ول 3 مامىر كۇنى اتىراۋ وبلىسىنان ورال قالاسىنا ارىپتەستەرىمەن بىرگە اۆتوبۋسپەن كەلگەن. ناۋقاستارمەن قارىم-قاتىناستا بولعان ادام رەتىندە پروۆيزورلىق ستاتسيوناردا وقشاۋلانىپ, ءبىر اپتادان سوڭ اۋرۋ بەلگىسى بايقالماعان سوڭ ۇيىنە جىبەرىلگەن.
«10 مامىردان باستاپ بەكىتىلگەن ەمحانانىڭ مەديتسينا قىزمەتكەرلەرىنىڭ باقىلاۋىمەن ءۇي كارانتينىندە بولدى. 10 مامىردان باستاپ تاماقتىڭ قىشۋى, السىزدىك, تابەتتىڭ تومەندەۋى بەلگىلەرى پايدا بولعانىنا قاراماستان مەديتسينالىق كومەككە جۇگىنبەگەن. كۇن سايىن قوڭىراۋ شالعان مەديتسينا قىزمەتكەرلەرىنە ءوز دەنساۋلىعىنا شاعىمدانباعان. كەلەسى 9 كۇن بويى مەديتسينالىق كومەككە جۇگىنبەي, 19 مامىر كۇنى ءجۇرىپ-تۇرۋ كەزىندە ەنتىگۋ, توسەكتەن تۇرا الماي ايقىن السىزدىك پايدا بولعان سوڭ جەدەل جاردەم شاقىرتىپ, پروۆيزورلىق ستاتسيونارعا جەتكىزىلدى» دەلىنگەن دارىگەرلەردىڭ اقپارات مالىمدەمەسىندە.
وسى جەردە ناۋقاستان الىنعان اناليز ونىڭ COVID-19 ۆيرۋسىن جۇقتىرعانىن كورسەتكەن. وبلىستىق جۇقپالى اۋرۋلار اۋرۋحاناسىنا جەتكىزىلىپ, تىنىس الۋى قيىنداعان سوڭ جەدەل تۇردە وبلىستىق جۇقپالى اۋرۋحانىنىڭ رەانيماتسيالىق بولىمشەسىنە جاتقىزىلعان.
دارىگەرلەردىڭ ايتۋىنشا, ناۋقاس جان ساقتاۋ بولىمىندە اۋىر جاعدايدا بولعان. رەانيماتسيالىق ءىس-شارالار ءوز ناتيجەسىن بەرمەگەن. ءسويتىپ, 30 مامىر كۇنى ناۋقاستىڭ جۇرەگى جانە تىنىس الۋ قىزمەتى توقتاعان.
«اتالعان فاكت COVID-19 ۆيرۋسى وتە قاۋىپتى اۋرۋ ەكەنىن جانە وعان نەمقۇرايلى قاراۋعا بولمايتىنىنىڭ ايقىن دالەلى. كومەككە ۋاقىتىندا جۇگىنگەندە ناۋقاستى ولىمنەن امان الىپ قالۋعا بولاتىن ەدى» دەلىنگەن حابارلامادا.
31 مامىر كۇنى باتىس قازاقستان وبلىسىندا 41 ادامنان COVID-19 دياگنوزى انىقتالىپ, وڭىردە كوروناۆيرۋس ىندەتىن جۇقتىرعاندار سانى 621-گە جەتتى. ولاردىڭ 285-ءى جازىلىپ, ۇيىنە شىقتى. 336 ادام جۇقپالى اۋرۋلار اۋرۋحاناسىندا ەم-دوم الىپ جاتىر. پروۆيزورلىق ستاتسيوناردا – 14, ءۇي كارانتينىندە – 1278 ادام وقشاۋلانعان.
باتىس قازاقستان
