ايماقتار • 04 ماۋسىم، 2020

ورالدا تالاپتى ساقتاماعان بىرنەشە نىسان قايتا جابىلدى

27 رەت كورسەتىلدى

«ورال قالاسىندا سانيتارلىق-دەزينفەكتسيالىق تالاپتاردى ورىنداماعان 1 ساياباق، 1 كافە، 2 ساۋدا ءۇيى جانە 3 قوعامدىق كولىك مارشرۋتى جۇمىسىن ۋاقىتشا توقتاتتى» دەپ حابارلادى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز قىزمەتى.

باتىس قازاقستان وبلىسىندا كارانتين رەجىمى توقتاتىلعانىمەن، سانيتارلىق تالاپتاردى قاتاڭ ساقتاۋ قاجەتتىگى حالىققا قىزمەت كورسەتەتىن بارلىق نىساندارعا ەسكەرتىلگەن بولاتىن. ويتكەنى وڭىردە ىندەت ءالى ءورشىپ تۇر. 4 ماۋسىم كۇنى تاڭەرتەڭ جاڭادان تاعى 22 ادام ۆيرۋس جۇقتىرعانى بەلگىلى بولدى. بارلىعى دا ورال قالاسى تۇرعىنى. وسىلايشا وڭىردە كوروناۆيرۋستى جۇقتىرعان ادام سانى 754-كە جەتتى.

وڭىردە سانيتارلىق-ەپيدەميولوگيالىق تالاپتاردىڭ قاتاڭ ساقتالۋى قاجەتتىگىن ۆەدومستۆوارالىق كوميسسيا وتىرىسىندا پرەمەر-ءمينيستردىڭ ورىنباسارى ەرالى توعجانوۆ تا ەسكەرتكەن بولاتىن.

«جەرگىلىكتى اكىمدىكتەر سانيتارلىق-ەپيدەميولوگيالىق تالاپتاردىڭ ساقتالۋىن قاتاڭ قاداعالاۋى ءتيىس. ەگەر بيزنەس نىساندارى ونى ساقتامايتىن بولسا، ۋاقىتشا جاۋىپ، ءتارتىپتى قالپىنا كەلتىرۋ قاجەت. بۇل ءبىزدىڭ ازاماتتارىمىزدىڭ قاۋىپسىزدىگى ءۇشىن كەرەك» دەگەن ەدى ەرالى توعجانوۆ.

وڭىردە وسى تالاپتاردىڭ ورىندالۋىن باقىلاۋ ءۇشىن باتىس قازاقستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى، ورال قالالىق باسقارما قىزمەتكەرلەرى، قالالىق اكىمدىك ماماندارى جانە پوليتسيا قىزمەتكەرلەرىنەن قۇرالعان مونيتورينگتىك توپ نىسانداردىڭ كارانتين جاعدايىندا سانيتارلىق تالاپقا ساي جۇمىس ىستەۋىن تەكسەرىپ، كۇن سايىن رەيد جۇرگىزىپ كەلەدى.

- باتىس قازاقستان وبلىسى باس مەملەكەتتىك سانيتارلىق دارىگەرىنىڭ قاۋلىسى بويىنشا، اۋدانى 2000 شارشىمەتردەن اساتىن ساۋدا نىساندارىندا بارلىق سانيتارلىق-ەپيدەميولوگيالىق تالاپتار جانە ەپيدەمياعا قارسى ءىس-شارالار ساقتالۋى ءتيىس. ياعني جەكە قورعانۋ قۇرالدارى – بەتپەردە، قولعاپ، سانيتايزەر، انتيسەپتيك سانى جەتكىلىكتى بولۋى، ءۇي-جايعا دەزينفەكتسيا جانە جەلدەتۋ جۇرگىزىلۋى، كەمىندە ءبىر مەتر ارا قاشىقتىقتى ساقتاي وتىرىپ 5 ادامنان ارتىق كەزەكتىڭ پايدا بولۋىنا جول بەرمەۋى ءتيىس. سونداي-اق كەلۋشىلەردىڭ جاي-كۇيىنە تۇراقتى مونيتورينگ جۇرگىزۋ ءۇشىن نىسانداردىڭ كىرە بەرىسىندە قاشىقتىق تەرمومەتريا (قول تەپلوۆيزورى) بولۋى ءتيىس، - دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ءباسپاسوز حاتشىسى ادەمى عيبراتقىزى.

ال مەيرامحانا-اسحانا سەكىلدى قوعامدىق تاماقتانۋ ورىندارىندا كەلۋشىلەر سانى ءبىر مەزگىلدە 30 ادامنان اسپاۋى، كەلۋشىلەر اراسىندا ءبىر مەتر ارا قاشىقتىقتى ساقتاۋ، 5 ادامنان ارتىق كەزەكتىڭ پايدا بولۋىنا جول بەرمەۋ، ۇستەلدەردىڭ اراسىنداعى قاشىقتىق كەمىندە 2 مەتر بولۋى، ءبىر ۇستەل باسىندا وتىرۋشىلار ءبىر وتباسىن قوسپاعاندا 4 ادامنان اسپاۋى ءتيىس دەگەن سىندى تالاپتار قاداعالانۋدا.

وسىنداي تەكسەرۋ بارىسىندا ورال قالاسىنداعى كەيبىر نىساندار كورسەتىلگەن تالاپتاردى ورىندامايتىندىعى انىقتالعان. وسىلايشا، رەيد بارىسىندا بەتپەردە تاقپاعان جانە سانيتارلىق-دەزينفەكتسيالىق رەجيم تالاپتارىن ساقتاماعان 1 ءدامحانا جانە كەلۋشىلەردىڭ جاي-كۇيىنە تۇراقتى مونيتورينگ جۇرگىزۋ ءۇشىن قول تەپلوۆيزورىن الماعان، ادامداردىڭ ءبىر جەرگە كوپ جينالۋىنا، كەزەكتە اراقاشىقتىقتىڭ ساقتالماۋىنا، كەلۋشىلەردىڭ بەتپەردەسىز كىرۋىنە جول بەرگەن جانە قىزمەت كورسەتۋشىنىڭ وزدەرى دە بەتپەردە تاقپاعان 2 ساۋدا ءۇيى ۋاقىتشا جابىلدى. وبلىس تۇرعىندارىنىڭ سۇيىكتى دەمالىس ورنى – ورتالىق ساياباق تا ۋاقىتشا جابىق. سونداي-اق قالالىق №3، 10، 35 باعىتتاعى قوعامدىق كولىك مارشرۋتى كەمشىلىكتەرىن جويعانشا جۇمىسىن ۋاقىتشا توقتاتتى.

 

باتىس قازاقستان

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار