جاز تۋسا, جۇرت الاكولگە اعىلادى.
سوڭعى جىلدارى كول جاعالاۋىندا اباتتاندىرۋ جۇمىستارى قارقىندى جۇرگىزىلگەندىكتەن تۋريستەر قاراسى دا كوبەيگەن.
الاكول جاعالاۋىندا قازىرگى ۋاقىتتا اباتتاندىرۋ جۇمىستارى قىزۋ جۇرگىزىلۋدە. دەمالۋشىلارعا قولايلى جاعداي جاساۋ ماقساتىندا ءمودۋلدى سانيتارلىق-گيگيەنالىق دارەتحانالاردى ىسكە قوسۋ, جاڭادان ءمودۋلدى سانيتارلىق-گيگيەنالىق دارەتحانالار مەن كيىنۋگە ارنالعان قوسىمشا كابينالار ورناتۋ جوسپارلانعان. سونىمەن قاتار كولدىڭ اباتتاندىرىلعان جاعاجايىندا تىيىم سالۋ جانە ەسكەرتۋ بەلگىلەرىن, اقپاراتتىق ستەندتەر, تاقتايشالار, شاعىن كولەمدى سۋ كەمەلەرى ءۇشىن ءتيىستى قورشاۋلارى مەن اقپاراتتىق تاقتايشالارى بار جەكە تۇراقتار سالۋ جۇمىستارى ىسكە اسىرىلۋدا. كول جاعالاۋىن كوگالداندىرۋعا جىل سايىن ەرەكشە كوڭىل بولىنەدى. بيىل كول جاعالاۋىنا برۋسچاتكا توسەلىپ, اعاش كوشەتتەرى وتىرعىزىلىپتى.
ەرەكشە اتاپ وتەر دۇنيە, بيىل كول جاعالاۋىندا ۇزىندىعى 3 شاقىرىمدى قۇرايتىن ۆەلوجولاقتىڭ سالىنىپ جاتقاندىعى. «بۇل جۇمىستاردىڭ بارلىعى وبلىس اكىمى دانيال احمەتوۆتىڭ تاپسىرماسىنا سايكەس اتقارىلىپ جاتىر. جاقىندا كول جاعالاۋىنا بارىپ, قولعا الىنعان جۇمىستاردى كورىپ قايتتىم.
بيىل الاكولدى دامىتۋعا قاتىستى جوسپارلارىمىز كوپ. 2020 جىلى قابانباي اۋىلىنان الاكول كولىنىڭ جاعالاۋىنا دەيىنگى اۋماقتى اباتتاندىرۋعا ءتيىستى قارجى ءبولىندى. جوبا اياسىندا كوگالدار وتىرعىزۋ, ۆەلو-تروتۋارلىق جولدى بوياۋ, ايداۋ سورعىلارىن, سۋ رەزەرۆۋارىن جانە سۋارۋ جۇيەسىن ورناتۋ جوسپارلانعان. الاكولگە كەلىمدى-كەتىمدى جۇرت كوپ بولعاندىقتان جاعالاۋىنىڭ سانيتارلىق تالاپتارعا ساي بولۋى ماڭىزدى. وسى رەتتە بيىل كول جاعاسىندا ۇلكەن ەكى جوبا جۇزەگە اسىرىلماق. ءبىرىنشىسى, اۋدانىمىزدىڭ تۋريزم سالاسىن دامىتۋ اياسىندا الاكول جاعالاۋىندا تۋريستەردى تازا اۋىز سۋمەن قامتاماسىز ەتۋ ماقساتىندا سۋ قۇبىرىنىڭ قۇرىلىسى سالىنادى. ەكىنشىسى, ماقانشى اۋىلىنان كوكتال قوسالقى ستانتسياسىنا دەيىنگى ەلەكتر جەلىسىنىڭ قۇرىلىسى جۇرگىزىلەدى. اتالعان ەكى جوبانى ىسكە اسىرۋ ناتيجەسىندە الاكول جاعالاۋىندا كول ماۋسىمىندا دەمالۋشىلاردى تازا سۋمەن قامتۋ جانە ەنەرگيا قاجەتتىلىگىنە دەگەن قوردالانعان ماسەلەلەر شەشىلەتىن بولادى» دەيدى ءۇرجار اۋدانىنىڭ اكىمى نۇرجان توقسەيىتوۆ.
شىعىس قازاقستان وبلىسى,
ءۇرجار اۋدانى
