سۋرەتتەردى تۇسىرگەن ەلۆيرا مەڭدىعالي
1 ماۋسىم – بالالاردى قورعاۋدىڭ حالىقارالىق كۇنىمەن تۇسپا تۇس كەلگەن قونىستويدا جاڭا پاتەرلەردىڭ كىلتىن جۇزدەرى قۋانىشتان بال-بۇل جانعان بۇلدىرشىندەر الىپ جاتتى.
- بۇكىل الەمدى ابىگەرگە سالعان پاندەميا كەزىندە ەلىمىزدىڭ ازاماتتارىن قولداۋ, قورعاۋ ماقساتىندا كەشەندى شارالار جاسالدى. مەملەكەت پرەزيدەنتى قابىلداعان شەشىمدەردىڭ ارقاسىندا قۇرىلىس سالاسىنىڭ قارقىنى تيتتەي دە باسەڭدەگەن جوق. ءتىپتى جاڭا جۇمىس ورىندارى اشىلىپ جاتتى. سونىڭ ناتيجەسىندە بۇگىن ءبىر توپ جەرلەستەرىمىز قونىس تويىن تويلاعالى وتىر, - دەدى جاڭا ءۇيدى تۇرعىندارعا تاپسىرۋ سالتاناتىندا ءوڭىر باسشىسى عالي ەسقاليەۆ.
راسىندا دا جاڭا ءۇيدىڭ تۇساۋى بالالار مەرەكەسىمەن تۇسپا-تۇس كەسىلۋى تەگىن ەمەس ەكەن. بۇيىرسا بۇل ءۇيدىڭ اۋلاسىندا ەندى 400-دەي ءبۇلدىرشىننىڭ شات كۇلكىسى ەستىلەتىن بولادى.
- ەلىمىزدىڭ بولاشاعى – وسكەلەڭ ۇرپاق. بالالارىمىز جايلى پاتەردە, جاراقتى ۇيدە تۇرۋى, زاماناۋي بالاباقشادا ءوسىپ, مىقتى مەكتەپتە ءبىلىم الۋى – ءبىزدىڭ باستى مىندەتىمىز بولۋى ءتيىس. حالىق تۇرمىسىنىڭ ساپاسىن ارتتىرۋ ماسەلەسىنە پرەزيدەنتىمىز ەرەكشە كوڭىل بولەدى. سوندىقتان دا ءار وتباسىن پاتەرمەن قامتاماسىز ەتۋ – ەل دامۋىنىڭ نەگىزگى باعىتىنا اينالعان, - دەيدى وبلىس اكىمى.
ورال قالاسىنىڭ جاڭا ءۇي پايدالانۋعا بەرىلگەن سولتۇستىك-شىعىس ايماعى سوڭعى جىلدارى ەرەكشە دامىپ كەلە جاتىر. تاياۋ بولاشاقتا بۇل جەردە جاڭا مەكتەپ بوي كوتەرمەك. شاعىن اۋداننىڭ ىشكى جولدارى تولىق جاڭارتىلىپ, جاڭاشا اباتتاندىرىلماق.
ورال قالاسى اكىمىنىڭ ورىنباسارى ميراس مۇلكايدىڭ ايتۋىنشا, تاياۋدا وسى اۋداندا 104 پاتەرلىك تاعى ءبىر ءۇي پايدالانۋعا بەرىلەدى. جالپى 2020 جىلى باتىس قازاقستان وبلىسىندا «نۇرلى جەر» باعدارلاماسى بويىنشا تۇرعىندارعا 1800 پاتەر تاپسىرىلعالى وتىر. وتكەن جىلى مۇنداي پاتەردىڭ سانى 1080 بولسا, قۇرىلىس قارقىنى ەكى ەسەگە جۋىق ارتقانىن بايقاۋعا بولادى. ءدال وسى «نۇرلى جەر» باعدارلاماسىن جۇرگىزۋ ءۇشىن ورال قالاسىنداعى تۇرعىن ءۇي قۇرىلىسىنا 15 ملرد تەڭگە بولىنگەن. بۇل كوپقاباتتى 8 ءۇي, 485 مىڭ شارشىمەتر باسپانا دەگەن ءسوز. بۇعان اۋىلدىق جەردە تاپسىرىلاتىن 88 قوسىلعاندا, تىشقان جىلى قونىس تويىن 1830 وتباسى تويلايدى ەكەن.
