ايماقتار • 28 مامىر، 2020

شىمكەنتتە قوعامدىق كولىك جۇيەسىنىڭ جاڭا كونتسەپتسياسى قابىلداندى

37 رەت كورسەتىلدى

بۇگىن شىمكەنت قالاسى اكىمدىگىندە قوعامدىق كولىك جۇيەسىنە وزگەرىستەر ەنگىزۋ بويىنشا قالا اكىمى مۇرات ايتەنوۆتىڭ قاتىسۋىمەن جيىن ءوتتى. وندا «Astana LRT» كومپانياسى قالا باسشىسىنا شىمكەنتتەگى قوعامدىق كولىك كەشەنىن مودەرنيزاتسيالاۋ بويىنشا جاسالعان تۇجىرىمداماسىن تانىستىردى.

جاڭا جۇيە بويىنشا قوعامدىق كولىكتەردىڭ جۇمىسى جاقسارىپ، تيىمدىلىگى ارتادى. اتاپ ايتقاندا، اۆتوبۋستاردى ءموبيلدى قوسىمشا ارقىلى باقىلاۋعا بولادى، جول اقىسىن ەلەكتروندى تولەۋگە مۇمكىندىك تۋادى، جاڭا باعىتتار اشىلادى، تسيفرلىق جانە ينتەللەكتۋالدىق جۇيە ەنگىزىلەدى.
قالا اكىمى اتالعان تۇجىرىمدامانى ماقۇلداپ، جاڭا جۇيەگە كەزەڭ كەزەڭىمەن كوشۋدى جانە بەلگىلەنگەن مەرزىمدە اياقتاۋدى تاپسىردى.

- بۇل جۇيە قالا ىشىندەگى كەپتەلىستىڭ ازايۋىنا، تۇرعىنداردىڭ دىتتەگەن جەرىنە تەز جەتۋىنە، جەمقورلىقتىڭ الدىن الۋعا، «Smart city» جۇيەسىنە تەزىرەك كوشۋگە مۇمكىندىك بەرەدى، - دەدى م.ايتەنوۆ.

اتالعان كونتسەپتسيا تۇرعىنداردىڭ قاۋىپسىزدىگىن قامتاماسىز ەتۋگە دە ۇلكەن سەپتىگىن تيگىزەدى. ەندى جۇرگىزۋشىلەر ارنايى كۋرستاردان ءوتىپ، كوندۋكتورلاردىڭ قىزمەتى قاتاڭ تەكسەرىلەتىن بولادى.

سونداي-اق ديسپەتچەرلەۋ ارقىلى اۆتوبۋس اراسىنداعى جيىلىك ساقتالىپ، ايالداماعا توقتامايتىن جۇرگىزۋشىلەر قاداعالانادى.

بۇدان بولەك، ساۋدا ورتالىقتارى مەن مەكتەپ جانە باسقا دا ادام كوپ شوعىرلاناتىن ايالدامالار رەتتەلىپ، شاعىناۋداندارعا قاتىناۋ جەڭىلدەيدى.

سوڭعى جاڭالىقتار

ۇقساس جاڭالىقتار