وسىنداي قولداۋى ءۇشىن گەرمانيا كومپانيانىڭ 20 پايىزى مەن باقىلاۋ كەڭەسىندەگى ەكى ورىنعا قول جەتكىزەدى. كومپانيا باسشىلىعى گەرمانيا مەن ەۋروپا وداعىنىڭ بۇل قولداۋىن قابىلداعانىن سەنبى كۇنى رەسمي تۇردە مالىمدەدى. ونىمەن قوسا فرانكفۋرت پەن ميۋنحەن سياقتى ءىرى قالالارداعى اۋەجايلاردىڭ ۇشىپ-قونۋ جولاقتارىن دا قولداۋشىلارعا وتكىزۋى مۇمكىن ەكەندىگىن حابارلادى. مۇنداي كەلىسىم گەرمانيا ۇكىمەتىن كومپانيانىڭ ەڭ ۇلكەن ۇلەسكەرى ەتەدى.
شەشىم قابىلدانعانىمەن, ناقتى بەكىتىلگەن جوق. قوس تاراپ 25 ماۋسىمدا قايتا كەزدەسىپ, جالپى وتىرىس وتكىزەدى. قۇرامىندا بەلگيا, اۋستريا, شۆەيتساريا اۋە كومپانيالارى بار Lufthansa توبى كوروناۆيرۋس پاندەمياسى كەزىندە 1 ملن ەۋروداي شىعىنعا ۇشىراعان. كومپانيانىڭ ديرەكتورلار كەڭەسىنىڭ باسشىسى كارل-ليۋدۆيگ كلەي «بۇل Lufthansa ءۇشىن قيىن ءارى اۋىر جول. گەرمانيانىڭ فەدەرالدى ۇكىمەتىمەن بىرگە الەمدىك اۋە كولىگى يندۋسترياسىنداعى الدىڭعى قاتارداعى ورنىمىزدى ساقتاپ قالۋدى نەگىزگى ماقساتىمىز رەتىندە بەلگىلەدىك», دەدى. ال اتقارۋشى ديرەكتور كارستەن شپور قيىن كۇندەردە كومپانياعا ادال قىزمەت ەتكەن قىزمەتكەرلەر مەن باسقا دا ۇلەسكەرلەرگە ريزاشىلىعىن ءبىلدىردى.
بۇعان دەيىن اۋە كولىگىنىڭ الىبى ۇكىمەتتىڭ قولداۋىن قابىلدامايتىنىن ايتقان بولاتىن. ولار ەۋرووداقتىڭ تالاپتارى تىم قاتال بولىپ, كومپانيا جۇمىسى مەن بەدەلىنە اسەر ەتەدى دەپ قورىققان-دى. ال گەرمانيا ۇكىمەتى كومپانيا پاندەمياعا دەيىن جاقسى تابىس تاپقانىن, الايدا قازىرگى جالعىز شارا وسى ەكەنىن جەتكىزدى. دەگەنمەن, ۇكىمەتتىڭ اۋە كولىگى سەكتورىنا كوز تىككەنىن باسقا قۇرىلىمدار سىنعا الدى. بۇل كەلىسىمگە كەلۋ دە ۇزاق ۋاقىتتى تالاپ ەتتى. ويتكەنى گەرمانيانىڭ بريۋسسەلمەن كەلىسىمى وڭايعا سوققان جوق. كانتسلەر انگەلا مەركەل كومپانياعا قاتىستى فەدەرالدى باقىلاۋدى ازايتۋدى سۇراعان بولاتىن.
