قالاداعى باۋىرجان مومىش ۇلى كوشەسىنىڭ بويىندا ورنالاسقان ساۋدا ورىندارىنا رەيد جۇرگىزىلىپ, زەردەلەۋ جۇمىستارىنىڭ ناتيجەسىندە كوپتەگەن جاعدايدا كارانتين تالاپتارى ساقتالماعان بولىپ شىقتى. كارانتين تالاپتارىن ساقتاماعان ازاماتتارعا قالالىق اكىمدىك تاراپىنان حاتتاما تولتىرىلىپ, زاڭ اياسىندا شارا قولدانىلدى.
سول سياقتى «مىڭبۇلاق», «ديانا», «ايرىلماس», «زارينا» جانە «گاۋحار» ساۋدا ورتالىقتارىنا دا رەيد جاسالىپ, مۇندا دا كارانتين تالاپتارىن ساقتاماعان ازاماتتار اشكەرەلەندى. ياعني ساۋدا جاساۋدا نەگىزگى تالاپتار ساقتالماعان.
قازىر وڭىردەگى بلوك-بەكەتتەر الىنىپ, بىرقاتار ساۋدا نۇكتەلەرىنە جۇمىس ىستەۋگە رۇقسات بەرىلدى. وبلىستاعى ەڭ ۇلكەن ساۋدا نىسانى بولىپ سانالاتىن تاراز قالاسىنداعى «اۋىل – بەرەكە» بازارىنداعى جەمىس-كوكونىستەردىڭ, قۇرىلىس ماتەريالدارى مەن اۋىلشارۋاشىلىق ونىمدەرىنىڭ كوتەرمە ساۋدا سەكتورى دا جۇمىس ىستەپ تۇر. دەگەنمەن رۇقسات بەرىلگەن ساۋدا نۇكتەلەرىندە دە كارانتين تالاپتارى, جالپى قاۋىپسىزدىك تالاپتارى تولىق ساقتالماي وتىر.
جۋىردا وبلىس اكىمى بەردىبەك ساپارباەۆ اتالعان بازار اۋماعىندا بولىپ, بىرقاتار ماڭىزدى ماسەلەلەرگە توقتالعان بولاتىن. وسى ۋاقىتقا دەيىن اكىم بازار اۋماعىن رەتكە كەلتىرۋدى, ساۋدا ورىندارىن جاقسارتۋدى, ىڭعايلى جاعداي جاساۋ ماسەلەلەرىنە نازار اۋدارۋدى تاپسىرعانىمەن, بۇگىنگە دەيىن بۇل نۇسقاۋلار تولىعىمەن ورىندالماعان. ب.ساپارباەۆ بازاردا جايلى ساۋدا پاۆيلوندارىنىڭ جوقتىعىن, ءتىپتى كەيبىر ساتۋشىلاردىڭ جەردە ساۋدا جاساپ وتىرعانىن, وعان قوسا كولىك قۇرالدارىنىڭ بازارداعى رەتسىز قوزعالىسى ءورت قاۋپىن تۋدىراتىنىن ايتىپ, بازار جۇمىسىن سىنعا العان ەدى. «سانيتارلىق-ەپيدەميالىق تالاپتاردىڭ ساقتالۋى دا ويداعىداي ەمەس. ساتۋشىلار دا, ساتىپ الۋشىلار دا بەتپەردە كيمەيدى. ادامدار اراسىنداعى الەۋمەتتىك اراقاشىقتىق ساقتالمايتىنىن كورىپ وتىرمىز. نارىق قىزمەتكەرلەرى ازىق-ت ۇلىكتىك ەمەس سەكتورداعى جۇمىستى قايتا باستاۋدى سۇراۋدا. الايدا بازار اكىمشىلىگى قاجەتتى سانيتارلىق تالاپتاردى ساقتاماي وتىر. ءتيىستى شارا قابىلداڭىزدار, سودان كەيىن عانا بازاردى تولىق اشۋ تۋرالى ايتۋعا بولادى», دەگەن ب.ساپارباەۆ بازار باسشىلىعىنا ءبىراز ەسكەرتۋ جاسادى.
بۇل تەك «اۋىل – بەرەكە» بازارىنا عانا قاتىستى سىن ەمەس. بۇدان بولەك, تاراز قالاسىندا «ورتالىق» جانە «اتاكەنت» سىندى بازارلاردىڭ كوپشىلىگىندە مىندەتتى سانيتارلىق, كارانتيندىك جانە ورتكە قارسى تالاپتار ورىندالماعان. ءورت بولا قالعان جاعدايدا وقيعا ورنىنا ورتكە قارسى قىزمەت تەحنيكاسىنىڭ جەتۋى دە باستى ماسەلە. وبلىستىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆ بازارلاردىڭ بىردە-ءبىرى ارنايى بەكىتىلگەن تالاپتارعا سايكەس كەلمەيتىنىن ايتادى. «ادامدار ماسكاسىز ءجۇر. سانيتارلىق تازالاعىشتار جوق. اراقاشىقتىق ساقتالمايدى», دەيدى ول.
بازار حالىق كوپ شوعىرلاناتىن ورىن بولعاندىقتان, مۇندا قاۋىپسىزدىك شارالارىنىڭ قاتاڭ ساقتالۋى ماڭىزدى. بۇگىندە وڭىردە بلوك-بەكەتتەردىڭ الىنعانى, كەيبىر نىسانداردىڭ جۇمىسىن باستاۋىنا رۇقسات بەرىلگەنى ىندەتتىڭ تولىعىمەن جويىلعانىن بىلدىرمەيدى. سوندىقتان دا جەرگىلىكتى حالىقتىڭ قاۋىپسىزدىگى ءۇشىن كارانتين تالاپتارىنىڭ اسىرەسە بازارلاردا تولىعىمەن ساقتالۋى ماڭىزدى ماسەلە بولىپ تۇر.
جامبىل وبلىسى
