ايماقتار • 08 ماۋسىم، 2020

مەديتسينا: جاۋىردى جابا توقىماۋ كەرەك...

86 رەت كورسەتىلدى

جۋىردا سولتۇستىك قازاقستانداعى كورسەتىلگەن مەديتسينالىق جانە فارماتسەۆتىك قىزمەتتەر مەن تاۋارلاردىڭ ساپاسى جانە قاۋىپسىزدىگىن باقىلاۋ دەپارمەنتىنىڭ باستىعى سەرىكباي قاسماقاسوۆ جۋرناليستەرگە بريفينگ بەرىپ، ۇستىمىزدەگى جىلدىڭ ءى توقسانىندا وزدەرىنە 19 ارىز-شاعىم تۇسكەنىن جاريالادى.  سونىڭ 11-ءنىڭ دۇرىستىعى دالەلدەنگەن.

س.قاسماقاسوۆتىڭ سوزىنە قاراعاندا ارىز-شاعىمداردىڭ ازايۋ ديناميكاسى بىلىنەدى. ولار نەگىزىنەن جەكەمەنشىك ەمحانالاردىڭ قىزمەتتەرىنىڭ ۇستىنەن تۇسكەن. مىسالى، ءبىر زەينەتكەر وزىنە 1 ملن 200 مىڭ تەڭگەگە پروتەز سالدىرعان. الايدا ول بەكىمەگەن، سەبەبى الدىمەن ءتىستىڭ پارادەنتوز دەرتى ەمدەلۋى كەرەك ەكەن.  

مەديتسينالىق قىزمەتتى باقىلاۋشى ورگاننىڭ باسشىسى جالپى جاعدايدى نەگىزىنەن جاقسى دەگەنىمەن سولتۇستىك قازاقستاننىڭ ەمدەۋ ورىندارىنىڭ جۇمىسى كوڭىل كونشىتپەيدى. ماسەلەن، وبلىستىق بالالار اۋرۋحاناسىنا اياعى سىنىپ تۇسكەن 11 جاسار لاۋرا ءالىم دەگەن بالاعا التى ايدا 6 رەت ناركوزبەن وتا جاساعان. بالانىڭ اياعى ءالى دە جازىلماعان. اۋرۋحانانىڭ دارىگەرلەرى اياق استىنان ونىڭ سىنىعىنان ونكولوگيالىق دەرتتىڭ ء«ىزىن» كورىپ، ونى انىقتاۋ ءۇشىن اتا-اناسىنا ءوز كۇشتەرىڭىزبەن رەسەي فەدەراتسياسىنىڭ ومبى قالاسىنا جەتكىزىڭدەر دەگەن تالاپ قويعان. جول اقىسىن، ساراپ جاساۋدىڭ باعاسىن ومبىلىقتارعا تولەۋدىڭ قاجەتتىگىن دە تاپسىرعان. ال ءوزىمىزدىڭ ەلدەگى تەگىن ساراپقا جىبەرۋدى ولار ارتىق ساناعان. وسىعان قاراعاندا بىرەۋلەردىڭ كولدەنەڭ تابىس تاپقانىن قالايتىن سياقتى. قازاقستاندىقتاردى كورشى ەلگە «قۋدىڭ»، ءسويتىپ تامىر-تانىستارىنا اقشا تاپقىزۋدىڭ جولى دا جاسالىپ قويعان با دەپ ويلايسىڭ...  

ماسەلەگە، ءماجىلىس دەپۋتاتى كارىباي مۇسىرمان ارالاسىپ، دەنساۋلىق ساقتاۋ ءمينيسترى ە.ءبىرتانوۆ پەن وبلىس اكىمى ق.اقساقالوۆقا ساۋال جاساعاننان كەيىن عانا سانيتارلىق اۆياتسيامەن وتالىق ماتەريالدار نۇر-سۇلتان قالاسىنا تەگىن جەتكىزىلىپ، بالانىڭ بويىندا ەشقانداي ونكودەرتتىڭ جوق ەكەندىگى انىقتالدى.

مىنە، وسىنداي ماسەلەلەر مەديتسينالىق قىزمەتتى قاتاڭ باقىلاۋعا الۋدى تالاپ ەتەدى. مەديتسينالىق قىزمەتتەردىڭ ساپاسىن باقىلايتىن قىزمەتكە وسىندايلارعا دا ءجىتى نازار اۋدارۋى كەرەك-اق. وبلىستىق دەنساۋلىق ساقتاۋ باسقارماسىنا بىرنەشە ايدان بەرى باسشى تاعايىندالماعاندىعى حالىقتىڭ دەنساۋلىعىنا دەگەن جاناشىر كوزقاراستىڭ مۇندا ازدىعىن كورسەتكەندەي. ال باستىقتىڭ مىندەتىن اتقارۋشى ن.ايمانوۆ وزىنە جاسالعان شاعىمدى قاراماق تۇگىلى وبلىستىق بالالار اۋرۋحاناسىنىڭ باس دارىگەرىمەن سويلەسۋگە دە جاراماعان.

 

سولتۇستىك قازاقستان وبلىسى

 

سوڭعى جاڭالىقتار

ۇقساس جاڭالىقتار