ستاتيستيكا بويىنشا الماتىدا پاندەميا باستالعاننان بەرى كوروناۆيرۋس ينفەكتسياسىن جۇقتىرۋدىڭ راستالعان 2499 جاعدايى تىركەلدى.
جاڭادان جۇقتىرعانداردىڭ تورتەۋى جەرگىلىكتى ازاماتتار. قاۋىپتى ىندەت ولاردى پروفيلاكتيكالىق ماقساتتا تەكسەرگەن كەزدە انىقتالعان. تاعى 4 ازاماتتان قالالىق ستاتسيونارلارعا جاتقىزۋ كەزىندە تابىلدى. قالعان ادامدار ناۋقاستارمەن بايلانىستا بولعان جاندار.
ستاتسيونارلارعا ەمدەۋگە جاتقىزىلعان بارلىق ناۋقاس كوروناۆيرۋستىق ينفەكتسيانىڭ تارالۋىنا جول بەرمەۋ ماقساتىندا, تالداۋ ناتيجەلەرى شىققانعا دەيىن باقىلاۋدا بولاتىندىعىن ايتا كەتكەن ءجون.
مەديتسينا قىزمەتكەرلەرى جەدەل كەلىپ تۇسەتىن جانە شۇعىل وپەراتسيا جاساۋدى قاجەت ەتەتىن ناۋقاستارعا وپەراتسيالاردى جەكە قورعانۋ زاتتارىن كيىپ جاسايدى. ودان كەيىن ولار دا تالداۋ ناتيجەلەرى شىققانعا دەيىن جەكە بولمەلەردە بولادى.
دياگنوز راستالعان جاعدايدا, بولىمشەدە دەزينفەكتسيالىق تازالاۋ جۇمىستارى جۇرگىزىلەدى.
قازىرگى ۋاقىتتا ينفەكتسيا جۇقتىرعان 1038 ادام قالانىڭ جۇقپالى اۋرۋلار ستاتسيونارلارىندا كوروناۆيرۋستىق ينفەكتسيادان ەمدەلۋدە, ونىڭ ىشىندە 56 بالا بار.
«قوسىمشا اۋرۋلارىنىڭ بولۋىنا بايلانىستى 4 ادامنىڭ جاعدايى وتە اۋىر, 22 پاتسيەنت – اۋىر حالدە, 304 ناۋقاستىڭ جاي-كۇيى – ورتاشا دارەجەدە. ال قالعان ەمدەلۋشىلەردىڭ جاعدايى قاناعاتتانارلىق. جالپى, ناۋقاستاردىڭ باسىم كوپشىلىگىندە اۋرۋ سيمپتومسىز وتۋدە دەپ ايتۋعا بولادى», – دەدى الماتى قالاسى قوعامدىق دەنساۋلىق باسقارماسىنىڭ باسشىسى تىلەۋحان ابىلداەۆ.
ونىڭ ايتۋىنشا, پروۆيزورلىق گوسپيتالداردا – 177 ادام, كارانتيندىك وقشاۋلاۋدا – 139 ادام جانە ءۇي كارانتينىندە 14 339 ازامات بار.
كەشە الماتىدا كوروناۆيرۋستىق ينفەكتسيادان ساۋىعىپ, 76 ادام ەمحانادان شىعارىلدى. بۇگىن تاعى 30-دان استام ادامدى ەمدەۋدەن شىعارۋ جوسپارلانۋدا.
جالپى, الماتىدا پاندەميا باستالعاننان بەرى 1451 ازامات ساۋىعىپ شاقتى. بۇل – مەگاپوليستە تىركەلگەن, ۆيرۋس جۇقتىرعان ادامداردىڭ جالپى سانىنىڭ 59 پايىزى.
«قالادا كارانتين ساقتالۋدا. مەن تۇرعىنداردى بارلىق كارانتيندىك شارالاردى, الەۋمەتتىك قاشىقتىق پەن بەتپەردە تاعۋ رەجيمىن ساقتاۋعا شاقىرامىن», - دەپ قورىتىندىلادى تىلەۋحان ابىلداەۆ.
