قازاقستان • 28 مامىر، 2020

بيىل باتىس قازاقستان وبلىسىندا 167 شاقىرىم جول جوندەلەدى

62 رەت كورسەتىلدى

باتىس قازاقستان وبلىسى جولدارى بيىل قايتا جاڭارتۋ، كۇردەلى جانە ورتاشا جوندەۋدەن وتەدى. اۆتوموبيل جولدارى سالىسىندا وڭىردە بارلىعى 30 جوبا ىسكە اسىرىلادى. جولشىلار وبلىستاعى ەلدى مەكەندەرگە كىرەتىن 10 جول جاڭارتادى. بۇل تۋرالى يدم ءباسپاسوز قىزمەتى حابارلادى.

بيىل «سامارا–شىمكەنت» تاسجولىنىڭ كىرۋ جولى مەن قاراتوبە اۋدانىنا قاراستى قوسكول ەلدى مەكەنىنىڭ اينالما جولىنىڭ 9 شاقىرىمى قايتا جاڭارتىلادى. سونداي-اق، بورلى–اقساي–جىمپيتى اۆتوجولىنىڭ 149-159، 139-149 شاقىرىمدارى كۇردەلى جوندەۋدەن وتكىزىلىپ، اقجايىق اۋدانىنىڭ جايىق، العاباس جانە لبيششەنسك ەلدى مەكەندەرىنە كىرۋ جولدارى جوندەلەدى. بۇدان بولەك، «فەدوروۆكا – اقساي» اۆتوجولىنداعى 6 سۋ وتكىزۋ قۇبىرىن كۇردەلى جوندەۋ، «ورال–كيرسانوۆا» جولىنداعى بىكوۆكا، ەمبۋلاتوۆكا جانە رۋبەجكا وزەنى ارقىلى وتەتىن كوپىرلەردى جوندەۋ جوسپارلانعان.

سونىمەن قاتار، «تاسقالا–اققۋراي–بولاشاق–رف شەكاراسى» اۆتوجولىنىڭ 48-96 شاقىرىمى، «پەرەمەتنوە–تسىگانوۆو» جولىنىڭ 0-13 شاقىرىمى، «پەرەمەتنوە–ۆەچنىي» جولىنىڭ 0-24 شاقىرىمى، «جانىبەك–تالوۆكا–كىشى وزەن» جولىنىڭ 2-27 شاقىرىمى ورتاشا جوندەلەدى. بۇدان بولەك، وڭىردە توعاناس، جاڭابۇلاق، مەرەي، فۋرمانوۆو، روستوشينسكوە نقپ، نوۆوۆپاۆلوۆكا جانە ۇزىنكول ەلدى مەكەندەرىنە كىرۋ جولدارى جوندەلەدى دەپ جوسپارلانعان. جوندەلەتىن جولداردىڭ جالپى ۇزىندىعى 167،8 شاقىرىم.

مۇنىمەن قوسا، وڭىردە رەسپۋبليكالىق ماڭىزى بار «چاپاەۆو – قازتالوۆكا – رف شەكاراسى» اۆتوموبيل جولىنىڭ 157-192 شاقىرىمى، «قازتالوۆكا – جانىبەك – رف شەكاراسى» جولىنىڭ 0-165 شاقىرىمى، «بيسەن – ونەگە – سايحين» جولىنىڭ 0-103 شاقىرىمىندا كۇردەلى جوندەۋ جۇمىستارى باستالىپ كەتتى.  ورتاشا جوندەۋ جۇمىستارىمەن «رف شەكاراسى (سامارا) – شىمكەنت جولىنىڭ 214+835-250+420 شاقىرىمدارى، سونداي-اق، «چاپاەۆو-جالپاقتال-قازتالوۆكا-رف شەكاراسى» تاسجولىنىڭ 17-57 شاقىرىمى قامتىلادى.

ەسكە سالا كەتەيىك، باتىس قازاقستان وبلىسىنداعى جولداردىڭ جالپى ۇزىندىعى - 6496 شاقىرىم. ونىڭ 1414 شاقىرىمى – رەسپۋبليكالىق ماڭىزعا يە جولدار. ول جولداردىڭ 92% جاقسى جانە قاناعاتتاندىرارلىق جاعدايدا. ال جەرگىلىكتى جولداردىڭ ۇزىندىعى - 5 082 شاقىرىم. جاقسى جانە قاناعاتتاندىرارلىق جاعدايداعى جەرگىلىكتى جولداردىڭ ۇلەسى 31% شاماسىندا.

سوڭعى جاڭالىقتار

NASA مارسكا قامداندى

تەحنولوگيا • كەشە

ۇقساس جاڭالىقتار