ونلاين باس قوسۋدىڭ پلەنارلىق وتىرىسىندا الدىمەن قۇتتىقتاۋ ءسوزدى قازۇاۋ رەكتورى, اكادەميك تىلەكتەس ەسپولوۆ الدى. وتىرىسقا ەۋروپا, ازيا مەن اقش-تىڭ 100 شاقتى ۋنيۆەرسيتەتى مەن عىلىمي ورتالىقتارىنىڭ وكىلدەرى قاتىسىپ, 24 شەتەلدىك ساراپشى ءسوز الدى. ونىڭ ىشىندە بولگارياداعى انگەل كنچەۆ اتىنداعى رۋسەنسك ۋنيۆەرسيتەتىنىڭ رەكتورى ح.بەلوەۆ تا بار.
جازعى مەكتەپ 14 باعىت بويىنشا ۇيىمداستىرىلسا, تەك قانا اكادەميك س.كەشۋوۆ جەتەكشىلىك ەتكەن «يننوۆاتسيالىق تەحنولوگيالار جانە اۋىلشارۋاشىلىعىنداعى تەحنيكالىق قۇرالدار» باعىتىنا 150-دەن استام قازاقستان, ارمەنيا, بەلارۋسسيا, بولگاريا, قىرعىزستان, رەسەي جانە وزبەكستاننىڭ ماگيسترانتتارى قاتىستى.
قر پرەزيدەنتى قاسىم-جومارت توقاەۆتىڭ تاپسىرمالارىنا سايكەس, مەملەكەتىمىزدىڭ الدىندا اگرووندىرىستىك كەشەندەرى سالاسىندا تسيفرلاندىرۋ جانە يننوۆاتسيالىق تەحنولوگيالار مەن تەحنيكالىق قۇرالداردى مەڭگەرۋ مىندەتى تۇر. سوندىقتان بيىلعى حالىقارالىق جازعى مەكتەپتىڭ مىندەتى مەن ماقساتى دا «يننوۆاتسيالىق تەحنولوگيالار جانە اۋىلشارۋاشىلىعىنداعى تەحنيكالىق قۇرالدار» تاقىرىبىنىڭ اۋقىمىن كەڭەيتۋ بولدى.
وسىعان سايكەس, جازدىق مەكتەپ «اگرووندىرىستىك كەشەندەردەگى ات-تەحنولوگيالار, اۆتوماتتاندىرۋ مەن مەحانيزاتسيا» فاكۋلتەتىن دامىتۋدىڭ بۇگىنگى جاعدايى مەن كەلەشەگىنە قاتىستى ساۋالداردى قامتىدى. سونداي-اق قازاقستان-بەلارۋسسيا اگروينجەنەرلىك يننوۆاتسيالىق ورتالىعى مەن جوعارىكۆاليفيكاتسيالىق ينجەنەرلىك كادرلار دايىنداۋداعى عىلىمي-وندىرىستىك اگروينجەنەريا ورتالىعىنىڭ, اۋىلشارۋاشىلىعىنداعى اقپاراتتىق-تسيفرلىق تەحنولوگيالار, اۋىلشارۋاشىلىعىنا ارنالعان ماشينالار مەن قۇرالدار, ماشينالاردىڭ دياگنوستيكاسى مەن رەسۋرسىن كوتەرۋ, ەنەرگيا ۇنەمدەۋ, كۇن ەنەرگياسى, ينجەنەرلىك ەكولوگيا سىندى باسقا دا سالالىق ماسەلەلەر تالقىلاندى.
جازعى مەكتەپكە قاتىسۋشىلار اسىرەسە, انگەل كنچەۆ اتىنداعى رۋسەنسك ۋنيۆەرسيتەتىنىڭ پروفەسسورى پ.داسكالوۆتىڭ ناقتى اۋىلشارۋاشىلىعىندا يننوۆاتسيالىق اقپاراتتىق جانە كومپيۋتەرلىك تەحنولوگيالاردى باسقارۋعا بايلانىستى پروبلەمالىق ماسەلەلەرگە قۇرىلعان لەكتسيالارىنا قىزىعۋشىلىق تانىتتى.
سونىمەن قاتار تاشكەنت اگرارلىق ۋنيۆەرسيتەتىنىڭ پروفەسسورى ي.ساپاەۆ, ك.ي.سكريابين اتىنداعى قىرعىز ۇلتتىق اگرارلىق ۋنيۆەرسيتەتىنىڭ پروفەسسورلارى ى.وسمونوۆ پەن ن.تەميرباەۆ, الماتى ەنەرگەتيكا جانە بايلانىس ۋنيۆەرسيتەتىنىڭ پروفەسسورى ي.الديبەكوۆ, عىلىمي-وندىرىستىك اگروينجەنەريا ورتالىعىنىڭ پروفەسسورلارى و.جورتۋىلوۆ پەن ت.ءابىلجان ۇلى لەكتسيا وقىدى.
وسى ارادا جازعى مەكتەپكە قاتىسۋشىلار مەن لەكتورلاردىڭ جوعارى دەڭگەيدە ۇيىمداستىرۋشىلىق تانىتقانىن اتاپ وتكەن ءجون. ولاردىڭ ارقايسىسى دا اگرارلىق سەكتور ارقىلى ءوز ەلدەرىنىڭ دامۋىنا مۇددەلەستىك تانىتتى.
ال لەكتسيا ماتەريالدارى عىلىمي-زەرتتەۋ جۇمىستاردى جۇرگىزۋ مەن تاجىريبەلىك مىندەتتەردى شەشۋ بارىسىندا قولدانىلادى. ەڭ باستىسى, حالىقارالىق جازدىق مەكتەپتىڭ اتموسفەراسىنىڭ ءوزى قاتىسۋشىلارعا ءوزارا تىعىز دوستىق بايلانىس ورناتىپ, سەلبەسىپ جۇمىس ىستەۋىنە ۇزاق جىلدارعا جول اشادى.
سونىمەن قاتار حالىقارالىق جازعى مەكتەپ-2020-عا قاتىسۋشىلار STARTUP جوبالارىنا قاتىسۋعا, اۋىلشارۋاشىلىعى سالاسى مەن تەحنيكالىق عىلىمداعى ىرگەلى جانە قولدانبالى زەرتتەۋلەردىڭ وزەكتى ماسەلەلەرىنە ارنالعان عىلىمي ماقالالالارىن قازاق ۇلتتىق اگرارلىق ۋنيۆەرسيتەتىنىڭ عىلىمي جۋرنالىندا جاريالاۋعا مۇمكىندىك الادى.
ال جازدىق مەكتەپتى ونلاين تۇرىندە وتكىزۋ دە ءوز كەزەگىندە زاماناۋي اقپاراتتىق تەنولوگيالاردىڭ جەتىستىكتەرى مەن قاشىقتان ءبىلىم بەرۋ فورماتىنىڭ تەحنيكالىق مۇمكىندىكتەرىن پايدالانۋعا جول اشىپ قانا قويماي, ونىڭ گەوگرافيالىق اۋقىمىن دا ۇلعايتتى. ونلاين مەكتەپتە قازىرگى اۋىلشارۋاشىلىعى ءوندىرىسىنىڭ ماسەلەلەرىنە قاتىستى ساۋالدارعا جاۋاپتار بەرىلدى.
الماتى
