بۋنكەرلەر, جەكە ۇشاقتار مەن رەانيماتسيالار. بۇگىنگى الەم بايلارىنىڭ ۇرەيىنە اراشا, ومىرىنە وزەك بولاتىن قۇندى م ۇلىكتەردىڭ قاتارىندا. وعان مەحانيكالىق جەلدەتكىشتى قوسىڭىز. قۇنى تەڭگەگە شاققاندا 1,5 ملن-نان باستالىپ 15 ملن-عا دەيىن جەتەتىن اۋا تازارتاتىن اپاراتتار بۇگىندە ۇلكەن سۇرانىسقا يە. ۆيرۋس جۇقتىرعان جاعدايدا بۇل باعا ءزاۋلىم ۇيلەرى مەن كەڭسەلەرىن ەمحانا ەسەبىندە پايدالانىپ, مەديتسينالىق قۇرالدارمەن جابدىقتاۋدى ويلاعان داۋلەتتىلەردى شوشىتا العان جوق. قابات-قابات دوللارلارىن دەنساۋلىعى ءۇشىن قۇربان ەتكەن اۋقاتتىلاردىڭ بۇل ءىسى الدىمەن وزدەرىنىڭ كوڭىلىنە دەمەۋ بولسا, ەكىنشىدەن ەل ەكونوميكاسىن داعدارىستان قۇتقارۋدىڭ توتە جولىنداي كورىندى.
ءيا, بۇل نەگىزىنەن ءدال وسى كۇردەلى كەزەڭدە ەكونوميكاسىن تۇرالاتپاۋعا تىرىسقان مەملەكەتتەردىڭ بايلىعىن بانككە باسقانداردان اقشا سۋىرۋدىڭ امالى سىندى. «جەكە ۇشاقتى جالعا الىڭىز!», «VIP بولمەگە تولەڭىز!», «ميلليونداردى جەلدەتكىشكە جۇمساڭىز!» سەكىلدى پافوسقا تولى جارنامالار الەۋمەتتىك جەلىدە جەلدەي ەسىپ, جاڭبىردان كەيىنگى ساڭىراۋقۇلاقشا قاپتادى. ارينە, جىلتىراققا جانى قۇشتار جاقىبايلار ۇكىمەت ۇسىنعان تاۋارعا ماگنيتتەي جابىسۋدا. جاپاتارماعاي جابىلا ساتىپ الىپ جاتىر. ءتىپتى الدى 8 ايلىق كەزەكتە تۇرعان كورىنەدى. ماسەلەن, رەسەيدە حيرۋرگيا, رەانيماتسيا جابدىقتارىن ساتاتىن كومپانيالار جەكە تۇتىنۋشىلاردان تۇسكەن سۇرانىستاردىڭ كوپتىگىن حابارلادى. امەريكالىق وندىرۋشىلەر سوڭعى كەزدە ءپورتاتيۆتى جەلدەتكىشتەرگە قىزىعۋشىلىقتىڭ ارتقانىن ايتادى. ال يتاليالىق دارىگەرلەر قۇرىلعى جەتىسپەي جاتقانىنا نارازى. كەيبىر دامۋشى مەملەكەتتەر جان ساۋعالار جەر تاپپاي الەككە تۇسۋدە.
ماماندار اۋرۋحانادان تىس رەانيماتسيالىق بولىمشەلەر قۇرۋ مۇمكىن ەمەستىگىن ءتۇسىندىرىپ باعۋدا. الايدا وعان تۇتىنۋشىلار كونەر ەمەس. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى ۇيدەگى جەلدەتكىشتەردىڭ كومەكتەسپەيتىنىنە سەنىمدى. قاتتى اۋىرعان ناۋقاس قارقىندى تەراپيا مەن ۇنەمى مەديتسينالىق باقىلاۋدى قاجەت ەتەدى. بۇل پىكىردى وتاندىق دارىگەرلەر دە قۇپتاپ وتىر.
ويلاپ قاراڭىز, بۋنكەرلەردىڭ باعاسى 60 ملن تەڭگەدەن باستالادى. 30 ملن-عا بولمەنى باكتەريالاردان ساقتايتىن ارنايى بروندالعان ەسىكتەر مەن تەرەزەلەر ساتىپ الۋعا مۇمكىندىك بار. الەم باسىلىمدارى «نيۋ-يوركتەگى ەليتا اراسىنداعى شىنايى شايقاس – اۋرۋحانا توسەگىن رەزەرۆتەۋ», دەپ جازۋدا. وسىدان-اق قوعامنىڭ جاي-كۇيىن اڭداۋعا بولاتىنداي. اقشا نە ىستەتپەيدى دەپ ابدىراپ قالاسىز.
كارانتين كەزىندە جەكە اۋەكومپانيالارىنىڭ جۇمىسى جاندانا تۇسكەندەي. ولاردىڭ قىزمەتىنە كۇننەن-كۇنگە سۇرانىس ارتىپ كەلەدى. تۇتىنۋشىلاردى قىزىقتىرۋ ءۇشىن فلوريدا شتاتىنداعى «South Jet» چارتەرلىك كومپانياسى ء«وزىڭىزدى كوروناۆيرۋستان قورعاڭىز – جەكە ۇشاقتا ۇشىڭىز. بۇگىنگى كىتاپ!» جوباسىن قولعا العان. ءىرى كومپانيالار مەن اۋقاتتى وتباسىلار ۆيرۋس جۇقتىرماۋ ءۇشىن جەكە ۇشاقتاردى ءجيى پايدالانادى. ماسەلەن, گونكونگتان ءبىر وتباسى باليگە, ال گولليۆۋد كينوستۋدياسى توكيودان لوس-اندجەلەسكە 50 ادامعا رەيس ۇيىمداستىرىپتى. نيۋ-يوركتەن لوندونعا بارۋ ءۇشىن 12 جولاۋشى سياتىن شاعىن ۇشاقتار شامامەن 140 مىڭ اقش دوللارى تۇرادى. تولىق جۇكتەمە كەزىندە ءبىر ادامعا 12 مىڭ اقش دوللارىنان كەلەدى. سونىمەن قاتار ادامدار ءوزىن-ءوزى وقشاۋلاۋ ءۇشىن ياحتالاردى جالداپ, تەڭىزگە ساياحاتتاۋدا. ءبىر ايلىق ازىق-ت ۇلىگىن الىپ, وتباسىمەن ەلدەن جىراققا كەتكەندەردىڭ دە قاراسى مول.
ال قازاقستاننىڭ بايلارى قايتتى ەكەن دەگەن ساۋال سىزگە دە مازا بەرمەي تۇرعان بولار. ارينە, بۇل سۇراقتىڭ جاۋابى اسا قيىن دا ەمەس. بۇل جولى بايلار جاز شىعا عانا دەمالۋعا باراتىن قالا سىرتىنداعى ءزاۋلىم ۇيلەرىنە ەرتە كوكتەمدە جايعاستى. قىمبات انتيسەپتيكتەر مەن تۇماۋعا قارسى ءدارى-دارمەكتەردى ءۇيىپ-توگىپ العان ەل ازاماتتارى ۆيرۋستان وسىلايشا قورعانۋدى ءجون دەپ ساناعان سىڭايلى.
اللاعا شۇكىر, بىزدەگى احۋال شەتەلدەگىدەي شەكتەن شىعىپ تۇرعان جوق. سودان دا بولار, ەۋروپادان ءورىس ىزدەگەن قازاقتار ەلگە ورالىپ جاتىر. بىزگە قىزىعى, ولار ىندەت جايلاعان ەۋروپاعا بيىل بارا قويار ما ەكەن؟
