ميننەاپوليس شتاتىنىڭ تۇرعىنى دجورد فلويد پوليتسيا قولىنان قازا تاپقاننان كەيىن باستالعان تولقۋلار ءالى تىنشىماي تۇر. نيۋ-يورك, سيەتل سياقتى ۇلكەن قالالاردىڭ قاتارىنا ۆيدور, تەحاس, حارۆ, موريون, وگايو سياقتى كىشىگىرىم قالاشىقتار قوسىلدى. نارازىلار مەملەكەتتەگى ناسىلدىك كەمسىتۋشىلىك مەن ادىلەتسىزدىككە نارازىلىعىن بىلدىرۋدە.
نارازىلىق جاي قارسىلىقتارمەن توقتاماي, حالىقتىڭ ۇلكەن دۇكەندەردى توناۋىنا ۇلاستى. ازاماتتار قالا ورتالىعىنداعى دۇكەندەرگە باسىپ كىرىپ, قالاعانىن الىپ شىعۋدا. اقش ۇكىمەتى مۇنى ارانداتۋشىلار ۇيىمداستىرىپ وتىر دەيدى. سونىمەن قاتار بۇل ارەكەتتەر كوروناۆيرۋس پاندەمياسى سالدارىنان قابىلدانعان جاڭا ەرەجەلەردى بۇزىپ وتىر. ەلدەگى قاشىقتان جۇمىس ىستەۋ, مەكتەپتەر مەن ۋنيۆەرسيتەتتەردى ونلاين رەجىمگە كوشىرۋ سياقتى ساقتىق شارالارىن ىعىستىردى.
دجوردج فلويد تۋعان سولتۇستىك كارولينا شتاتىندا مارقۇمعا ارنالعان مەموريالدى تاقتا ورناتىلىپ, تاعزىم ەتۋگە كۇن سايىن مىڭداعان ادام جينالادى. ۆاشينگتونداعى قارسىلىقتار كۇشەيە ءتۇستى. كوشەدەگىلەر «ەلدىڭ باس قالاسىن باسىپ الساق, باسقا شتاتتاردى كۇيرەتۋ ەشتەڭە ەمەس. بۇدان ەشكىم امان قالمايدى. پوليتسيا امەريكا ازاماتتارىنا ادىلەتسىزدىك كورسەتپەۋى كەرەك», دەپ مالىمدەدى.
ال نارازىلاردى تىڭداۋعا شىققان ميننەاپوليس شتاتىنىڭ مەرى دجەيكوب فرەيدتى حالىق «ۇيات! دجەيكوب, ۇيىنە قايت» دەپ الاڭنان قۋدى. 38 جاستاعى قالا باسشىسى 2018 جىلى تۇرعىندارعا حالىق پەن پوليتسيا اراسىنداعى قارىم-قاتىناستى دۇرىستايمىن دەپ ءسوز بەرگەن ەكەن. باق ەلدەگى جاعدايدىڭ قورقىنىشتى فيلمدەردەگى كەيىپكە ەنگەنىن جازادى.
دۇيسەنبىدە اق ءۇي ماڭىنداعى لافايەت الاڭىنا جينالعانداردى پوليتسيا رەزەڭكە وقپەن اتىپ, كوزدەن جاس اعىزاتىن گاز قولدانعان بولاتىن. حالىق مۇنداي ارەكەتكە اشۋلانىپ, پوليتسيا كولىكتەرىن, ۇيلەردى قيراتۋعا كوشتى. نارازىلىق بويىنشا ساراپشى, ۇلىبريتانيا ۋنيۆەرسيتەتىنىڭ پروفەسسورى ميشەل حاميلتون پوليتسيانىڭ بۇل ارەكەتى جاقسىلىققا اپارمايتىنىن, قۇقىق قورعاۋ ورگاندارىنىڭ قىزمەتكەرى ساقتىققا جاۋاپ بەرۋى كەرەك ەكەنىن ايتادى.
