قاي ءىستىڭ تىگىسىن كوكتەسەڭ دە, الدىمەن ۇيىتقى بولارلىق العاشقى قارجى قاجەت ەكەنىن كاسىپپەن اينالىسپاعانداردىڭ ءوزى دە جاقسى بىلەدى. زەرەندىلىك داميرا بيتەنوۆا جوعارىدا اتالعان جوبا بويىنشا قىر-سىرى مول كاسىپكەرلىك نەگىزدەرىن ءتاپ-ءتاۋىر مەڭگەرىپ, جەكە كوسمەتولوگيالىق كابينەتىن اشتى. شاعىن اۋدان ورتالىعىندا بۇل ايتارلىقتاي جاڭالىق. جالعىز داميرا عانا ەمەس, جاڭا جىلدان بەرى اۋداننىڭ 22 ادامى ءوز ءىسىن ورگە باستىرامىز دەپ ۇمتىلىپ وتىر. قۇپتارلىق-اق قادام.
– سۇيىكتى ءىسىمدى تابىس كوزىنە اينالدىرۋ وڭاي شارۋا ەمەس. مەنىڭ بىلۋىمشە, ەڭ الدىمەن كاسىپكەرلىك نەگىزدەرىن قاپىسىز مەڭگەرۋىڭ كەرەك – دەيدى داميرا بيتەنوۆا, – ايتپەسە, قۇر ۇمتىلىس ورىندالمايتىن قيال بولىپ قالۋى عاجاپ ەمەس. ەڭ الدىمەن, ءوزىڭ اينالىساتىن ءىستىڭ قىر-سىرىن جىلىگىن شاعىپ, مايىن ىشكەن مامان بولۋىڭ شارت. ەگەر ءوزىڭ بىلمەسەڭ, وندا بۇل تاراپقا قادام باسۋعا بولمايدى.
ءوزى مەدبيكە بولىپ جيىرما جىل جۇمىس ىستەگەن ەكەن. كوسمەتولوگيا كابينەتىن اشقاندا دا ءبىلىمى مەن بىلىگىنە سۇيەنگەن. جاساعان بيزنەس جوسپارى دا قۇرعاق قيالدان قۇرىلماعان. ناقتى, ءومىردىڭ وزىنەن ويىپ العان باعىتتى قامتيدى. تابىس تەتىگىنىڭ قۇلاعى قىلتيىپ تۇرعان سوڭ گرانت يەگەرى اتانعان.
– نەگىزىندە باعدارلامانىڭ كوپ كومەگى ءتيدى. ءوز ءىسىنىڭ حاس شەبەرلەرى قارجىلىق ساۋاتتىلىققا ۇيرەتتى. كاسىپكەر ادامعا ول دا كەرەك. ءبىز بۇرىن ءتىپتى سالىقتى قالاي تولەۋ كەرەك ەكەنىن دە بىلمەيتىن ەدىك قوي, – دەيدى ول, – جەكە كاسىپكەر رەتىندە تىركەلدىم, ەندى ەرىنبەي ەڭبەك ەتپەكپىن.
گرانت قارجىسىنا كوسمەتولوگيا كابينەتىنە قاجەتتى جابدىقتاردى ساتىپ الىپتى. باستاپقىدا قۇرقىلتايدىڭ ۇياسىنداي كىشكەنتاي كابينەت بۇل كۇندە قىزمەت كورسەتۋ اياسىن بىرتىندەپ كەڭەيتىپ كەلەدى.
– 2019 جىلى 132 ادامعا 51 ملن تەڭگەنىڭ گرانتى بەرىلدى. ءبىز بولاشاق كاسىپكەرلەردى ءبىر جىل بويى جۇمىس ىستەۋگە ۇيرەتتىك. ونىڭ ىشىندە بۋحگالتەرلىك ەسەپ, سالىق تولەۋدىڭ ءتارتىبى ءتارىزدى ەسەپ-قيساپ بار, – دەيدى اۋداندىق كاسىپكەرلەردى قولداۋ ورتالىعىنىڭ قىزمەتكەرى راۋشان وماروۆا.
«قولى قيمىلداعاننىڭ اۋزى قيمىلدايدى» دەگەن اتالى ءسوز بار. ءبىر ءۇمىت, ءبىر كۇدىكپەن كاسىبىن باستاعانداردىڭ ءىسىنىڭ وڭىنان وڭعارىلعانىن كورگەن زەرەندىلىكتەردىڭ تاراپىنان قۇلشىنىس ءوسىپ كەلەدى. بيىل «باستاۋ بيزنەس» اياسىندا وقىپ ءبىلىم الۋعا 300-دەن استام ءوتىنىش ءتۇستى. كوروناۆيرۋس كارانتينىنە بايلانىستى كاسىپكەرلىك نەگىزدەرى بويىنشا وقىتۋ ونلاين رەجىمىندە وتكىزىلۋدە. ۇمتىلعانداردىڭ ۇتقانىن كورگەن قالعان جۇرت تا ءوز كاسىبىمەن اينالىساتىن ۋاقىت الىس ەمەس.
اقمولا وبلىسى,
زەرەندى اۋدانى
