ايماقتار • 27 مامىر، 2020

وقۋ جىلى قورىتىندىلانىپ، ۇبت-نىڭ جاي-كۇيى انىقتالدى

119 رەت كورسەتىلدى

سولتۇستىك قازاقستان وبلىسىنىڭ اكىمى قۇمار اقساقالوۆتىڭ باسشىلىعىمەن بولعان اكىمدىكتىڭ وتىرىسىندا وقۋ جىلى قورىتىلىپ، سونىڭ ىشىندە الىستان وقىتۋدىڭ اياقتالعاندىعى جانە ەندىگى كەزەكتە تۇرعان ۇبت-نى جوعارى ساپادا وتكىزۋ ماسەلەلەرى تالقىلاندى.

ونلاين وقىتۋ دەگەننىڭ ءوزى ءبىلىم بەرۋ سالاسىنا قاتىستى بارلىق تاراپتارعا - سونىڭ ىشىندە مۇعالىمدەر، اتا-انالار مەن وقۋشىلاردىڭ بارىنە ۇلكەن سىناق بولدى. مۇندايدى ەڭسەرۋ ءبارىنىڭ بىردەي قولدارىنان كەلمەيتىندىگى كورىندى. از قامتىلعان وتباسىلاردا كومپيۋتەرلەر دە جوق ەكەن. جەرگىلىكتى بيلىك وسىنداي 580 وتباسىنا كومپيۋتەر اپەرۋگە ءماجبۇر بولدى.

الايدا ونلاين وقىتۋ بارىسىندا بىرقاتار وڭ ناتيجەلەرگە قول جەتكىزىلگەندىگى دە انىقتالدى. ماسەلەن، ايماقتا قازىر مۇعالىمدەردىڭ جەتىسپەيتىندىگى جوعالعان ەكەن.  وسىدان ءۇش جىل بۇرىن 737 مۇعالىم جەتىسپەيدى دەگەن دابىل كوتەرىلگەن ەدى. قازىر بوس ۆاكانسيا دا قالماعان. بۇل سالا باسشىلىعىنىڭ ۇتىمدى جۇمىس ىستەي بىلگەندىگىنىڭ كورىنىسى.

قازىر ءبىلىم سالاسىنىڭ ماتەريالدىق-تەحنيكالىق احۋالى دا ارتا تۇسكەن. تەك بىلتىر عانا سالانىڭ 142 نىسانى جوندەۋدەن وتكەن. سونىڭ ىشىندە جىلۋ جۇيەسىنىڭ جاقسارۋىنا ەرەكشە نازار اۋدارىلدى. سولتۇستىكتىڭ سۋىعىندا مەكتەپ جىلى بولماسا ءبىلىم بەرۋ تۇگىلى بالانىڭ دەنساۋلىعىن ساقتاۋعا دا مۇمكىندىك بولمايدى. ايتەۋىر، بىلتىر سىنىپ بولمەلەرىنىڭ جىلى بولعاندىعىنىڭ ارقاسىندا وقۋشىلاردىڭ سۋىقتان تۇماۋراتىپ قالۋ، ءسويتىپ ساباققا كەلە الماۋى  الدىنداعى جىلعا قاراعاندا 41 پايىزعا ازايىپتى. ال بيىل مەكتەپتەردى جوندەۋگە تاعى دا 5 ملرد.تەڭگە بولىنگەن.

سونىمەن بىرگە جاستاردىڭ وقۋ ىزدەپ سىرتقا اعىلۋى دا ازايعاندىعى ايتىلدى. ماسەلەن، 2017 جىلى ەلىمىزدىڭ جوو-لارىنا 1390 تۇلەك تۇسكەن بولسا، بىلتىر 1854 جاس ءوز وتانىنداعى وقۋ ورىندارىنا تۇسكەن. سونىڭ ىشىندە جەرگىلىكتى، ماناش قوزىباەۆ اتىنداعى سقو ۋنيۆەرسيتەتىنە تۇسكەندەر سانى 30 پايىزعا ارتقان.

وتىرىستاعى سوزىندە ءوڭىر باسشىسى ەندى ۇبت-نى ۇتىمدى وتكىزۋ ماسەلەلەرىنە نازار اۋداردى. «ۇبت-نى سىلتاۋراتىپ بالالارعا تەكسەرىس قوقىنىشىن تۋدىرماۋ كەرەك. كەيبىر قاتاڭ تەكسەرىستەر بالالاردى الاڭداتىپ، بىلگەنىن ۇمىتىپ قالاتىن جاعدايلار تۋدىرۋى مۇمكىن. سوندىقتان بۇل ماسەلەدە بارىنشا سىپايىلىق كەرەك، ەشكىمنىڭ جانىن جارالاي كورمەڭىزدەر»، دەدى قۇمار اقساقالوۆ.

 

سولتۇستىك قازاقستان وبلىسى

سوڭعى جاڭالىقتار

ۇقساس جاڭالىقتار