جاڭادان انىقتالعان ناۋقاستىڭ ۇشەۋى قىزىلوردا قالاسىنان, تاعى ۇشەۋى ارال اۋدانىنان, ال ءبىر تۇرعىن جاڭاقورعان اۋدانىنان. جەتى ناۋقاستىڭ ۇشەۋىندە اۋرۋ بەلگىسى سكرينينگتىك تەكسەرۋ كەزىندە انىقتالسا, ءتورت دەرەك اتىراۋداعى «تەڭىزشەۆرويل» كومپانياسىندا ۆاحتالىق ادىسپەن جۇمىس ىستەيتىندەر اراسىنان تىركەلىپ وتىر.
- وسى رەتتە «تەڭىزشەۆرويل» كومپانياسىندا ۆاحتالىق ادىسپەن جۇمىس جاسايتىن ازاماتتاردىڭ تالاپقا باعىنباي, دارىگەرلەر جۇمىسىنا كەدەرگى جاساپ وتىرعانىن جاسىرۋدىڭ ءجونى جوق. ولاردىڭ كوپشىلىگى تەست سىناماسىن تاپسىرۋدان, كارانتينگە جاتۋدان باس تارتادى. بىراق وسىدان 14 كۇن بۇرىن ولار ۆاحتادان كەلە سالىسىمەن تەست سىناماسى الىنىپ, العاشىندا تەرىس ءمان كورسەتكەنمەن ۋاقىت وتە كەلە سول ازاماتتاردىڭ اراسىنان كەيىن اۋرۋ بەلگىسى انىقتالىپ وتىر, – دەيدى باسقارما باسشىسى.
جاقسىلىق ابىلقاسىم ۇلى قازىر وبلىستا 94 ادامنىڭ ەم الىپ جاتقانىن ايتىپ ءوتتى. جانساقتاۋ بولىمىندە جاتقان 4 ناۋقاستىڭ بىرەۋىنىڭ جاعدايى ءالى اۋىر.
