بريفينگتە, ەڭ الدىمەن, قاۋىپسىزدىك شارالارى بويىنشا جەرگىلىكتى اتقارۋشى ورگاندار, پوليتسيا دەپارتامەنتى جانە ۇلتتىق ۇلاننىڭ 6506 اسكەري بولىمىمەن بىرلەسكەن جۇمىس جۇرگىزىلىپ جاتقانى ايتىلدى.
«سۋ وبەكتىلەرىندە جانە سۋ شارۋاشىلىعى قۇرىلىستارىندا بۇقارالىق دەمالىس, تۋريزم جانە سپورت ءۇشىن ارنايى ورىندار انىقتالدى. قازىرگى ۋاقىتتا شىمكەنت قالاسى اكىمدىگىنىڭ «شىمكەنت قالاسى سۋ نىساندارى مەن سۋ شارۋاشىلىعى قۇرىلىستارىندا بۇقارالىق دەمالۋعا, تۋريزم مەن سپورتقا ارنالعان ورىنداردى بەلگىلەۋ تۋرالى» قاۋلىسىنىڭ جوباسى دايىندالدى. ياعني, قالاداعى بارلىق 5 دەمالىس ورنى نىسانداردى بەكىتۋ بويىنشا قاۋلى جوباسىنا ەنگىزىلگەن», – دەدى ە.باحاەۆ.
ودان بولەك, ەرعالي جاراسبەك ۇلى توتەنشە جاعداي ەنگىزىلگەن كەزدە سۋ ايدىندارىندا جازاتايىم وقيعالاردىڭ بولماۋى ءۇشىن حالىق اراسىندا بەلسەندى ۇگىت-ناسيحات جۇمىستارى جۇرگىزىلىپ وتىرعانىن جەتكىزدى. وسى ماقساتپەن 30 تىيىم سالاتىن بەلگى, 59 ۇگىت ستەند جانە 3 بيلبورد ورناتىلىپ, ارنايى 5 بەينەروليك دايىندالعان.
ءباسپاسوز ماجىلىسىندە ە.باحاەۆ قاۋىپسىزدىك شارالارى بويىنشا ارنايى مەموراندۋم جاسالىپ وتىرعانىن دا ايتىپ ءوتتى.
«2019 جىلى دەمالىس ورىندارىنىڭ يەلەرىمەن از قامتىلعان وتباسى بالالارىن تەگىن وقىتۋ بويىنشا 9 مەموراندۋم جاسالىپ, سۋعا شومىلۋ ماۋسىمىندا 376 بالا وقىتىلدى. 2020 جىلعا ارنالعان مەموراندۋمدار جاساۋ بويىنشا اۋدان اكىمدىكتەرىمەن جۇمىستار جۇرگىزىلۋدە» – دەدى ول.
بريفينگ بارىسىندا دەپارتامەنتى باسشىسىنىڭ ورىنباسارى باق وكىلدەرىنىڭ سۇراقتارىنا جاۋاپ بەرىپ, شىمكەنت قالاسىندا بىلتىر سۋ ايدىندارىندا ادامداردىڭ قازا بولۋىنا بايلانىستى جازاتايىم وقيعا تىركەلمەگەنىن ايتتى.
