دەگەنمەن دە ءبىلىم بەرۋدىڭ بارشاعا ورتاق ستاندارتتارى, حالىقارالىق ۇيىمداردىڭ PISA سەكىلدى ءبىلىم ساپاسىن ورتاق باعالاۋ قۇرالدارى جانە ول ۇيىمداردىڭ اقىل-كەڭەستەرى سايىپ كەلگەندە الەمدىك نارىققا امبەباپ مامان دايارلاۋعا, قازاقستان سەكىلدى ەلدەردىڭ قابىلەتتى بالالارىن دامىعان ەلدەرگە تارتۋعا, جالپى العاندا الەم ازاماتتارىن تاربيەلەۋگە باعىتتالعانى ايدان انىق. الەم ازاماتى رۋحىندا ءبىلىم مەن تاربيە العان بالا قازاقستاننىڭ ناعىز جاناشىر ازاماتى بولىپ ءوسۋى ەكىتالاي. سوندىقتان قازاقستانعا ۇلتتىق مەكتەپتىڭ ۇلگىسى قاجەت. ناقتى عىلىمدار, تەحنولوگيا جانە اعىلشىن تىلىمەن قاتار, ءتىپتى ودان بۇرىن قازاق ءتىلى مەن ادەبيەتى, قازاقستاننىڭ تاريحى مەن ولكەتانۋى, ۇلت ونەرى مەن ءداستۇرىن وزىق ادىستەمە نەگىزىندە جاڭاشا وقىتاتىن, سول ارقىلى الەم ازاماتى ەمەس, بىراق الەمنەن حابارى بار قازاقستاننىڭ ازاماتىن تاربيەلەيتىن ۇلت مەكتەبىنىڭ ۇلگىسىن جاساعان ءجون.
ەكىنشىدەن, ءبىلىم بەرۋدىڭ ساپاسىن ارتتىرىپ, ءارى ونى بار ايماقتا قولجەتىمدى ەتۋ ءۇشىن قاشىقتان جانە ونلاين وقىتۋ تەحنولوگيالارىن جۇيەلى تۇردە جانە كەڭىنەن ەنگىزۋ سۇرانىپ تۇر. اسىرەسە, وتكەن بىرنەشە ايداعى, جاھاندىق كارانتين سالدارىنان جاپپاي قاشىقتان وقۋعا كوشۋ بۇل ءادىستىڭ زور مۇمكىندىكتەرىن كورسەتتى. ارينە, مەكتەپ, كوللەدج جانە جوعارى وقۋ ورىندارىن تولىقتاي ونلاينعا وتكىزۋ مىندەتى تۇرعان جوق, ول مۇمكىن دە ەمەس. دەگەنمەن ءار وقۋشىنىڭ جەكە قابىلەتى مەن مۇمكىندىكتەرىن ەسكەرە الاتىن, سول ارقىلى وقىتۋدىڭ تيىمدىلىگىن ارتتىراتىن تەحنولوگيالاردى ءبىلىم بەرۋگە قازىردىڭ وزىندە ەنگىزۋگە بولادى. ول ءۇشىن الدىمەن قاشىقتان نەمەسە ونلاين وقىتۋدى قازاقستاندا رەسمي تۇردە تانىلعان ءبىلىم بەرۋ فورماسىنىڭ قاتارىنا قوسىپ, ونى ءبىلىم تۋرالى زاڭعا كىرگىزۋ قاجەت. قاشىقتان وقىتۋ تەحنولوگياسىن قولداناتىن وقۋ ورىندارىنا قويىلاتىن ادىستەمەلىك جانە تەحنولوگيالىق تالاپتاردى ايقىنداپ, ولارعا بولەك ليتسەنزيا بەرگەن ابزال.
ۇشىنشىدەن, تاعى ءبىر نازار اۋدارعىم كەلەتىن ماسەلە بالالاردىڭ جان ساۋلىعىنا قاتىستى. اتاپ ايتساق, مەكتەپ وقۋشىلارى اراسىنداعى سۋيتسيد, ياعني وزىنە قول سالۋ جيىلىگى. وكىنىشكە قاراي, بۇل كورسەتكىش بويىنشا قازاقستان – دۇنيە جۇزىندەگى جاعدايى ەڭ ناشار ەلدەردىڭ قاتارىندا. جىل سايىن 170-تەن اسا قازاقستاندىق ءجاسوسپىرىم وزدەرىن ومىردەن ايىرادى. مامانداردىڭ ەسەبىنشە, اياقتالماعان جانە ءتۇرلى سەبەپپەن تىركەلمەگەن سۋيتسيدكە تالپىنىس سانى بۇدان 20 ەسە كوپ. ەلىمىزدە وسى ماسەلەگە قاتىستى ورتاق باعدارلاما, نە بىرىڭعاي ادىستەمە ءالى قابىلدانعان جوق. ءبىز ءوز تاراپىمىزدان بىلىكتى قازاقستاندىق جانە بەدەلدى حالىقارالىق پسيحولوگ مامانداردى جۇمىلدىرىپ, «دەنساۋلىق جانە ءومىر داعدىلارى» اتتى ارنايى باعدارلاما دايىندادىق. ونداعى امالدار مەن ادىستەر بىرنەشە ايماقتا سىناقتان ءوتتى. قاجەت بولسا, باعدارلامانى ءتيىستى مينيسترلىككە تاپسىرۋعا دايىنبىز.
راۋان كەنجەحان ۇلى,
ۇلتتىق قوعامدىق سەنىم كەڭەسىڭ مۇشەسى,
«ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى
