– قازىرگى قارقىندى باسەڭدەتپەۋ ءۇشىن داعدارىسقا قارسى جوسپار ازىرلەندى. وعان ەكونوميكانىڭ نەگىزگى سالالارى بويىنشا 108 ءىس-شارا كىرەدى. ينۆەستيتسيا تارتۋعا ەرەكشە كوڭىل بولىنەدى. وبلىستا 17 مىڭنان استام جاڭا جۇمىس ورنىن قۇرۋ باعىتىندا 1 ترلن تەڭگەدەن استام سومانىڭ 41 ينۆەستيتسيالىق جوباسى جوسپارلانعان, – دەدى وبلىس باسشىسى.
وسى ورايدا, قاراعاندى وبلىسىندا كوروناۆيرۋسقا قارسى كۇرەس شىعىندارىنا بايلانىستى جەرگىلىكتى بيۋدجەت جاپپاي ءىس-شارالار بولىگىندە وڭتايلاندىرىلىپتى. دەگەنمەن, مۇنداي قادام جوسپارلانعان الەۋمەتتىك باعدارلامالارعا اسەر ەتپەيدى, دەپ مالىمدەدى وبلىس اكىمى جەڭىس قاسىمبەك. ياعني, بۇل جەرگىلىكتى اتقارۋشى بيلىك ءوزىنىڭ بارلىق مىندەتتەمەلەرىن ورىندايدى دەگەن ءسوز.
جەڭىس قاسىمبەك ۇنەمدەلگەن اقشا داعدارىس پەن ەپيدەمياعا قارسى ءىس-شارالارعا باعىتتالاتىنىن حابارلادى.
– جوسپارلانعان الەۋمەتتىك باعدارلامالاردى قىسقارتقان جوقپىز, ولاردىڭ بارلىعى تولىق كولەمدە جۇزەگە اسىرىلاتىن بولادى. ۋادە ەتكەنىمىزدەي, تۇرعىن ۇيلەر مەن جولداردى سالىپ جاتىرمىز. ءبىز بيۋدجەتتى وڭتايلاندىردىق. بىراق, بۇل تەك فورۋمدار, كورمەلەر, مادەنيەت جانە سپورت سالاسىنداعى ءىس-شارالار وتكىزۋ سياقتى باعىتتارعا قاتىستى. حالىق الدىنداعى بارلىق الەۋمەتتىك مىندەتتەمەلەر ورىندالادى, – دەدى وبلىس اكىمى.
«تارتا جەسەڭ, تاي قالادى» دەگەن. ۇنەمدەلگەن قاراجاتتىڭ ءبىر بولىگى ەپيدەمياعا قارسى شارالارعا جىبەرىلدى. اتاپ ايتقاندا, قاجەتتى مەديتسينالىق قۇرال-جابدىقتاردى, وكپەنى جاساندى دەمالدىرۋ اپپاراتتارىن ساتىپ الۋعا جۇمسالدى. سونىمەن قاتار, بۇل قاراجاتتىڭ ءبىرازى «نۇرلى جەر» باعدارلاماسى بويىنشا تۇرعىن ءۇي جانە ينجەنەرلىك-كوممۋنيكاتسيالىق ينفراقۇرىلىم قۇرىلىسىنا باعىتتالماقشى.
رەسپۋبليكالىق جانە وبلىستىق بيۋدجەتتەن دارىگەرلەر ءۇشىن جەكە قورعانۋ قۇرالدارىن, مەديتسينالىق جابدىقتاردى ساتىپ الۋعا, توتەنشە جاعدايدى قامتاماسىز ەتۋ بويىنشا ءىس-شارالاردى وتكىزۋگە جانە باسقا دا قاجەتتىلىكتەرگە 4,8 ملرد تەڭگە بولىنگەنىن حابارلادى وبلىس اكىمى.
قازىرگى تاڭداعى باستى مىندەتتەردىڭ ءبىرى – تۇرعىنداردى تابىسى تۇراقتى جۇمىسقا ورنالاستىرۋ. وسى باعىتتا «جۇمىسپەن قامتۋدىڭ جول كارتاسى» باعدارلاماسى اياسىندا نىسانداردى سالۋ, جوندەۋ جانە اباتتاندىرۋ بويىنشا ينفراقۇرىلىمدىق جوبالارعا 63,7 ملرد تەڭگە بولىنگەن. بۇل جۇمىستارعا جەرگىلىكتى كومپانيالار جۇمىلدىرىلۋدا.
سونىمەن قاتار, جەڭىس قاسىمبەك «ەڭبەك» ناتيجەلى جۇمىسپەن قامتۋدىڭ جانە جاپپاي كاسىپكەرلىكتى دامىتۋدىڭ باعدارلاماسىن جۇزەگە اسىرۋعا 8 ملرد تەڭگەدەن استام قارجى بولىنگەنىن ءمالىم ەتتى. جۇمىسسىزدار كاسىپتىك دايارلاۋ مەن قايتا وقىتۋ كۋرستارىنان ءوتىپ, كاسىپكەرلىك نەگىزدەرىن وقىپ, شاعىن نەسيە نەمەسە گرانتتار الا الادى. سونداي-اق, الەۋمەتتىك جانە قوعامدىق جۇمىستار, جاستار تاجىريبەسى سياقتى كومەك تۇرلەرىنىڭ دە قاراستىرىلعانىن اتاپ ءوتتى وبلىس اكىمى.
