الماتىنىڭ ىسكەرلىك كەڭەسى مەن شاھارداعى ءتۋريزمدى دامىتۋعا قاتىستى ءتۇرلى جيىنداردا ونىڭ تۇيتكىلدەرى تۋرالى از ايتىلمادى. ماسەلەن, الماتىلىقتار جىل سايىن تەك قانا شەتەلدىك مەديتسينالىق تۋريزمگە 500 ملن دوللاردان اسا قاراجات جۇمسايتىن بولسا, بۇل مۇمكىندىكتەردىڭ بارلىعى اينالامىزدا بار ەكەنىن ناقتى مىسالدارمەن دايەكتەۋگە بولار ەدى.
سونىمەن ءتۋريزمدى دامىتۋعا قاتىستى, قاراجات ۇنەمدەۋگە دە سەپتىگى بار, قالا تۇرمىسى مەن دەمالىسى, ادامداردىڭ دەنساۋلىعىن اينالىپ وتپەيتىن كەزەكتى جوبانىڭ ءتۇساۋى كەسىلىپ وتىر.
الداعى كۇندەرى الماتىدا ەكولوگيالىق تۋريزم مەن سپورتتى دامىتۋ ماقساتىندا ىلە الاتاۋى توسكەيىندە 71 شاقىرىمدىق سوقپاق جول جايعاسادى. سونىمەن قاتار تاعى 9 شاقىرىمدىق سپورتتىق جولدار اباتتاندىرىلادى.
وسىلايشا ونلاين-بريفينگتە مەگاپوليستە «باقىت سوقپاقتارى» جاڭا جوباسىنىڭ تۇساۋكەسەرى ءوتتى. يدەيانىڭ باستاماشىسى دا ىسكە اسىراتىن دا – «BI Group» حولدينگى. كومپانيا وكىلدەرى وزدەرىنىڭ بۇل جوباسىن الماتى قالاسىنىڭ اكىمى باقىتجان ساعىنتاەۆقا 2019 جىلدىڭ كۇزىندە ۇسىنعان بولاتىن, تىڭ باستاما سارالانا كەلە, اكىمدىك تاراپىنان قولداۋ تاپتى.
جوبانىڭ ءبىرىنشى كەزەڭىندە 71 شاقىرىمعا جۋىق توعىز تاۋ جولىن (تۇيىقسۋ, كىم اسار, گورەلنيكا, جاپون جولى جانە ت.ب.) اباتتاندىرۋ جوسپارلانىپ وتىر. كۇركەلەر قويىلادى, قاۋىپتى جەرلەردە – كىشىگىرىم مەتالل كوپىرلەر مەن جولدار جاسالادى, سونداي-اق بيۆۋاكتارعا ارنالعان ورىندار جايلاستىرىلادى. قاجەت جەرلەردە, بۇرىلىستاردا مارشرۋتتاردىڭ كورسەتكىشتەرى مەن اقپاراتتىق قالقاندار ورناتىلادى. جوبا اياسىندا قالا تۇرعىندارى ءۇشىن جاياۋ جورىقتار, سپورتتىق ءىس-شارالار, ءبىلىم بەرۋ ەكسكۋرسيالارىن ۇيىمداستىرۋ قاراستىرىلعان.
وعان قوسا, الماتىنىڭ وزىندە ەسەنتاي جانە كىشى الماتى (تەررەنكۋر) وزەندەرىنىڭ بويىنداعى سپورتتىق جولداردا سپورت قالاشىقتارى جوندەلەدى, اۋماق اباتتاندىرىلادى.
– وسىدان بەس جىل بۇرىن كومپانيانىڭ 20 جىلدىعىنا وراي ءبىز قازاقستاننىڭ ەلورداسىندا «ترياتلون-پارك» سالىپ, وعان 2 ملن دوللار جۇمسادىق. ءبىز بۇل جوبانىڭ نۇرسۇلتاندىقتارعا ۇناعانىن كورىپ وتىرمىز, ولار جىلدىڭ كەز كەلگەن مەزگىلىندە سپورتپەن شۇعىلدانادى, وندا بۇقارالىق سپورتتىق شارالار ۇيىمداستىرىلادى. ەندى مىنە, كومپانيامىزدىڭ 25 جىلدىعى قارساڭىندا ءبىز ەلىمىزدىڭ ەڭ ارۋ قالاسىنا, سۇيىكتى الماتىمىزعا دا وسىنداي جوبانى سىيعا تارتقانىمىز ءجون دەپ شەشتىك. ءبىز جوبانى كەزەڭدەرگە بولە وتىرىپ, وعان شامامەن 1 ملن دوللار جۇمساۋدى كوزدەپ وتىرمىز: جۇمىستاردىڭ ءبىر بولىگى بيىل, ءبىر بولىگى – الداعى جىلداردا ورىندالاتىن بولادى, – دەيدى BI Group حولدينگى ديرەكتورلار كەڭەسىنىڭ توراعاسى ايدىن راحىمباەۆ.
ۇيىمداستىرۋشىلار «باقىت سوقپاقتارىن» ەكولوگيالىق ءتۋريزمدى دامىتۋعا جانە سپورتتىق ءومىر سالتىن ناسيحاتتاۋعا ستراتەگيالىق ينۆەستيتسيا رەتىندە قاراستىرىپ وتىر. جوبا قالالىق سپورت بەلسەندىلەرىنىڭ قاتىسۋىمەن, جۇمىس توبى اياسىندا پىسىقتالۋدا.
– BI Group ۇسىنعان جوبا قالانى دامىتۋدىڭ جالپى تۇجىرىمداماسىنا وتە ساي كەلەدى. ءبىزدىڭ تاۋلارىمىز – بۇكىل قازاقستاننىڭ قازىناسى. تۋريستەرگە قاجەتتى ينفراقۇرىلىمدى اباتتاندىرىپ قانا قويماي, ولاردىڭ وزىنە عانا ءتان سۇلۋلىعىن ساقتاپ قالۋ دا وتە ماڭىزدى. «باقىت سوقپاقتارى» وسى ماقساتتارعا جەتۋ جولىنداعى ماڭىزدى قادام بولاتىنىنا سەنىمدىمىز, دەدى جوبا تۇساۋكەسەرىندە الماتى قالاسى اكىمىنىڭ ءبىرىنشى ورىنباسارى ەرلان قوجاعاپانوۆ.
– الەمدىك تۋريستىك كارتادا الماتىنىڭ ورنى انىق ايقىندالىپ, ايشىقتالىپ كەلەدى. بۇگىنگى كەزەڭ – تۋريستىك يندۋستريادا جاھاندىق وزگەرىستەر كەزەڭى. پوست-ۆيرۋستىق كەزەڭدە جاڭا باعىتتار, جاڭا ونىمدەر سۇرانىسقا يە بولادى. ساراپشىلار سپورتتىق جانە سالاۋاتتى ءومىر سالتىنا بايلانىستى شىتىرمان وقيعالى تۋريزمگە سۇرانىس ارتادى دەپ بولجاپ وتىر. وسىعان بايلانىستى كوپ جىلدار بويى سپورتشىلار اراسىندا تانىمال بولىپ كەلە جاتقان ءبىزدىڭ تاۋلارىمىز وراسان زور الەۋەتكە يە, – دەدى الماتى قالاسى اكىمدىگى تۋريزم باسقارماسىنىڭ باسشىسى ءسابينا امانكەلدى.
«سوڭعى جىلدارى ءبىز الماتىلىقتار اراسىندا تاۋ سپورتىنا دەگەن قىزىعۋشىلىقتىڭ كۇرت ارتقانىن بايقاپ وتىرمىز. تاۋدا شەتەلدىك تۋريستەردى دە ءجيى كەزدەستىرۋگە بولادى. ءبىزدىڭ تاۋلارىمىز سپورتتى دامىتۋدىڭ حالىقارالىق ورتالىقتارىنىڭ ءبىرى بولۋعا ابدەن لايىق», – دەدى ءوز كەزەگىندە الپينيزم بويىنشا سپورت شەبەرى اندرەي پۋچينين. ونىڭ بۇل تۇجىرىمىمەن قازاقستاننىڭ ەلورداسىندا ترياتلوننان مارافون مەن جارىستار وتكىزۋدىڭ بەلسەندى دە دارا ۇيىمداستىرۋشىسى الەكسەي سيدورەنكو دا كەلىسەدى.
الەكسەي سيدورەنكو قازاقستانداعى BI Marathon جانە BI Ironman حالىقارالىق تانىمالدىلىققا يە ەكەنىن العا تارتا وتىرىپ, جاڭا جوبا شاھار ەكونوميكاسىنىڭ دامۋىنا جاڭا سەرپىن بەرەتىنىنە سەنىمدى ەكەنىن ءبىلدىردى.
الماتى
