– ىندەتتى جۇقتىرۋ ستاتيستيكاسى – پاندەميانىڭ ءالى دە ايىلىن جيماعانىن كورسەتەدى. وسىنى ەسكەرە وتىرىپ, قالانىڭ باس سانيتارلىق دارىگەرى ءارى سانيتارلىق-ەپيدەميولوگيالىق جاعدايعا جاۋاپتى ادام رەتىندە, سوڭعى كەزدەرى الەۋمەتتىك جەلىلەردە تاراپ جاتقانداي, ەلدى ادامدار كوپ جينالاتىن بۇقارالىق شارالار مەن ميتينگكە شاقىرۋعا جول بەرمەۋگە شاقىرامىن, – دەپ مالىمدەمە تاراتتى بۇگىن الماتى قالاسىنىڭ باس سانيتارلىق دارىگەرى جانداربەك بەكشين.
باس سانيتارلىق دارىگەر قالادا ەپيدەميا ءالى دە جالعاسىپ جاتقان كەزدە ادامداردىڭ ءومىرى مەن دەنساۋلىعىنا قاۋىپ ءتوندىرۋ بارىپ تۇرعان جاۋاپسىزدىق ەكەندىگىن العا تارتا كەلە: «الەمدىك تاجىريبە كورسەتىپ وتىرعانداي, كوپشىلىكتىڭ جينالۋى, جاقىن ارالاسۋى ازاماتتاردىڭ ىندەتتى جاپپاي جۇقتىرۋىنا اكەلىپ سوعادى. الەمنىڭ كوپتەگەن ەلدەرىندە وسىلاي بولدى.
ويتكەنى, ميتينگتەر جۇقتىرۋ وشاعى بولىپ تابىلادى. ەگەر, مۇنداي بۇقارالىق شارالار ىندەتتى جۇقتىرۋعا سەبەپشى بولسا, وندا ميتينگتەردى ۇيىمداستىرۋشىلار زاڭناماعا سايكەس جاۋاپقا تارتىلادى, ءتىپتى قىلمىستىق ءىس قوزعالادى.
وسىنداي بۇقارالىق شارالارعا قاتىسۋشىلار ىندەت جۇقتىراتىن بولسا, وندا ەپيدەميولوگيالىق تەكسەرۋ اياسىندا شەتتەتىلەدى», - دەدى ول.
جانداربەك بەكشين COVID-19 جۇقتىرعاندار مەن ولارمەن بايلانىستا بولعاندار, ارالاسقاندار, مەيلى ولار ىندەتتى كوپشىلىك جەردە نەمەسە ۇيدە جۇقتىرسىن, پروۆيزورلىق جانە كارانتيندىك گوسپيتالدا وقشاۋلاناتىندىعىن اتاپ, سانيتارلىق-ەپيدەميولوگيالىق حاتتامانىڭ تالاپتارى وسىنداي, ءبىز ونى مىندەتتى تۇردە ورىندايمىز, دەدى.
الماتى قالاسىنىڭ باس سانيتارلىق دارىگەرىنىڭ ايتۋىنشا, حاتتاماعا سايكەس, سانيتارلىق-ەپيدەميولوگيالىق قىزمەتكەرلەر كارانتين رەجيمىندە جاپپاي جيىندارعا قاتىسقان ازاماتتاردى تىركەپ, ۆيدەوتۇسىرىلىم جۇرگىزەدى.
سونداي-اق ول باق ارقىلى تومەندەگىدەي تەزيستەردى تاراتتى:
ال تىركەۋ قاتىسۋشىلار سانىن ەسەپتەپ, جۇقتىرۋ وشاعىنىڭ ەپيدەميولوگيالىق تەكسەرۋىن ودان ارى جۇرگىزىپ, كوروناۆيرۋستىڭ تارالۋىنىڭ الدىن الۋ ءۇشىن قاجەت.
بۇقارالىق شارالارعا, ميتينگتەرگە قاتىسۋشىلار كوروناۆيرۋس جۇقتىرۋدىڭ ەپيدەميالىق تىزبەگىن قۇرايدى.
وسىنىڭ سالدارىنان ىندەت ءسىزدىڭ ۇيىڭىزگە, وتباسىڭىزعا تارايدى, ەڭ الدىمەن بالالارعا جانە قارت ادامدارعا قاۋىپ توندىرەدى.
مىنە, سوندىقتان مەن بۇرىندارى الماتى قالاسىنىڭ اۋماعىندا ءتۇرلى بۇقارالارىق شارالاردى وتكىزۋگە تىيىم سالۋ جونىندە قاۋلى قابىلداعان ەدىم.
قارت ادامدار مەن بۇرىننان قالىپتاسقان سىرقاتى بار جانداردان ادامدار كوپ جينالاتىن جەرلەردەن اۋلاق ءجۇرۋدى سۇرايمىن. ويتكەنى, ءسىز ىندەتتى تەز جۇقتىراتىندار ساناتىنا جاتاسىز.
بۇدان وزگە, جاپپاي جۇقتىرۋ قاۋپىنىڭ بولۋى مۇمكىن ەكەندىگىن ەسكەرە وتىرىپ, ءتيىستى قىزمەتتەردەن ادامدار كوپ جينالاتىن ورىندارعا دەزينفەكتسيا جۇرگىزۋدى كۇشەيتۋدى تالاپ ەتەمىن.
مەنىڭ تالاپتارىم مەن وتىنىشتەرىم قالانىڭ ءار تۇرعىنىنىڭ دەنساۋلىعىن قورعاۋ مەن سانيتارلىق-ەپيدەميولوگيالىق جاعدايلاردى جاقسارتۋعا نەگىزدەلگەن.
سوندىقتان بارلىق الماتىلىقتاردان سانالىلىق پەن جاۋاپكەرشىلىك تانىتۋدى وتىنەمىن. ويتكەنى, قوعامنىڭ دەنساۋلىعى ارقايسىمىزدىڭ جەكە قاۋىپسىزدىك شارالارىن مۇلتىكسىز ورىنداۋىمىزدان قۇرالادى.
