ونىڭ ايتۋىنشا, قولداعى مال اۋرۋ بولسا, ونىڭ دەرتى ادامدارعا جۇقپاي قويمايدى. سوندىقتان قولداعى بارلىق جانۋارلاردىڭ دەنساۋلىعىن تەكسەرىپ, ەمدەتىپ, اۋرۋلارعا قارسى ەم-دوم قولدانۋدىڭ ارتىعى جوق. اسىرەسە سولتۇستىك ءوڭىر سياقتى مالدى كوپ وسىرەتىن اگرارلى ەلدىڭ حالقى مالدان جۇعاتىن دەرتتەرگە كوپ ۇشىرايدى. ءتىپتى دەرت مالدان عانا ەمەس, يت پەن مىسىقتان, قۇستان دا جۇعۋى مۇمكىن.
ۆەتەرينارلىق شارالار دەگەنىمىز – ادامدار مەن مالدىڭ دەنساۋلىعىن ساقتاۋ ءۇشىن جاسالاتىن شارالار كەشەنى. ونى ءبىز كوكتەمدىك جانە كۇزدىك دەپ ەكى كەزەڭگە ءبولىپ جاسايمىز. كوكتەمدىك شارالار ناۋرىز بەن ماۋسىم ارالىعىندا, ال كۇزدىك شارالار قىركۇيەكتەن قاراشا ايىنا دەيىن جاسالادى. وسى شارالاردىڭ بارىسىندا مالعا ەكپە ەگۋمەن قاتار تۋبەركۋلەز, برۋتسەللەز جانە لەيكوز سياقتى دەرتتەردىڭ بار-جوعىن انىقتاۋ ءۇشىن قان الامىز, دەدى مامان.
بۇل ءۇشىن ەپيزووتيكالىق مونيتورينگ دەرەكتەرىنىڭ نەگىزىندە ۆەتەرينارلىق شارالاردىڭ جوسپارى جاسالادى. ونىڭ بارىسىندا مالدىڭ سانى, پرەپاراتتاردىڭ قولدانىلۋى سياقتى تولىپ جاتقان دەرەكتەرگە ءمان بەرىلەدى. تەكسەرىس مالدىڭ كىمنىڭ مەنشىگىندە ەكەنىنە قاراماي جاپپاي جاسالادى.
سولتۇستىك قازاقستان وبلىسىندا وسى جۇمىستاردى اتقاراتىن مال دارىگەرلەرىنىڭ سانى – 292 ادام. بيىل ۆەتەرينارلىق شارالار قىستىڭ جىلىمىق بولۋىنا بايلانىستى اقپان ايىنان باستالدى. سونىڭ ىشىندە سۋ باسۋى مۇمكىن ايماقتارعا الدىمەن جۇرگىزىلگەن. ەگەر مالدىڭ اۋرۋ ەكەنى انىقتالسا, ونداي مالدى 15 كۇننىڭ ىشىندە جويۋ مىندەتتەلەدى.
– بۇگىنگى تاڭدا 2020 جىلعا بەلگىلەنگەن جوسپارداعى جۇمىستاردىڭ 95 پايىزى ورىندالدى. تەكسەرىس بارىسىندا وبلىس بويىنشا 312 قارا مالدان, 1 قويدان برۋتسەللەز, 3 سيىردان تۋبەركۋلەز انىقتالدى. دەگەنمەن, بيىل وسىنداي دەرتتەر بىلتىرعىمەن سالىستىرعاندا ازايدى. بۇل ۆاكتسينانى ۋاقىتىندا سالىپ, ەم-دوم جۇمىستارىنىڭ دەر كەزىندە جۇرگىزىلگەنىنىڭ ناتيجەسى, – دەدى بەرىك ءالجانوۆ.
قازىر وبلىس بويىنشا ۆەتەرينارلىق شارالاردى وتكىزۋگە قولبايلاۋ بولاتىن ەشقانداي كەدەرگى جوق. دياگنوستيكالىق ورتالىقتار قالىپتى جۇمىس ىستەۋدە, ۆەتەرينارلىق پرەپاراتتاردىڭ تاپشىلىعى ەڭسەرىلگەن. بىراق كەيبىرىنىڭ ساپاسى تومەن بولىپ كەلەتىنى راس. سونىمەن بىرگە پرەپاراتتاردى ساقتايتىن ورىندار قاجەتتى قۇرالدارمەن قامتاماسىز ەتىلگەن.
پاندەميانىڭ لاڭى ۆەتەرينارلىق جۇمىستاردى جۇرگىزۋگە دە كەدەرگى بولعان. مال دارىگەرلەرىنىڭ ءجۇرىس-تۇرىسىنا شەكتەۋ قويىلعان. كەيبىر مال يەلەرى دە كوروناۆيرۋستى سىلتاۋراتىپ مامانداردى قورالارىنا كىرگىزبەۋگە تىرىستى. ولاردىڭ بارىنە جەرگىلىكتى اكىمدىك قىزمەتكەرلەرىمەن بىرلەسە وتىرىپ, ءتۇسىندىرۋ جۇمىستارى جۇرگىزىلدى. ال ۆەتەرينارلىق قىزمەتكەرلەر قاجەتتى قاۋىپسىزدىك شارالارىن ساقتاپ, وزدەرىمەن بىرگە مىندەتتى تۇردە بەتپەردە, انتيسەپتيك, قولعاپ, ارناۋلى كيىم الىپ ءجۇردى.
سولتۇستىك قازاقستان وبلىسى
