«ۇكىمەتتىڭ ۆەدومستۆوارالىق كوميسسياسىنىڭ شەشىمىمەن سانيتارلىق شارالاردى ەنگىزۋ جانە ونى ساقتاۋعا ءمان بەرىلەدى. ءبىز دەزينفەكتسيالىق شارالاردى ءارى قاراي جالعاستىرا بەرەمىز. كوشەلەردە, دۇكەندەردە, ترانسپورتتاردا دەزينفەكتسيالىق شارالاردى جاساۋ اسا ماڭىزدى. ساقتىق شارالارىن قاتاڭ ۇستانساق, ينفەكتسيانى توقتاتا الامىز», - دەدى ەلجان ءبىرتانوۆ.
سونداي-اق مينيستر توتەنشە جاعداي كەزىندە ساقتالعان كارانتين شارالارىنىڭ ارقاسىندا ەلدە ۆيرۋس جۇقتىرعانداردىڭ سانى وزگە ەلدەرمەن سالىستىرعاندا كوپ بولماعانىن ءسوز ەتتى.
«سوڭعى ەكى ايدىڭ ىشىندە ەلىمىزدە جوعارى دەڭگەيدە كارانتين رەجيمى ساقتالدى. بۇل ارينە بارلىعىمىز ءۇشىن جەڭىل بولعان جوق. ول ەكونوميكا مەن الەۋمەتتىك ومىرگە قاتتى اسەر ەتتى. تۇرعىنداردىڭ اۋىزبىرشىلىگى مەن ساقتىق شارالارىنىڭ ارقاسىندا ەلىمىزدەگى ىندەت جاعدايى باقىلاۋدا دەپ ايتۋعا بولادى. سەبەبى باسقا ەلدەرمەن سالىستىرعاندا بىزدە ناۋقاستار سانى مەن قايتىس بولعاندار سانى كوپ ەمەس», دەدى ول.
بۇدان سوڭ, ول قازاقستاندىقتاردى ءالى دە ساقتىق شارالارىن قاتاڭ ۇستانۋعا شاقىردى.
«ەلىمىزدە پاندەميا ءالى بىتكەن جوق, ۆيرۋس ءالى دە ارامىزدا بار. سول سەبەپتى سانيتارلىق شارالاردى ساقتاۋ ماڭىزدى. ءار ادام ءوزىنىڭ جانە جاقىندارىنىڭ دەنساۋلىعىنا جاۋاپتى ەكەنىن ۇمىتپاۋى كەرەك. وسى اپتانىڭ باسىندا مەملەكەت باسشىسى ۇكىمەتكە جانە جەرگىلىكتى مەملەكەتتىك ورگاندارعا تاعى دا ناقتى تاپسىرمالار بەردى. تاپسىرماعا سايكەس, ءبىز سانيتارلىق شارالاردى باقىلاۋدا ۇستايمىز. وسى رەتتە ازاماتتار دا ءاربىرىنىڭ دەنساۋلىعى ءوز قولىندا ەكەنىن ۇمىتپاۋى كەرەك», - دەدى ە.ءبىرتانوۆ.
