كوروناۆيرۋس • 05 ماۋسىم، 2020

كەي وڭىردە ۆيرۋس ءورشي ءتۇستى

104 رەت كورسەتىلدى

كەشە دەنساۋلىق ساقتاۋ ءمينيسترى ەلجان ءبىرتانوۆ ورتالىق كوممۋنيكاتسيالار قىزمەتىندە «كوروناۆيرۋس پاندەمياسىنا قارسى شارالار» تاقىرىبىندا ونلاين بريفينگ وتكىزىپ، ۆيرۋس تارالۋىنىڭ اعىمداعى جاعدايىنا توقتالدى.

سيمپتومسىز ناۋقاستار ۇيدە وقشاۋلانادى

ەڭ الدىمەن ە.ءبىرتانوۆ كورو­نا­ۆيرۋس ينفەكتسياسى بويىنشا اعىم­داعى جاعدايعا توقتالدى. «بۇگىندە ەلىمىزدە كوروناۆيرۋس ين­فەك­تسياسىن 12124 ادام جۇق­تىر­دى. ولاردىڭ 77%-ى – سيمپتومسىز ناۋقاستار. سوعان قاراماستان بارلىق تىركەلگەن ازاماتتارعا تولىق مەديتسينالىق دياگنوستيكالىق كومەك مەملەكەت تاراپىنان تەگىن بەرىلەدى. ەم حالىقارالىق ارىپتەستەرمەن اقىلداسقان عىلىمي جۇمىستارعا نەگىزدەلگەن كلينيكالىق حاتتاما ارقىلى جۇرگىزىلەدى. بۇل حاتتامانى ەلىمىزدىڭ ەڭ بەلگىلى عالىمدارى ازىرلەپ، بەكىتكەن. ەپيدەميا باستال­عاننان بەرى 8 رەداكتسيادان ءوتتى. سول ەم-دومنىڭ ناتيجەسىندە 52% (6288) ناۋقاس جازىلىپ شىقتى. ال 5836 پاتسيەنت باقىلاۋدا»، دەدى ول.

ەلىمىزدىڭ باس دارىگەرى جاقىندا عىلىمي-زەرتتەۋ جۇمىستارىنىڭ نەگىزىندە ەلىمىزدە كوروناۆيرۋسقا قارسى شارالاردىڭ تاكتيكاسى وزگەرگەنىن جەتكىزدى. ياعني وسى اپتادان باستاپ ۆيرۋس انىقتالعانىمەن اۋرۋ بەلگىلەرى بولماعان ناۋقاستار ءۇي كارانتينىندە بولادى. «جاڭا تاكتيكا حالىقارالىق ستاندارتتارعا دا ساي كەلەدى. بۇل – سيمپتومسىز ناۋقاستاردى اۋرۋحانالارعا جات­قىز­باي، ءۇي كارانتينىنە الۋ. ولار جەر­گىلىكتى ەمحانالارداعى ۋچاسكەلىك دارىگەرلەردىڭ باقىلاۋىندا بولادى. قازىرگى ۋاقىتقا دەيىن سونداي جەڭىل دەڭگەيدەگى ناۋقاستار ينفەكتسيالىق اۋرۋحانالاردا جاتىر. وسى اپتادان باستاپ وسى حاتتامانى ەنگىزدىك. قازىر ستاتسيوناردا جاتقان 5836 ناۋ­قاس­تىڭ 59-ىنىڭ (1%) ءحالى ناشار. 600-دەي (10%) پاتسيەنتتىڭ جاع­دا­يى ورتاشا دەڭگەيدە. تاعى
10%-­نىڭ اۋرۋى جەڭىل بولسا، 78%-ى (4500 ادام) – سيمپتومسىز»، دەدى ە.ءبىرتانوۆ.

كەيبىر وسىنداي اۋرۋ بەلگىلەرى ەش بايقالماعان ناۋقاستاردىڭ اۋرۋحاناعا جاتۋدان باس تارتىپ جاتقانىن ايتقان مينيستر: «مۇنى دۇرىس ءتۇسىنۋ كەرەك. ول ينفەكتسيانى باسقالارعا جۇقتىرۋى مۇمكىن. سوندىقتان ولاردىڭ اۋرۋحانادا نەمەسە ۇيدە ءوز ءوزىن وقشاۋلاۋى وتە ماڭىزدى»، دەدى.

 

جاڭا كارانتيندىك شارالاردى ەنگىزۋگە قۇقىمىز بار

دەنساۋلىق ساقتاۋ ءمينيسترى كوروناۆيرۋس ءورشي تۇسكەن وڭىرلەردى اتادى. «سوڭعى ەكى اپتادا كارانتين شارالارىنىڭ بوساۋىنا بايلانىس­تى كەيبىر وڭىرلەردە ناۋقاستاردىڭ سانى كوبەيىپ كەلەدى. 15-24 مامىر ارالىعىندا جاڭادان 2800 ناۋقاس تىركەلسە، 25 مامىردان شىلدەنىڭ 3-ىنە دەيىن ۆيرۋس جۇقتىرعانداردىڭ سانى 3،5 مىڭعا جەتتى. ياعني ءوسىم 25%-عا كوتەرىلدى. اتاپ ايتقاندا، ءوسىم دەڭگەيى 6 وڭىردە جوعارى. جاقىندا عانا ۆەدومستۆوارالىق كوميسسيانىڭ وتىرىسى ءوتتى. كەيبىر وڭىرلەر بويىنشا ءبىز اقپارات بەرىپ جاتىرمىز. مىسالى، ماڭعىستاۋ، باتىس قازاقستان، قىزىلوردا، شى­عىس قازاقستان وبلىستارىندا جو­عارى ءوسىم بولعان. بىراق قا­زىر جاعداي تۇراقتالىپ كەلە جاتىر. سول سياقتى نۇر-سۇلتان قالا­سىن­دا دا ءبىراز ءوسىم بولدى. بۇل قازىر 2 پايىزعا تومەندەدى»، دەدى ە.ءبىرتانوۆ.

ءار وڭىردە ەپيدەميالىق جاع­داي­عا بايلانىستى ەرەكشە شەكتەۋ شارالارى ەنگىزىلەتىنىن اتاپ وتكەن ە.ءبىرتانوۆ: «وڭىرلەردە شەك­تەۋ شارالارىن ەنگىزۋگە باس سانيتارلىق دارىگەرلەردىڭ قۇقىق­تا­رى بار. ارنايى شەكتەۋلەر ءوسىم دەڭگەيى جوعارى اۋداندارعا ەنگى­زى­لە­دى. مىسالى، اتىراۋ وبلىسىنىڭ ءبىر عانا تەڭىز كەنىشىندە ءوسىم جوعارى بولىپ، باسقا ەلدى مەكەندەردە جاعداي دۇرىس بولعاننان كەيىن تەك قانا سول اۋدانعا شەكتەۋ شارالارى ەنگىزىلەدى. ءبىز سانيتارلىق قىزمەت رەتىندە ازاماتتارىمىزدىڭ دەنساۋلىعى مەن ءومىرىن قورعاۋعا شاقىردىق، قاجەت بولعان جاعدايدا جاڭا كارانتيندىك شارالاردى كۇشەيتۋگە جانە ەنگىزۋگە قۇقىمىز بار»، دەدى.

 

سوڭعى جاڭالىقتار

ۇقساس جاڭالىقتار