ايماقتار • 01 ماۋسىم، 2020

ەلىمىزدە بالالارعا ارنالعان دەپوزيت ىسكە قوسىلدى (ۆيدەو)

505 رەت كورسەتىلدى

حالىقارالىق بالالاردى قورعاۋ كۇنىنە وراي، تۇرعىن ءۇي قۇرىلىس جيناق بانكى («بايتەرەك» حولدينگىنىڭ ەنشىلەس ۇيىمى) جاعىمدى جاڭالىعىمەن ءبولىسىپ وتىر. بانك جاڭا ءونىم ءتۇرى - «ارناۋ» بالالار دەپوزيتىن ىسكە قوستى. ەندى بارشا قازاقستاندىقتار پاتەرلەرىن نەسيەگە جىلدىق 2% مولشەرلەمەمەن ساتىپ الۋ مۇمكىندىگىنە يە بولادى. ول ءۇشىن قاراجاتتى بالالىق شاقتان باستاپ جيناقتاي باستاعان ءجون.

«ارناۋ» دەپوزيتىنىڭ ەڭ تومەنگى جيناقتاۋ مەرزىمى 10 جىلدى قۇرايدى. وسى ۋاقىت ىشىندە سالىمشى ءوز شوتىندا بولاشاق پاتەر باعاسىنىڭ 50%-ىن جيناۋى قاجەت. ونىڭ جيناعان قاراجاتىنا جىل سايىن جىلدىق 2% مولشەرىندە بانك سىياقىسى مەن 20% كولەمىندە مەملەكەت سىيلىقاقىسى تۇسەدى (200 اەك-تەن اسپايتىن سوماعا ەسەپتەلىنەدى). وسىنىڭ ەسەبىنەن، دەپوزيتتىڭ كىرىستىلىگى ءبىر جىل ىشىندە جىلدىق 6%-عا دەيىن جەتەدى.

ەڭ از جيناقتاۋ مەرزىمى وتكەننەن كەيىن، «ارناۋ» دەپوزيتىنىڭ يەسى جىلدىق مولشەرلەمەسى 2%-دى قۇرايتىن تۇرعىن ءۇي زاەمىن الا الادى. زاەم تەك كامەلەت جاسىنا جەتكەن، ياعني، 18-گە تولعان جانە ودان اسقان بالالاردىڭ اتىنا راسىمدەلەدى.

– تۇرعىن ءۇي قۇرىلىس جيناق بانكىندە بۇعان دەيىن دە ءسابي دۇنيەگە كەلىسىمەن ونىڭ بولاشاق ۇيىنە اقشا جيناۋ ءۇشىن شوت اشۋعا بولاتىن. بۇگىندە بانكتە ءدال وسىنداي 140،8 مىڭنان استام شوت بار. ەندى، مىنە، كليەنتتەرىمىزگە تيىمدىرەك بولۋ ءۇشىن، ءبىز بالالار دەپوزيتىن بولەك ءبىر ءونىم رەتىندە ۇسىنۋدى ءجون كوردىك. «ارناۋ» دەپوزيتى بويىنشا بەرىلەتىن نەسيە مولشەرلەمەسى 2%-عا دەيىن تومەندەتىلگەن. بۇل دەپوزيت يەلەرى ءۇشىن – قاجەتتى قاراجاتتى جيناقتاپ، جاس كەزدەن-اق باسپانالى بولۋدىڭ تاماشا مۇمكىندىگى. ءدال وسىنداي 2 پايىزدىق تومەنگى مولشەرلەمەمەن بۇگىندە تەك «باقىتتى وتباسى» باعدارلاماسى اياسىندا عانا نەسيە بەرىلەدى. الايدا، وعان بارلىق ازاماتتار قاتىسا المايدى. ال «ارناۋ» دەپوزيتى بولسا، بارشا قازاقستاندىقتار ءۇشىن قولجەتىمدى. بالالار تەز وسەدى. ولاردىڭ شوتىنا قازىردەن باستاپ اقشا سالا باستاساق، كەمىندە 10 جىلدان كەيىن باستاپقى جارنانى دا جيناپ قويۋعا بولادى. ال بالا ەسەيگەن كەزدە، تابىسى كوپ بولماسا دا، ەڭ تومەنگى مولشەرلەمەمەن پاتەر ساتىپ الا الادى، – دەپ اتاپ ءوتتى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا. 

تۇرعىن ءۇي قۇرىلىس جيناق بانكىنىڭ دەپوزيتىندە قاراجاتتى جوسپارلى تۇردە جيناعان بارلىق سالىمشىلار مەن «ارناۋ» دەپوزيتىنىڭ يەلەرى جەڭىلدەتىلگەن پروتسەدۋرا بويىنشا وزدەرىنىڭ تولەمقابىلەتتىلىكتەرىن راستاي الادى. بۇل ەڭبەك جولىن جاڭا باستاعان جاستار ءۇشىن اسا ماڭىزدى.

 «ارناۋ» دەپوزيتىن ءسابيدىڭ اتىنا تەك بالانىڭ زاڭدى وكىلدەرى (اتا-اناسى، قامقورشىسى) عانا اشا الادى. ال وعان قاراجاتتى بالانىڭ اتا-اناسى مەن قامقورشىسىنان بولەك، ونىڭ اجەسى، اتاسى، اعالارى مەن اپكەلەرى، ءتىپتى، ۇيىمداردا تولىقتىرا الادى. بۇعان قوسا، «ارناۋ» دەپوزيتىن تابىستاۋعا نەمەسە ونى باسقا دەپوزيتتەرمەن قوسۋعا، سونىمەن قاتار، وعان وزگە تاريفتىك باعدارلامالاردان اۋىسۋعا بولمايدى.

 

 الماتى

سوڭعى جاڭالىقتار

ۇقساس جاڭالىقتار