جەلىگە تىركەلگەن, قولىندا سمارتفونى بار جۇرتتىڭ ءبىرازى حاباردار بولعاندىقتان, داۋلى روليكتىڭ مازمۇنىن ايتىپ جاتپايىق. جالپى, جۇرت وندا ناسيحاتتالعان دۇنيەنى قولدايتىندار مەن قولدامايتىندار بولىپ ەكىگە جارىلدى. بەيجاي قاراپ وتىرعاندار دا بار, ارينە. قىسقاسى, بىرنەشە كۇننەن بەرى وعان ءار ءتۇرلى قىرىنان ءۇڭىلىپ جاتىر جۇرت.
قولدايتىنداردىڭ پايىمىن تۇيىندەپ ايتساق, ءدىنىمىز بەن دىلىمىزدەگى ۇستانىم بويىنشا قازاق قىزدارى ەتەگى شولتيعان «يۋبكا» كيمەگەنى ءجون, وسىنداي روليكتەردى كوبىرەك شىعارۋ كەرەك دەگەنگە سايادى. قارسىلار زايىرلى قوعامدا كىم قالاي كيىنسە دە ءوز ەركى دەيدى. ولاردىڭ پىكىرىنشە, قىز بالانى كولىگىنە مىنگىزىپ الىپ, كيىم كيىسىنە سىناۋعا, اقىل ايتىپ مورال وقۋعا كولدەنەڭ كوك اتتىلاردىڭ ەشقانداي قۇقى جوق.
بەينەروليكتىڭ بيۋدجەت قاراجاتىنا تۇسىرىلگەنى دە داۋدى ودان سايىن ۋشىقتىردى. Factcheck.kz-ءتىڭ حابارلاۋىنشا, شىمكەنتتەگى جرو بۇل بەينەروليكتى ناقتى قانشا تەڭگەگە تۇسىرگەنىن انىقتاۋ قيىن. «...سەبەبى تەندەر ەرەجەسى بويىنشا ورىنداۋشى (جەتكىزۋشى) 5 روليك ءتۇسىرۋى كەرەك. جالپىلاما تۇردە 6,2 ملن-دى روليك سانىنا بولە سالۋعا بولادى, بىراق بۇل ناقتى باعانى بەرمەيدى. اۋەلدە تەندەرگە 8 ملن تەڭگە بولىنگەن. جەتكىزۋشى – «تالاسوۆ سەريك تۋرەبەكوۆيچ» جك قىزمەتىنە ەڭ از سومانى, ياعني 6,2 ملن تەڭگە ۇسىنىپ تەندەردى جەڭىپ الدى. كەلىسىمشارت جىلدىڭ سوڭىنا دەيىن جاسالعان, جەتكىزۋشى قىزمەتتى بيىل 3 قازانعا دەيىن ورىنداۋى كەرەك. قازىر 6,2 ملن تەڭگەنىڭ 3 ملن-ى جۇمسالعان. قانشا بەينەروليك تۇسىرىلگەنى بەلگىسىز».
بەلگىلى زاڭگەر دجوحار ۋتەبەكوۆتىڭ ايتۋىنشا, بەينەروليكتىڭ مازمۇنىنان زاڭعا قايشى دۇنيەلەردى ناسيحاتتاۋ بايقالادى. زاڭگەر بەيتانىس ەركەكتىڭ قىز بالانى كولىگىنە وتىرعىزىپ, ەسىگىن جاۋىپ العانى, كيىمىنە قاراپ جەزوكشەگە تەڭەگەنىن «ۇساق بۇزاقىلىق ارەكەت» دەپ باعالادى, جولاۋشىعا مورالدىق زيان شەكتىردى دەگەن پىكىر ءبىلدىردى.
جالپى, نازىك جاندىلاردىڭ اشۋىن تۋدىرعان, قوعامنىڭ باسقا دا مۇشەلەرىنىڭ قارسىلىعىنا تاپ بولعان بولعان پىكىر يەلەرى سوڭعى ۋاقىتتا جيىلەگەنى بەلگىلى. سوعان قاراي وتىرىپ, بىرنەشە قورىتىندى جاساۋعا بولاتىن سىڭايلى. قازىرگى قوعام بۇرىنعىداي باسقالاردىڭ كوڭىلىنە قاراماي پىكىر ايتاتىنداردى كوتەرمەيدى, وزىمەن ساناسۋعا ماجبۇرلەيدى. ساناسپاسا, قوعام ونى جازالاۋى دا مۇمكىن. بۇل – ءبىر.
ەكىنشىدەن, قوعامداعى كەمشىلىكتەردى ءباز-باياعى ادىسپەن قۇرعاق اقىل ايتۋ ارقىلى تۇزەيتىن ءادىس ەسكىردى. حالىقتىڭ ساناسىنا باسقا تەرەڭدەۋ, جان-جاقتى زەرتتەلگەن تاسىلمەن عانا اسەر ەتۋدىڭ جولدارىن قاراستىرعان ءجون. ايتپاقشى حالىقتىڭ بيۋدجەت قارجىسىنىڭ قالاي جۇمسالعانىنا الاڭداۋشىلىعى كۇشەيگەنىن دە وسى وقيعا كورسەتتى. ءبىر انىعى, جاستاردى تاپتاۋرىن ستسەناريگە قۇرىلعان بەينەروليكپەن, قۇرعاق اقىلمەن تاربيەلەۋ مۇمكىن ەمەس. مۇنداي روليك ءبىر تاراپتىڭ اشۋ-ىزاسىن تۋعىزادى, ءتىپتى ەرەگەستىرۋى دە مۇمكىن. ال ەكىنشى تاراپتىڭ ايىزىن قاندىرادى. قوعامنىڭ جاق-جاققا ءبولىنىپ قىرىلعانى ەمەس, باسقا ناتيجە, ناقتى پايدالى ناتيجە شىققانىن قالاساق, ماسەلەگە باسقا قىرىنان ءۇڭىلىپ كورگەن ءجون بولار.
