ماۋسىمنىڭ 5-ءى كۇنى باتىس قازاقستان وبلىسىندا كوروناۆيرۋس جۇقتىرعان ناۋقاستاردىڭ جالپى سانى 776-عا جەتتى. ونىڭ ىشىندە 344 ادام جازىلىپ شىققان, پروۆيزورلىق ستاتسيوناردا – 32, كارانتيندىك ستاتسيوناردا – 127 ادام جاتىر. ال 1894 ادام ءۇي جاعدايىندا وقشاۋلانىپ, دارىگەر باقىلاۋىنا الىنعان.
- ءبىزدىڭ وڭىردە ەپيدەميولوگيالىق جاعداي تۇراقسىز بولىپ تۇر. بۇرىن ىندەت جۇقتىرعاندار كوبىنە سىرتتان كەلسە, قازىر اۋىرعان اداممەن جاقىن قارىم-قاتىناستان كوروناۆيرۋس جۇقتىرعاندار سانى كوبەيدى. وسىعان وراي بيىلعى 11 مامىرداعى قاۋلىعا وزگەرىس ەنگىزىپ, كەيبىر تىيىم شارالارىن ەنگىزۋگە شەشىم قابىلدادىق, - دەدى مۇحامعالي ارىسپاەۆ وبلىس تۇرعىندارىنا تىكەلەي ەفيردە.
سونىمەن, 6 ماۋسىمنان باستاپ باتىس قازاقستان وبلىسىندا تۇراتىن جەرى بويىنشا وتباسىلىق ءىس-شارالاردى وتكىزۋگە تىيىم سالىنادى. ۋاقىتشا جابىلۋعا جاتپايتىن, رۇقسات ەتىلگەن قىزمەت تۇرلەرىنەن باسقا ۇيىمدار مەن كاسىپورىندار ادەتتەگى جۇمىس رەجيمىن توقتاتىپ, ءوز قىزمەتىن قاشىقتىقتان, ونلاين رەجيمىندە جالعاستىرا الادى.
ورال قالاسىنداعى قوعامدىق كولىك بارلىق سانيتارلىق-ەپيدەميولوگيالىق نورمالاردى ساقتاي وتىرىپ تاڭەرتەڭ ساعات 06.00-دەن 12.00-گە دەيىن, كەشكە ساعات 17.00-دەن 21.00-گە دەيىن عانا جۇرەدى.
ازىق-ت ۇلىك جانە قۇرىلىس ت.ب. بازارلارعا بارلىق سانيتارلىق-ەپيدەميولوگيالىق تالاپتاردى جانە ەپيدەمياعا قارسى ءىس-شارالاردى ساقتاي وتىرىپ دۇيسەنبىدەن بەيسەنبىگە دەيىن ساعات 09.00. مەن 13.00. ارالىعىندا, جۇمادان جەكسەنبىگە دەيىن ساعات 10.00. مەن 16.00. ارالىعىندا جۇمىس ىستەۋگە رۇقسات ەتىلەدى.
مەيرامحانا, اسحانالار كەلۋشى سانىن ءبىر مەزگىلدە 30 ادامنان اسىرماي, بارلىق سانيتارلىق-ەپيدەميولوگيالىق تالاپتى جانە ەپيدەمياعا قارسى ءىس-شارالاردى ساقتاي وتىرىپ جۇمىس ىستەي الادى. سونداي-اق باس سانيتار قوعامدىق تاماقتانۋ نىساندارىندا كالياندى پايدالانۋعا تىيىم سالدى. تىيىمداردىڭ تولىق ءتىزىمى جەرگىلىكتى باق-تار جاريالاندى. بۇل قاۋلى 6 ماۋسىم كۇنى اڭدا كۇشىنە ەنىپ, ازىرگە ماۋسىمنىڭ 15-ىنە دەيىن سوزىلادى.
- الەمدىك تاجىريبە ادامدار تىعىز بايلانىسقان جەردە ۆيرۋستىڭ جۇعۋ قاۋپى جوعارى ەكەندىگىن كورسەتتى. وسىعان بايلانىستى باتىسقازاقستاندىقتاردى ادامدار كوپ جينالاتىن جەرگە بارماۋعا, ۇيىمداسقان جيىندارعا قاتىسپاۋعا, الەۋمەتتىك قاشىقتىقتى ساقتاۋعا, جابىق ءۇي-جايلارعا كىرگەندە مىندەتتى تۇردە بەتپەردە تاعۋعا شاقىرامىز. ەگەر توپتىق جيىندار كەسىرىنەن حالىق اراسىندا كوروناۆيرۋس جۇقپاسىنىڭ تارالۋى انىقتالسا, بۇل زاڭنامامەن قاراستىرىلعان جاۋاپكەرشىلىككە, ءتىپتى قىلمىستىق جاۋاپكەرشىلىككە تارتۋعا اكەلەتىندىگىن ەسكەرتەمىز. تەك كارانتين تالاپتارىن, سانيتارلىق-ەپيدەميالىق رەجيمدى ساقتاۋ ارقىلى عانا ءوزىمىزدى جانە وتباسىمىزدى الەمگە تاراعان بۇل ىندەتتەن قورعاي الامىز, - دەدى مۇحامعالي ارىسپاەۆ.
