قازاق ءتىلىنىڭ عىلىم سالاسىنداعى قولدانىسىن نىعايتۋدا ساپالى تەرمينولوگيالىق سوزدىكتەردىڭ الاتىن ورنى ەرەكشە. ۇلت ۇستازى ا.بايتۇرسىن ۇلىنىڭ: ء«بىز سياقتى مادەنيەت جەمىسىنە جاڭا اۋزى تيگەن جۇرت, ءوز تىلىندە جوق دەپ, مادەني جۇرتتاردىڭ تىلىندەگى سوزدەردى العىشتاپ, انا تىلىمەن جات ءتىلدىڭ سوزدەرىن الماستىرا, اقىرىندا انا ءتىلىنىڭ قايدا كەتكەنىن بىلمەي ايىرىلىپ قالۋى ىقتيمال. سوندىقتان مادەني جۇرتتاردىڭ تىلىندەگى ادەبيەتتەرىنىڭ, عىلىم كىتاپتارىن قازاق تىلىنە اۋدارعاندا ءپان سوزدەرىنىڭ دايارلىعىنا قىزىقپاي, انا تىلىمىزدەن قاراستىرىپ ءسوز تابۋىمىز كەرەك. سوندا ءبىزدىڭ ءتىلىمىز تازا بولادى» دەگەن پىكىرى ءالى كۇنگە كۇن تارتىبىنەن تۇسكەن ەمەس.
ونلاين-كونفەرەنتسيادا فيلولوگيا عىلىمدارىنىڭ دوكتورى, پروفەسسور شەرۋباي قۇرمانباي ۇلى, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى ءسابيرا يساقوۆا تەرمينولوگيالىق سوزدىك جاساۋدىڭ وتاندىق جانە حالىقارالىق تاجىريبەسىنە توقتالدى.
شەرۋباي قۇرمانباي ۇلى سوزجاسامداعى بىرىزدىلىككە باسا نازار اۋداردى, ەگەر وقۋ ورىندارىندا ءبىر ءسوزدىڭ بالاماسى بىرنەشە نۇسقادا وقىتىلا بەرەتىن بولسا, بۇلاردا ءبىلىم العان تۇلەكتەر ەرتەڭ وندىرىسكە كەلگەن كەزدە ءوزارا تۇسىنىسە المايتىنىن ايتتى.
مۇنداي قوردالانعان ماسەلەلەر تەرمينولوگيالىق سوزدىكتەر ماڭايىندا جەتكىلىكتى. سول سەبەپتى تەرمينولوگيالىق سوزدىكتەر جاساۋعا, ولاردى جاساۋدىڭ əدىستەمەسىن جەتىلدىرۋگە اسا مəن بەرگەن ءجون. اتالعان شارا تەرمينولوگيالىق سوزدىكتەر جاساۋدىڭ وتاندىق جانە حالىقارالىق تاجىريبەسىن تالداۋعا, سونىڭ نەگىزىندە تەرمينولوگيا سوزدىك جاساۋدىڭ نەگىزگى تالاپتارىن انىقتاۋعا باعىتتالدى.
