30 ءساۋىر مەن 4 مامىر ارالىعىندا «تارباعاتاي» مەملەكەتتىك ۇلتتىق تابيعي پاركى «پاركتەر شەرۋى» اتتى حالىقارالىق تابيعاتتى قورعاۋ اكتسياسى بويىنشا اشىلعان «جەلى سايىستارىنىڭ» كەزەكتى ءىس-شاراسى كوركەم ونەر شەبەرلەرىنىڭ سايىسىن وتكىزدى. بۇل بايقاۋدا ء«ۇرجار اۋماعىنىڭ ەرەكشە اسەم تابيعاتى», «قورشاعان ورتا – بالانىڭ كوزىمەن», «قىزىل كىتاپتىڭ بەتتەرى» نوميناتسيالارى بار ەكەندىگى ۇلتتىق پاركىمىزدىڭ جەلىلەرىندە جاريالانعان بولاتىن. ونداعى ماقساتىمىز – سۋرەتتەگى كەسكىننىڭ ارقاسىندا ءبىزدىڭ ايماقتىڭ اسەم دە اسەرلى تابيعي لاندشافتتارىن سۋرەتتەۋ, ادامداردىڭ ساناسىندا ولاردىڭ تابيعاتقا دەگەن سۇيىسپەنشىلىكتەرىن وياتۋ.
بۇل سايىستى تاڭداپ الۋىمىزعا بىرنەشە سەبەپ بار. سۋرەت – جەكە ءبىر ونەر سالاسى ەمەس, بىرنەشە ونەر ءتۇرىنىڭ ومىرگە كەلۋىنە سەبەپكەر بولعان بۇكىل بەينەلەۋ ونەرىنىڭ اتاسى. بۇل ادام بالاسىنىڭ زاماننان زامانعا رۋحاني, ەستەتيكالىق بايلىعى رەتىندە ۇلاسىپ كەلە جاتقان ونەر سالاسى. ەكىنشىدەن, سۋرەت تاريحى – بۇل ادامزات تاريحى جانە ونىڭ قورشاعان ورتانى تانۋىنا, ءوزىن ءوزى تولىعىمەن تانىپ بىلۋىنە, ەستەتيكالىق تاربيە الۋىنا, سونىمەن قاتار ۇرپاقتان-ۇرپاققا اسىل مۇرالار قالدىرۋعا ۇلكەن ۇلەس قوسقان ومىرمەن وزەكتەس ونەر.
وسى سايىستا وقۋشىلار قولدارىنا قىلقالامدارىن الىپ, ءوز كوزىمەن كورىپ, تۇيسىنگەن شىندىعىن سول ساتتەگى قالپىمەن كورسەتۋگە ۇمتىلىپ, اق قاعازعا تۇسىرگەن. كوپشىلىگى «قىزىل كىتاپقا» ەنگەن جان-جانۋارلاردى تاڭداپ, انيماليستتىك جانردا سۋرەت سالعان. وسى تۇرعىداعى تاربيەلىلىك – وقۋشىلاردى بەينەلەۋ ونەرىنە باۋلۋ ارقىلى قورشاعان ورتانىڭ اسەمدىگىن, تاماشالىعىن سەزىنۋگە تاربيەلەۋ, بىلىمدىلىك – قورشاعان ورتادان وزىنە ۇناعان جانردى تاڭداۋ ارقىلى سۋرەت سالۋ شەبەرلىگىن جەتىلدىرۋ, دامىتۋشىلىق – وي-ءورىسىن, تانىمىن, قيالىن كۇشەيتۋ جانە ەستە ساقتاۋ, ەلەستەتۋ قابىلەتىن دامىتۋ دەسەك تە, ەڭ باستىسى وسكەلەڭ ۇرپاقتىڭ قورشاعان ورتامەن بايلانىسىن ارتتىرۋ ەدى, ياعني سۋرەتتى كۇندەلىكتى ومىرمەن بايلانىستىرۋ, ومىردەگى تابيعات كورىنىستەرىن قاعازعا بەينەلەۋ. سايىس وقۋشىلارعا وڭ ناتيجە بەردى دەگەن ويدامىز.
داۋلەت توقتاسىن ۇلى
شىعىس قازاقستان وبلىسى
