كونفەرەنتسيا بارىسىندا پرەزيدەنت اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ رەپرەسسيا جىلدارىندا كەڭەس وداعىنداعى بارلىق حالىق زارداپ شەككەنىن ەسكە سالا كەلىپ, ونىڭ اۋىر سالدارلارىن ءسوز ەتتى.
ء«بىز 31 مامىردا ساياسي قۋعىن-سۇرگىن جانە اشارشىلىق قۇرباندارىن ەسكە الامىز. قايعىلى وقيعانى ۇمىتپاۋ – ءبىزدىڭ ازاماتتىق پارىزىمىز. 1920-1930 جىلدارداعى جاپپاي قۋعىن-سۇرگىن, اشارشىلىق اۋىر ازاپ بولدى جانە ادامدىققا جاتپايتىن الەۋمەتتىك ەكسپەريمەنت ناتيجەسىندە 3 ميلليوننان استام وتانداسىمىز قازا تاۋىپ, جەر اۋدارىلدى. بۇل وقيعا حالقىمىزدىڭ جانىنا جارا سالدى. سول ءۇشىن ەلباسى نۇرسۇلتان نازارباەۆ ەگەمەندىگىمىزدىڭ العاشى جىلدارىنان ساياسي-قۋعىن سۇرگىن قۇرباندارىن ەستە ساقتاپ, رۋحىنا تاعزىم ەتۋگە زور ءمان بەرگەن. مەملەكەت باسشىسى قاسىم-جومارت توقاەۆ وسى ۇستانىمدى جالعاستىرىپ كەلەدى», - دەدى ول.
ونىڭ ايتۋىنشا, 31 مامىر – سولاقاي ساياسات زاردابىنان ساباق الۋىمىز قاجەتتىگىن تاعى ءبىر ەسكە سالاتىن كۇن. «بۇل قولدان جاسالعان تراگەديا قازاق حالقىنا ورنى تولماس قاسىرەت الىپ كەلدى. ءتىرى قالعانداردىڭ جانىنا جازىلماس جارا سالدى. رەپرەسسيا جىلدارى ءبىزدىڭ ەل ادىلەتسىز جازا قولداناتىن تۇزەتۋ لاگەرىنە اينالدى. سول جىلدارى جەكە تۇلعالاردىڭ ورىنسىز ارەكەتتەرىنەن كەڭەس وداعىندا ءومىر ءسۇرىپ جاتقان بارلىق ەتنوس زارداپ شەكتى. بىرلىك, شىدامدىلىق جانە دانالىقتىڭ, ءبىر-ءبىرىن قولداي ءبىلۋدىڭ ارقاسىندا قاتاڭ سىناقتىڭ بارىنەن وتتىك», - دەدى د.اباەۆ.
ايتا كەتەيىك, «تاريحتان تاعىلىم – وتكەنگە تاعزىم» جوباسىنىڭ ماقساتى – جالپىۇلتتىق تاريحي سانانى قالىپتاستىرۋ, «رۋحاني جاڭعىرۋ» باعدارلاماسىنىڭ قۇندىلىقتار قاعيداتىندا قازاقستاندىق بىرەگەيلىك پەن بىرلىكتى نىعايتۋ. جوبانىڭ ءىس-شارالارى تۇڭعىش رەت 2010 جىلى تمد-عا مۇشە مەملەكەتتەردىڭ گۋمانيتارلىق ىنتىماقتاستىعىنىڭ مەملەكەتارالىق قورىنىڭ قولداۋىمەن ەلوردادا جانە «الجير» مۋزەي-مەموريالدىق كەشەنىندە ۇيىمداستىرىلعان. سودان بەرى جىل سايىن اتالعان جوبا اياسىندا كوپتەگەن تاعىلىمدى ءىس-شارالار, ءتۇرلى فورماتتاعى جيىندار وتكىزىلىپ كەلەدى.
