتى بيلىكتىڭ نازارىندا تۇر. بۇل ماسەلە وبلىستىق ءماسليحاتتىڭ كەزەكتى وتىرىسىندا قارالىپ, وسى جىلعا وڭىرگە اسا قاجەتتى ماماندىقتار بويىنشا كوتەرمە جاردەماقى ءبولۋ ءۇشىن جەرگىلىكتى بيۋدجەتتەن 25 ملن 250 مىڭ تەڭگە قارجى قاراستىرىلدى, – دەيدى جاقسىلىق ابىلقاسىم ۇلى.
وڭىردە مامان تارتۋ, ونى تۇراقتاندىرۋ باعىتىندا وسىنداي جۇمىستار بار. قازىرگى باستامالار بولاشاقتا سالانىڭ بىلىكتى كادرلارىمەن تولىعىپ, حالىققا كورسەتىلەتىن قىزمەت ساپاسىنىڭ جاقسارا تۇسەرىنە سەندىرەدى. دەگەنمەن دە, مەديتسينانىڭ جىل سايىن دامىپ كەلە جاتقان سالا ەكەندىگىن ۇمىتپاعان ءجون. سوندىقتان دا ونداعى كادر دايارلاۋعا, ايماقتاردىڭ دارىگەرلەرمەن قامتىلۋىنا مەملەكەت جەتە ءمان بەرۋى كەرەك. ايتپەسە, مامان تاپشىلىعى ۇلكەن ماسەلە بولىپ قالا بەرمەك.
قىزىلوردا
